മുംബൈ : മഹാരാഷ്‌ട്ര-നന്ദേഡിലെ സര്‍ക്കാര്‍ ആശുപത്രിയില്‍ മരുന്ന് ക്ഷാമത്തെ തുടര്‍ന്ന് ചികിത്സ ലഭ്യമാക്കാനാകാതെ 24 മണിക്കൂറിനുള്ളില്‍ മരിച്ചത് 12 നവജാത ശിശുക്കള്‍ ഉള്‍പ്പടെ 24 പേര്‍. മരിച്ച നവജാത ശിശുക്കളില്‍ ആറ് ആണ്‍കുട്ടികളും ആറ് പെണ്‍കുട്ടികളുമാണെന്ന് ആശുപത്രി ഡീന്‍ ശങ്കര്‍ റാവു ചവാന്‍ പറഞ്ഞു. ബാക്കിയുള്ള 12 പേര്‍ വിവിധ അസുഖങ്ങള്‍ ബാധിച്ചവരായിരുന്നു (24 Patients Died In Govt Hospital).
ഇവരില്‍ ഭൂരിഭാഗവും പാമ്പ് കടിയേറ്റ് ചികിത്സയില്‍ കഴിയുന്നവരാണ്. മരുന്ന് ക്ഷാമത്തിനൊപ്പം ആശുപത്രിയിലെ ജീവനക്കാരുടെ സ്ഥലം മാറ്റവും രോഗികള്‍ക്ക് തക്ക സമയത്ത് സേവനം ലഭ്യമാക്കുന്നതിന് തടസമായി. സര്‍ക്കാര്‍ ആശുപത്രിയില്‍ നിന്നും 70, 80 കിലോമീറ്ററുകള്‍ക്ക് ഇപ്പുറം മറ്റ് ആശുപത്രികളില്ലെന്നും അതുകൊണ്ട് തന്നെ വിദൂര സ്ഥലങ്ങളില്‍ നിന്നുള്ള രോഗികള്‍ അടക്കം ആശ്രയിക്കുന്നത് ഈ ആശുപത്രിയെയാണെന്നും ഡീന്‍ പറഞ്ഞു.
ആഴ്‌ചയില്‍ ചില ദിവസങ്ങളില്‍ രോഗികളുടെ എണ്ണം വളരെ കൂടുതലായിരിക്കും. ജീവനക്കാരെ കൂട്ടത്തോടെ സ്ഥലം മാറ്റുന്നതും കൃത്യ നിര്‍വഹണത്തിന് തടസമാകുന്നുണ്ടെന്ന് ആശുപത്രി ഡീന്‍ ശങ്കര്‍ റാവു ചവാന്‍ വ്യക്തമാക്കി.