പുരി/ന്യൂഡൽഹി: സ്വാതന്ത്ര്യ സമരസേനാനി സുഭാഷ് ചന്ദ്രബോസിന്‍റെ 125-ാം ജന്മവാർഷികം ഇന്ന്. നേതാജിയോടുള്ള ആദരസൂചകമായി മണലിൽ സുഭാഷ് ചന്ദ്രബോസിന്‍റെയും ഇന്ത്യ ഗേറ്റിന്‍റെയും ഏഴടി ഉയരമുള്ള മണൽ ശിൽപം നിർമിച്ചിരിക്കുകയാണ് പ്രശസ്ത സാൻഡ് ആർടിസ്റ്റായ സുദർശൻ പട്‌നായിക്. ഒഡിഷയിലെ പുരി തീരത്താണ് അദ്ദേഹം മണലിൽ അതിമനോഹരമായ ശിൽപം തീർത്തത്.
അതേസമയം സുഭാഷ് ചന്ദ്രബോസിന്‍റെ ജന്മവാർഷികത്തിൽ പ്രധാനമന്ത്രി നരേന്ദ്ര മോദിയും നേതാജിക്ക് ആദരാഞ്ജലി അർപ്പിച്ചു. 'ഓരോ ഇന്ത്യൻ ജനതയ്ക്കും പരാക്രം ദിവസ് ആശംസകൾ നേരുന്നു. നേതാജി സുഭാഷ് ചന്ദ്രബോസിന്‍റെ 125-ാം ജന്മവാർഷികത്തിൽ അദ്ദേഹത്തിന് എന്‍റെ ആദരാഞ്ജലികൾ. അദ്ദേഹത്തിന്‍റെ ജയന്തി ദിനമായ ഇന്ന് നേതാജിയെ ഞാൻ വണങ്ങുന്നു. രാജ്യത്തിന് അദ്ദേഹം നൽകിയ മഹത്തായ സംഭാവനയിൽ ഓരോ ഇന്ത്യൻ പൗരരും അഭിമാനിക്കുന്നു' എന്ന് പ്രധാനമന്ത്രി ട്വിറ്ററിൽ കുറിച്ചു.