ಮತಯಂತ್ರಗಳಲ್ಲಿ ರಾಜಕಾರಣಿಗಳ ಭವಿಷ್ಯ ಭದ್ರ: ದುರ್ಬೀನು ಹಿಡಿದು ಕಾವಲಿಗೆ ನಿಂತ ಎಸ್​ಪಿ ಅಭ್ಯರ್ಥಿ - ಉತ್ತರ ಪ್ರದೇಶ ಚುನಾವಣೆ 2022

ಉತ್ತರ ಪ್ರದೇಶ, ಗೋವಾ, ಪಂಜಾಬ್ ಸೇರಿದಂತೆ ಪಂಚರಾಜ್ಯಗಳ ಚುನಾವಣೆಗೆ ನಡೆದ ಮತದಾನ ಈಗಾಗಲೇ ಮುಕ್ತಾಯಗೊಂಡಿದೆ. ಮಾರ್ಚ್​ 10ರಂದು ಫಲಿತಾಂಶ ಬಹಿರಂಗಗೊಳ್ಳಲಿದೆ. ಇವಿಎಂನಲ್ಲಿ ಅಭ್ಯರ್ಥಿಗಳ ಭವಿಷ್ಯ ಭದ್ರವಾಗಿದ್ದು ಅವುಗಳನ್ನು ಬಿಗಿ ಭದ್ರತೆಯ ಸ್ಟ್ರಾಂಗ್​​ ರೂಂನಲ್ಲಿ ಇರಿಸಲಾಗಿದೆ. ಇನ್ನೊಂದೆಡೆ, ಸಹಜವಾಗಿಯೇ ಅಭ್ಯರ್ಥಿಗಳ ಎದೆಬಡಿತವೂ ಹೆಚ್ಚಾಗಿದೆ. ಉತ್ತರ ಪ್ರದೇಶದ ಮೀರತ್ ಜಿಲ್ಲೆಯ ಹಸ್ತಿನಾಪುರ ಕ್ಷೇತ್ರದ ಸಮಾಜವಾದಿ ಪಕ್ಷದ ಅಭ್ಯರ್ಥಿ ಯೋಗೇಶ್​ ವರ್ಮಾ ಕೂಡ ಈ ಚುನಾವಣೆಯಲ್ಲಿ ಕಣಕ್ಕಿಳಿದಿದ್ದು ಇದೀಗ ಇವಿಎಂ ಸ್ಟ್ರಾಂಗ್​ ರೂಂ ಮೇಲೆ ಹದ್ದಿನ ಕಣ್ಣಿಟ್ಟಿದ್ದಾರೆ. ಇವರು ಕೈಯಲ್ಲಿ ದುರ್ಬೀನು ಹಿಡಿದು, ಸ್ಟ್ರಾಂಗ್​​ ರೂಂನಲ್ಲಿ ಯಾವುದೇ ರೀತಿಯ ಅಕ್ರಮಗಳು ನಡೆಯದಂತೆ ನಿಗಾ ವಹಿಸಿದ್ದಾರೆ. 403 ವಿಧಾನಸಭೆ ಕ್ಷೇತ್ರಗಳ ಉತ್ತರ ಪ್ರದೇಶದಲ್ಲಿ 7 ಹಂತದಲ್ಲಿ ಮತದಾನವಾಗಿದ್ದು, ಬಿಜೆಪಿ-ಸಮಾಜವಾದಿ ಪಕ್ಷದ ನಡುವೆ ಪೈಪೋಟಿ ಇದೆ.