ಈ ವರ್ಷದ ಮೊದಲ 6 ತಿಂಗಳಲ್ಲಿ ಯುಪಿಐ ವಹಿವಾಟು 78.97 ಬಿಲಿಯನ್‌ಗೆ ಏರಿಕೆ: ವರದಿ

ಈ ವರ್ಷದ ಮೊದಲ ಆರು ತಿಂಗಳಲ್ಲಿ ಯುಪಿಐ ವಹಿವಾಟಿನಲ್ಲಿ ಭರ್ಜರಿ ಏರಿಕೆಯಾಗಿದೆ. ಅದರಲ್ಲೂ ಫೋನ್​ ಪೇ ಅತಿಹೆಚ್ಚು ಜನಪ್ರಿಯ ಯುಪಿಐ ಮಾದರಿಯಾಗಿ ಹೊರಹೊಮ್ಮಿದೆ.

ನವದೆಹಲಿ:ಹಣಕಾಸು ವಹಿವಾಟಿಗೆ ತ್ವರಿತ ಪಾವತಿ ವ್ಯವಸ್ಥೆಯಾದ ಯುನಿಫೈಡ್​​ ಪೇಮೆಂಟ್ಸ್​​ ಇಂಟರ್​ಫೇಸ್ (ಯುಪಿಐ) ವಹಿವಾಟಿನ ಪ್ರಮಾಣವು ಕಳೆದ ಆರು ತಿಂಗಳಲ್ಲಿ 78.97 ಬಿಲಿಯನ್‌ಗೆ ತಲುಪಿದ್ದು, ವರ್ಷದಿಂದ ವರ್ಷಕ್ಕೆ ಶೇಕಡಾ 52 ರಷ್ಟು ಏರಿಕೆ ದಾಖಲಿಸಿದೆ ಎಂದು ವರದಿಯೊಂದು ತಿಳಿಸಿದೆ.

2024 ರ ಮೊದಲಾರ್ಧದಲ್ಲಿ (ಜನವರಿಯಿಂದ ಜೂನ್‌ವರೆಗೆ) ದೇಶದಲ್ಲಾದ ಡಿಜಿಟಲ್ ಪಾವತಿಗಳ ಬಗ್ಗೆ ತಂತ್ರಜ್ಞಾನ ಸೇವಾ ಪೂರೈಕೆದಾರ ವರ್ಲ್ಡ್‌ಲೈನ್ ಗುರುವಾರ ವರದಿ ಪ್ರಕಟಿಸಿದ್ದು, ಇದರಲ್ಲಿ ಯುಪಿಐ ವಹಿವಾಟು ಪಾವತಿ ವ್ಯವಸ್ಥೆಯಲ್ಲಿ ಮುಂದಿದೆ. ಅದರ ವ್ಯಾಪ್ತಿಯೂ ವೇಗವಾಗಿ ವಿಸ್ತರಿಸುತ್ತಿದೆ ಎಂದು ಹೇಳಿದೆ.

ಯುಪಿಐ ಬಳಕೆದಾರರ ಸಂಖ್ಯೆಯು 2023 ರ ಜನವರಿ ತಿಂಗಳಲ್ಲಿ 8.03 ಬಿಲಿಯನ್​​ನಷ್ಟಿತ್ತು. ಇದು 2024ರ ಜೂನ್​​ ವೇಳೆಗೆ 13.9 ಬಿಲಿಯನ್​​ಗೆ ಏರಿಕೆ ಕಂಡಿದೆ. ಇದರ ಜೊತೆಗೆ ವಹಿವಾಟಿನಲ್ಲೂ ಹೆಚ್ಚಳವಾಗಿದ್ದು, 2023 ರ ಜನವರಿಯಲ್ಲಿ 12.98 ಟ್ರಿಲಿಯನ್‌ನಷ್ಟಿತ್ತು. 2024ರ ಜೂನ್​​ ವೇಳೆಗೆ ಇದು 20.07 ಟ್ರಿಲಿಯನ್‌ಗೆ ತಲುಪಿದೆ ಎಂದು ವರದಿಯಲ್ಲಿದೆ.

2023 ರ ಮೊದಲ ಆರು ತಿಂಗಳಲ್ಲಿ ಯುಪಿಐ ವಹಿವಾಟಿನ ಪ್ರಮಾಣವು 51.9 ಬಿಲಿಯನ್​​ ಡಾಲರ್​ನಷ್ಟಿದ್ದರೆ, 2024 ರ ಮೊದಲ ಆರು ತಿಂಗಳಲ್ಲಿ ಇದು 78.97 ಬಿಲಿಯನ್​ ಡಾಲರ್​ನಷ್ಟು ಏರಿದೆ. ಅಂದರೆ, ಶೇಕಡಾ 52 ರಷ್ಟು ಹೆಚ್ಚಳ ಕಂಡಿದೆ. ಇದೇ ಅವಧಿಯಲ್ಲಿ ವಹಿವಾಟಿನ ಮೌಲ್ಯದಲ್ಲೂ ಶೇಕಡಾ 40 ರಷ್ಟು ಬೆಳವಣಿಗೆಯಾಗಿದ್ದು, 83.16 ಟ್ರಿಲಿಯನ್‌ನಿಂದ 116.63 ಟ್ರಿಲಿಯನ್‌ಗೆ ಹೆಚ್ಚಿದೆ.

