Exercise Harimau Shakti-2023 : ಭಾರತ ಮತ್ತು ಮಲೇಷ್ಯಾ ಯೋಧರ ನಡುವೆ ಜಂಟಿ ಸಮರಾಭ್ಯಾಸ

ಮೇಘಾಲಯ : ಭಾರತೀಯ ಸೇನೆ ಮತ್ತು ಮಲೇಷ್ಯಾ ಸೇನೆಯ ಯೋಧರ ನಡುವೆ ಕಳೆದ ಒಂದು ವಾರದಿಂದ ಜಂಟಿ ಸಮರಾಭ್ಯಾಸ ನಡೆಯುತ್ತಿದೆ. ಈ ಸಮರಾಭ್ಯಾಸವು ಎರಡು ದೇಶಗಳ ನಡುವೆ ವಿವಿಧ ಸೇನಾ ಕೌಶಲ್ಯಗಳನ್ನು ವಿನಿಮಯ ಮಾಡಿಕೊಳ್ಳಲು ಸಹಕಾರಿಯಾಗಲಿದೆ. ಈ ಜಂಟಿ ಸಮರಾಭ್ಯಾಸವು ಇಲ್ಲಿನ ಉಮ್ರೋಯ್​ ಕಂಟೋನ್ಮೆಂಟ್​ನಲ್ಲಿ ನಡೆಯುತ್ತಿದ್ದು, ಎರಡೂ ಸೇನಾಪಡೆಗಳ ಯೋಧರು ಭರ್ಜರಿ ಯುದ್ಧಾಭ್ಯಾಸದಲ್ಲಿ ತೊಡಗಿದ್ದಾರೆ. ಈ ಜಂಟಿ ಸಮರಾಭ್ಯಾಸವನ್ನು ಹರಿಮೌ ಶಕ್ತಿ 2023 ಎಂದು ಕರೆಯಲಾಗಿದೆ.

ಕಳೆದ ಅಕ್ಟೋಬರ್ 23ರಿಂದ ಈ ಜಂಟಿ ಸಮರಾಭ್ಯಾಸ ನಡೆಯುತ್ತಿದ್ದು, ನವೆಂಬರ್​ 5ಕ್ಕೆ ಮುಕ್ತಾಯವಾಗಲಿದೆ. ತರಬೇತಿ ವೇಳೆ ಎರಡೂ ಸೇನೆಯ ಯೋಧರು ಭರ್ಜರಿ ತಾಲೀಮು ನಡೆಸಿದ್ದು, ನೀರಿನಲ್ಲಿ, ಕತ್ತಲಲ್ಲಿ ಮತ್ತು ಹೆಲಿಕಾಪ್ಟರ್ ಮೂಲಕ ವಿವಿಧ ತಾಲೀಮುಗಳನ್ನು ನಡೆಸಿದರು. ಇದೇ ವೇಳೆ, ಮಹಿಳಾ ಯೋಧರೊಬ್ಬರು ಹಾರುತ್ತಿರುವ ಹೆಲಿಕಾಪ್ಟರ್​ನಲ್ಲಿ ನಡೆದ ಸಮರಾಭ್ಯಾಸದಲ್ಲಿ ಪಾಲ್ಗೊಂಡರು.

ಅಲ್ಲದೇ ಭಾರತೀಯ ಮತ್ತು ಮಲೇಷ್ಯಾದ ಯೋಧರು ಇಲ್ಲಿನ ದಟ್ಟ ಅರಣ್ಯಗಳಲ್ಲಿ ಸಮರಾಭ್ಯಾಸ ನಡೆಸಿದರು. ಈ ಸಮರಾಭ್ಯಾಸವು ಭಾರತ ಮತ್ತು ಮಲೇಷ್ಯಾದ ಆಂತರಿಕ ಮತ್ತು ಸೇನಾ ಸಂಬಂಧವನ್ನು ಇನ್ನಷ್ಟು ಗಟ್ಟಿಗೊಳಿಸಲಿದೆ. ಇದಕ್ಕೂ ಮುನ್ನ ಭಾರತೀಯ ಸೇನಾ ಪಡೆ ಅಮೆರಿಕಾ ಸೇನಾ ಪಡೆಯೊಂದಿಗೆ ಸಮರಾಭ್ಯಾಸ ನಡೆಸಿತ್ತು.

ಇದನ್ನೂ ಓದಿ :ಭಾರತ-ಅಮೆರಿಕ ಸೇನಾಪಡೆಗಳ ನಡುವೆ ಜಂಟಿ ಸಮರಾಭ್ಯಾಸ- ವಿಡಿಯೋ