ന്യൂഡൽഹി : രാജ്യത്ത് കൊവിഡ് വ്യാപനം രൂക്ഷമാകുന്നു. ബജറ്റ് സമ്മേളനത്തിന് മുൻപായി നടത്തിയ പരിശോധനയിൽ പാർലമെന്‍റിൽ ജോലി ചെയ്യുന്ന 400-ലധികം ഉദ്യോഗസ്ഥർക്ക് കൊവിഡ് സ്ഥിരീകരിച്ചു. ജനുവരി 4 മുതൽ 8 വരെ നടത്തിയ 1,409 പരിശോധനകളിൽ നിന്ന് 402 പേരാണ് പോസിറ്റീവായത്. എല്ലാ ഫലങ്ങളും ജീനോം സീക്വൻസിങ്ങിനായി അയച്ചു.
സർക്കാരിന്‍റെ മാർഗനിർദ്ദേശങ്ങൾക്ക്‌ അനുസൃതമായി മുൻകരുതലുകൾ സ്വീകരിക്കാൻ ജീവനക്കാർക്ക് നിർദേശം നൽകിയിട്ടുണ്ട്. രോഗബാധിതരുമായി സമ്പർക്കം പുലർത്തിയതിനെ തുടർന്ന് പാർലമെന്‍റിന്‍റെ ഇരുസഭകളിലെയും നിരവധി ജീവനക്കാരെ ഐസൊലേഷനിൽ പ്രവേശിപ്പിച്ചിട്ടുണ്ട്.