ವಹಿವಾಟಿನಲ್ಲಿ ಫೋನ್​ ಪೇ ಅಗ್ರಜ:ಇನ್ನು ಯುಪಿಐ ವ್ಯವಸ್ಥೆಯನ್ನು ಹಲವು ಕಂಪನಿಗಳು ಪರಿಚಯಿಸಿದ್ದು, ಅದರಲ್ಲಿ ಫೋನ್​​ಪೇ ಜನರ ನೆಚ್ಚಿನ ಕಂಪನಿಯಾಗಿದೆ. ಫೋನ್​ಪೇ ಮೂಲಕ ಗ್ರಾಹಕರು ಅತಿಹೆಚ್ಚು ವಹಿವಾಟು ನಡೆಸುತ್ತಿದ್ದಾರೆ. ಬಳಿಕ ಗೂಗಲ್​​ ಪೇ, ಪೇಟಿಎಂ ಇದೆ. ಇದೇ ವೇಳೆ ಕಳೆದ ವರ್ಷಕ್ಕೆ ಹೋಲಿಸಿದರೆ, ಜನರ ವಹಿವಾಟಿನ ಸರಾಸರಿ ಮೊತ್ತವು ಶೇ.8 ರಷ್ಟು ಕಡಿಮೆಯಾಗಿದೆ. 2023 ರ ಮೊದಲ ಆರು ತಿಂಗಳಲ್ಲಿ ಸರಾಸರಿ ವಹಿವಾಟಿನ ಮೊತ್ತ 1,603 ಆಗಿದ್ದರೆ, 2024 ರಲ್ಲಿ ಇದು 1,478 ಕ್ಕೆ ಇಳಿದಿದೆ ಎಂದು ಅದು ವರದಿ ಉಲ್ಲೇಖಿಸಿದೆ.

ಇದರ ಜೊತೆಗೆ ವ್ಯಕ್ತಿಯಿಂದ ವ್ಯಕ್ತಿಗೆ ಯುಪಿಐ ವಹಿವಾಟಿನಲ್ಲಿ ಏರಿಕೆಯಾಗಿದೆ. ವ್ಯಕ್ತಿಗಳ ನಡುವಣದ ವಹಿವಾಟು 2,812 ರಿಂದ 2,836 ಕ್ಕೆ ಹೆಚ್ಚಿದೆ. ಆದರೆ, ವ್ಯಕ್ತಿಯಿಂದ ವ್ಯಾಪಾರಿಗಳ ಮಧ್ಯೆ ನಡೆಯುವ ವಹಿವಾಟಿನಲ್ಲಿ ಇಳಿಕೆಯಾಗಿದೆ. ಇದರ ಎಟಿಎಸ್​​ 667 ರಿಂದ 643 ಕ್ಕೆ ಇಳಿದಿದೆ. ಅಂದರೆ, ಶೇಕಡಾ 4 ರಷ್ಟು ಕಡಿತವಾಗಿದೆ.

ಕಿರಾಣಿ ಅಂಗಡಿಗಳು, ರೆಸ್ಟೋರೆಂಟ್‌ಗಳು, ಸೇವಾ ಕೇಂದ್ರಗಳು, ಬಟ್ಟೆ ಅಂಗಡಿಗಳು, ಸರ್ಕಾರಿ ಸೇವೆಗಳು, ಔಷಧಾಲಯಗಳು ಮತ್ತು ಆಸ್ಪತ್ರೆಗಳಲ್ಲಿ ಈ ಆರು ತಿಂಗಳಲ್ಲಿ ಅತಿ ಹೆಚ್ಚು ವಹಿವಾಟು ನಡೆದ ಸ್ಥಳಗಳಾಗಿವೆ.

ಇದನ್ನೂ ಓದಿ:ಪ್ರೀತಿಸಿದ ಹುಡುಗಿ ಸಿಗಲಿಲ್ಲವೆಂದು ಬ್ರಹ್ಮಚಾರಿಯಾಗಿಯೇ ಉಳಿದ ರತನ್‌; ಇದು ಟಾಟಾರ ಅದ್ಭುತ ಲವ್ ಸ್ಟೋರಿ!