പുൽവാമയിൽ ഏറ്റുമുട്ടൽ ; മൂന്ന് ജെയ്‌ഷെ ഇ മുഹമ്മദ് ഭീകരരെ വധിച്ച് സൈന്യം

സുരക്ഷാസേനയും തീവ്രവാദികളും തമ്മിൽ ഏറ്റുമുട്ടലുണ്ടായത് പുൽവാമയിലെ ചന്ദ്ഗാം മേഖലയില്‍

ശ്രീനഗർ : ദക്ഷിണ കശ്‌മീരിലെ പുൽവാമ ജില്ലയിൽ ബുധനാഴ്‌ച പുലർച്ചെ സുരക്ഷാസേനയുമായുള്ള ഏറ്റുമുട്ടലിൽ മൂന്ന് തീവ്രവാദികൾ കൊല്ലപ്പെട്ടതായി ജമ്മു കശ്‌മീർ പൊലീസ്. പുൽവാമയിലെ ചന്ദ്ഗാം മേഖലയിൽ നടന്ന ഏറ്റുമുട്ടലിൽ മൂന്ന് ജെയ്‌ഷെ ഇ മുഹമ്മദ് ഭീകരരെയാണ് വധിച്ചത്.

'ഒരു പാകിസ്ഥാൻ പൗരൻ ഉൾപ്പടെ മൂന്ന് ഭീകരരെ വധിച്ചു. ഇവരിൽ നിന്ന് ആയുധങ്ങളും 2 എം-4 കാർബൈനും, 1 എകെ സീരീസ് റെഫിളും കണ്ടെത്തിയിട്ടുണ്ട്.' കശ്‌മീർ പൊലീസ് ട്വീറ്റ് ചെയ്‌തു.

തീവ്രവാദികളുടെ സാന്നിധ്യത്തെക്കുറിച്ചുള്ള വിവരത്തിന്‍റെ അടിസ്ഥാനത്തിൽ പൊലീസിന്‍റെയും സുരക്ഷാസേനയുടെയും സംയുക്തസംഘം പ്രദേശം വളയുകയും തിരച്ചിൽ നടത്തുകയും ചെയ്തിരുന്നു. ഇതിന് പിന്നാലെയാണ് തീവ്രവാദികളും സുരക്ഷാസേനയും തമ്മിൽ ഏറ്റുമുട്ടൽ നടന്നത്.

24 മണിക്കൂറിനിടെ ദക്ഷിണ കശ്‌മീരിൽ നടക്കുന്ന രണ്ടാമത്തെ ഏറ്റുമുട്ടലാണിത്. ചൊവ്വാഴ്‌ച കുൽഗാം ജില്ലയിലെ ഓകെ ഗ്രാമത്തിൽ നടന്ന ആക്രമണ പ്രത്യാക്രമണങ്ങളില്‍ രണ്ട് പ്രാദേശിക ലഷ്‌കർ ഇ ത്വയ്‌ബ തീവ്രവാദികൾ കൊല്ലപ്പെട്ടിരുന്നു.

2022ലെ ആദ്യ അഞ്ച് ദിവസത്തിനുള്ളിൽ കശ്‌മീരിൽ നടക്കുന്ന അഞ്ചാമത്തെ ഏറ്റുമുട്ടലാണിത്. ഇന്നത്തേതടക്കം എട്ട് തീവ്രവാദികൾ ഈ ഏറ്റുമുട്ടലുകളിലെല്ലാം കൊല്ലപ്പെട്ടു.