ಲಿಫ್ಟ್​ನಲ್ಲಿ ಸಿಕ್ಕಿಬಿದ್ದ ಎಂಟು ವರ್ಷದ ಬಾಲಕ.. ಸಿಸಿಟಿವಿ ದೃಶ್ಯ ವೈರಲ್​ - 10 ನಿಮಿಷಗಳ ಕಾಲ ಲಿಫ್ಟ್​ ಬಾಕಿ

ಟ್ಯೂಷನ್​ ಮುಗಿಸಿ ಹಿಂತಿರುಗುತ್ತಿದ್ದ ಎಂಟು ವರ್ಷದ ಬಾಲಕನೋರ್ವ ಅಪಾರ್ಟ್​ಮೆಂಟ್​ ಕಟ್ಟಡದ ಲಿಫ್ಟ್​ನಲ್ಲಿ ಸಿಲುಕಿಕೊಂಡಿರುವ ಘಟನೆ ಗ್ರೇಟರ್​ ನೋಯ್ಡಾದ ನಿರಾಲಾ ಆಸ್ಪೈರ್ ಸೊಸೈಟಿಯಲ್ಲಿ ನಡೆದಿದೆ. ನಾಲ್ಕು ಮತ್ತು ಐದನೇ ಮಹಡಿಗಳ ನಡುವೆ 10 ನಿಮಿಷಗಳ ಕಾಲ ಲಿಫ್ಟ್​ ಸ್ಟ್ರಕ್​​ ಆಗಿದ್ದು, ಅದರೊಳಗೆ ಸಿಲುಕಿಕೊಂಡ ವಿವಾನ್​ ಎಂಬ ಬಾಲಕ ಸಹಾಯಕ್ಕಾಗಿ ಕೂಗುತ್ತಿರುವ ದೃಶ್ಯ ಸಿಸಿ ಟಿವಿ ಕ್ಯಾಮರಾದಲ್ಲಿ ಸೆರೆಯಾಗಿದೆ. ಆ ಸಮಯದಲ್ಲಿ ಸಿಸಿಟಿವಿ ಮಾನಿಟರ್​ ಕೋಣೆಯಲ್ಲಿ ಭದ್ರತಾ ಅಧಿಕಾರಿ ಇಲ್ಲದೇ ಇದ್ದ ಕಾರಣ ಸುಮಾರು ಹೊತ್ತು ಮಗು ಲಿಫ್ಟ್​ನಲ್ಲಿ ಒದ್ದಾಡುವಂತಾಗಿದೆ. ಬಹಳ ಸಮಯದ ನಂತರ ಮಗು ಲಿಫ್ಟ್​ನಲ್ಲಿ ಸಿಕ್ಕಿಬಿದ್ದಿರುವುದನ್ನು ನೋಡಿದ ವ್ಯಕ್ತಿ ಇತರರ ಸಹಾಯದಿಂದ ಮಗುವನ್ನು ರಕ್ಷಿಸಿದ್ದಾರೆ.