മുംബൈ :യുദ്ധഭൂമിയായ യുക്രൈനിലെ മൈക്കോളൈവ് തുറമുഖത്ത് ചരക്കുകപ്പലിൽ 21 ഇന്ത്യൻ നാവികർ കുടുങ്ങിക്കിടക്കുന്നതായി റിപ്പോർട്ട്. നിലവിൽ കപ്പലിനുള്ളിലുള്ളവർ എല്ലാവരും സുരക്ഷിതരാണെന്നും തങ്ങളുടെ കുടുംബങ്ങളുമായും കപ്പൽ നിർവഹണ ഏജൻസിയായ 'എംവി മാരിടൈമു'മായും നിരന്തരം സമ്പർക്കം പുലർത്തുകയാണെന്നും ഏജൻസി സ്ഥാപകനും സിഇഒയുമായ സഞ്ജയ് പ്രഷാർ അറിയിച്ചു. എംവി മാരിടൈം ഏജൻസിയുടേതിന് പുറമേ മറ്റ് 24 കപ്പലുകളും തുറമുഖത്ത് നങ്കൂരമിട്ടിട്ടുണ്ടെന്നും ഇവയിലും നിരവധി ഇന്ത്യൻ നാവികരുണ്ടെന്നും പ്രഷാർ കൂട്ടിച്ചേർത്തു.
നിലവിൽ ഏജൻസി പ്രദേശത്തെ സംഭവവികാസങ്ങൾ നിരീക്ഷിച്ചുവരികയാണെന്നും വിദേശകാര്യ മന്ത്രാലയം, ഇന്ത്യൻ എംബസി, സെക്‌ടർ റെഗുലേറ്റർ ഡയറക്‌ടർ ജനറൽ ഓഫ് ഷിപ്പിങ് എന്നിവയുൾപ്പടെ ബന്ധപ്പെട്ട എല്ലാ അധികാരികളുമായും വിവരങ്ങൾ കൈമാറുന്നുണ്ടെന്നും അദ്ദേഹം വ്യക്തമാക്കി.
റഷ്യ-യുക്രൈൻ യുദ്ധം ആരംഭിച്ച കഴിഞ്ഞ മാസം മുതൽ തുറമുഖത്ത് അകപ്പെട്ട ജീവനക്കാർ ഈ ദിവസങ്ങളിലെല്ലാം കപ്പലിൽ തന്നെ കഴിഞ്ഞുവരികയാണ്. കപ്പലിൽ കർശനമായ ജാഗ്രതയും പാലിക്കുന്നുണ്ട്. നിലവിൽ മൈക്കോളൈവിൽ നിലയുറപ്പിച്ചിട്ടുള്ള തങ്ങളുടെ കപ്പൽ ഉൾപ്പടെ ആകെ 25 എണ്ണം തുറമുഖത്തുണ്ട്. ഇവയിലും ഇന്ത്യൻ നാവികർ ഉണ്ട്. തങ്ങളുടെ കപ്പലിലെ ജീവനക്കാർ നിലവിൽ സുരക്ഷിതരാണ്. ഇന്‍റർനെറ്റും സാറ്റലൈറ്റ് കമ്മ്യൂണിക്കേഷനും ഓൺബോർഡിൽ പ്രവർത്തിക്കുന്നുണ്ടെന്നും പ്രഷാർ പറഞ്ഞു.