ದಿಢೀರ್ ಗಾಳಿ ಸಹಿತ ಮಳೆ: ವಾಹನಗಳು ಜಖಂ, ಮನೆಗಳಿಗೆ ನುಗ್ಗಿದ ಚರಂಡಿ ನೀರು

ಶಿವಮೊಗ್ಗ ನಗರದಲ್ಲಿ ಸುರಿದ ದಿಢೀರ್​ ಗಾಳಿ ಸಹಿತ ಮಳೆಯು ಸಾಕಷ್ಟು ಅವಾಂತರ ಸೃಷ್ಟಿಸಿದೆ. ಇಂದು ಸಂಜೆ‌ 5 ಗಂಟೆ ಸುಮಾರಿಗೆ ವರುಣ ಆರ್ಭಟ ಶುರುವಾಗಿದೆ. ಗಾಳಿ ಸಹಿತ ಮಳೆಯಾಗಿದ್ದರಿಂದ ಮರಗಳು ನೆಲಕ್ಕುರುಳಿವೆ. ಕೆಲವೆಡೆ ವಿದ್ಯುತ್ ಕಂಬಗಳ ಮೇಲೆ ಬಿದ್ದಿವೆ. ಇಲ್ಲಿನ ವಿನೋಬ ನಗರದ ವೀರಣ್ಣ ಲೇಔಟ್​ನಲ್ಲಿ‌ ತೆಂಗಿನ ಮರ ಬಿದ್ದು, ಮೂರು ದ್ವಿಚಕ್ರವಾಹನಗಳು ಜಖಂಗೊಂಡಿವೆ. ಕೆಇಬಿ ವೃತ್ತದ ಬಳಿ ಗೋಪಾಲ್​ ಎಂಬುವವರ ಮನೆ ಮುಂದೇ ನಿಲ್ಲಿಸಿದ್ದ ಮರದ ಮೇಲೆ ಭಾರಿ ಗಾತ್ರ ಮರ ಉರುಳಿ ಬಿದ್ದಿದೆ. ನಗರದೆಲ್ಲೆಡೆ ವಿದ್ಯುತ್​ ಸ್ಥಗಿತಗೊಂಡಿದೆ. ನಗರದ ಹೊರವಲಯದ ಅನುಪಿನಕಟ್ಟೆ ಶೆಡ್ ಬಿದ್ದು ಎರಡು ಎತ್ತುಗಳು ಗಾಯಗೊಂಡಿವೆ. ನಗರದ ಹೊಸಮನೆ ಹಾಗೂ ಟಿಪ್ಪು ನಗರಗಳಲ್ಲಿ ಚರಂಡಿ ನೀರು ಮನೆ ಒಳಗೆ ನುಗ್ಗಿದ್ದು, ಹೊರ ಹಾಕಲು ನಿವಾಸಿಗಳು ಹರಸಾಹಸ ಪಡುತ್ತಿದ್ದಾರೆ.