പഞ്ചാബില്‍ 75കാരിയായ അമ്മയെ ബലാത്സംഗത്തിനിരയാക്കി 32കാരന്‍ ; രക്ഷിച്ചത് ഇളയ മകന്‍

മയക്കുമരുന്നിന് അടിമയായ മൂത്ത മകന്‍ പുലര്‍ച്ചെ 2 മണിയോടെയാണ് ക്രൂരകൃത്യം നടത്തിയത്. വീട്ടിലെ മറ്റുള്ളവര്‍ ഒരു വിവാഹ ചടങ്ങിൽ പങ്കെടുക്കുന്നതിനിടെയാണ് സംഭവം

ബല്ലുവാന : പഞ്ചാബിലെ ഫാസിൽക ജില്ലയിലെ ബല്ലുവാനയില്‍ 75 കാരിയെ മൂത്ത മകൻ ബലാത്സംഗത്തിനിരയാക്കി. മയക്കുമരുന്നിന് അടിമയായ ഇയാള്‍ പുലര്‍ച്ചെ 2മണിയോടെയോടെയാണ് ക്രൂരകൃത്യം നടത്തിയത്. വീട്ടിലുള്ള മറ്റുള്ളവര്‍ സമീപത്ത് ഒരു വിവാഹ ചടങ്ങിൽ പങ്കെടുക്കുന്നതിനിടെയാണ് നടുക്കുന്ന സംഭവം. 32 കാരനായ അവിവാഹിതനായ പ്രതി ഈ സമയം മദ്യലഹരിയിലായിരുന്നു.

'മറ്റുള്ളവര്‍ വിവാഹത്തിന് പോയതിനാൽ വീട്ടിൽ ഒറ്റയ്‌ക്കായിരുന്നു. ഈ സമയം മൂത്തമകൻ മദ്യപിച്ച് വീട്ടിലെത്തി എന്നെ ബലാത്സംഗത്തിനിരയാക്കി. ഞാൻ നിസ്സഹായാവസ്ഥയിലായിരുന്നു. അതിനിടയിൽ ഇളയ മകൻ വന്ന് രക്ഷിച്ചു' - പൊലീസിന് നല്‍കിയ പരാതിയിൽ വയോധിക പറയുന്നു. ഇളയ മകനെ കണ്ടതോടെ പ്രതി സംഭവസ്ഥലത്ത് നിന്ന് ഓടിരക്ഷപ്പെട്ടു. ബഹവാല പൊലീസ് സ്‌റ്റേഷനിൽ എഫ്ഐആർ രജിസ്‌റ്റർ ചെയ്‌തിട്ടുണ്ട്. പൊലീസ് കുറ്റവാളിക്കായി തെരച്ചില്‍ ഊര്‍ജിതമാക്കി.

'എന്‍റെ അമ്മ ബുദ്ധിമുട്ടുന്നത് ഞാൻ കണ്ടു, അതിനാൽ രക്ഷിക്കാൻ ഓടി. അമ്മ അബോധാവസ്ഥയിലായിരുന്നു. ഞാൻ അമ്മയെ ഉണർത്താൻ ശ്രമിക്കുമ്പോൾ ചേട്ടൻ കടന്നുകളഞ്ഞു. ഞാൻ ഉടൻ തന്നെ പൊലീസിനെ വിവരമറിയിച്ചു' - ഇളയ മകൻ ഇടിവി ഭാരതിനോട് പറഞ്ഞു.

വാർത്ത പുറത്തുവന്നയുടൻ എസ്‌ഐ ഇന്ദർജിത് കൗർ ഇരയുടെ മൊഴി രേഖപ്പെടുത്താൻ ആശുപത്രിയിൽ എത്തി. ഊര്‍ജിത അന്വേഷണത്തിലൂടെ പ്രതിക്കെതിരെ കർശന നടപടിയെടുക്കുമെന്ന് പൊലീസ് അറിയിച്ചു. ഇരയായ വയോധിക ഇപ്പോൾ സർക്കാർ ആശുപത്രിയിൽ ചികിത്സയിലാണ്.

'ഞങ്ങൾക്ക് പരാതി ലഭിച്ചിട്ടുണ്ട്, ഇതിന്‍മേല്‍ ആവശ്യമായ മെഡിക്കൽ പരിശോധനകൾ നടത്തിയിട്ടുണ്ട്. റിപ്പോർട്ട് വന്നാലേ കൃത്യമായ വിവരങ്ങൾ പറയാനാകൂ. നിലവിൽ ആ സ്ത്രീ ചികിത്സയിലാണ്, അവരുടെ ആരോഗ്യനില തൃപ്തികരമാണ്' - ഡോക്‌ടര്‍ ഇടിവി ഭാരതിനോട് പറഞ്ഞു.