ಬೆಂಗಳೂರು-ಹೊಸೂರು ಹೆದ್ದಾರಿಯಲ್ಲಿ ಪುಂಡರ ನೈಟ್ ಜಾಲಿ ವ್ಹೀಲಿಂಗ್- ವಿಡಿಯೋ

ಬೆಂಗಳೂರು: ಇಂದು ಮುಂಜಾನೆ 4 ಗಂಟೆಯ ಸುಮಾರಿಗೆ ಯುವಕರ ತಂಡವೊಂದು ಹೆದ್ದಾರಿಯಲ್ಲಿ ಬೈಕ್‌ ವ್ಹೀಲಿಂಗ್ ಮಾಡಿದ್ದಾರೆ. ಬೆಂಗಳೂರು-ಹೊಸೂರು ರಾಷ್ಟ್ರೀಯ ಹೆದ್ದಾರಿಯ ಬೊಮ್ಮಸಂದ್ರ ಡಿಮಾರ್ಟ್ ಮುಂಭಾಗದ ಮೇಲ್ಸೇತುವೆ ಮೇಲೆ ಮೂರ್ನಾಲ್ಕು ಯುವಕರು ಪ್ರತ್ಯೇಕ ಬೈಕ್​ಗಳಲ್ಲಿ ಅಪಾಯಕಾರಿ ಜಾಲಿ ರೈಡಿಂಗ್ ನಡೆಸಿದ್ದು ವಿಡಿಯೋ ಲಭ್ಯವಾಗಿದೆ.

ವ್ಹೀಲಿಂಗ್ ಮಾಡುವುದನ್ನು ಮೊಬೈಲ್​ನಲ್ಲಿ ಸೆರೆ ಹಿಡಿಯಲು ಆರಭಿಸುತ್ತಿದ್ದಂತೆ ಮೂವರು ಯುವಕರು ವೇಗವಾಗಿ ಪರಾರಿಯಾಗಿದ್ದಾರೆ. ಇವರಲ್ಲಿ ಓರ್ವ ಯುವಕ ಚಂದಾಪುರದಿಂದ ಆಚೆಗೂ ಹೆದ್ದಾರಿಯಲ್ಲಿ ವ್ಹೀಲಿಂಗ್ ಮಾಡುತ್ತಾ ಸಾಗಿದ್ದಾನೆ. ಸಾಮಾನ್ಯವಾಗಿ ಈ ವೇಳೆಯಲ್ಲಿ ನಿದ್ರೆ ಮಂಪಿನಲ್ಲಿರುವ ಬಾರಿ ಪ್ರಮಾಣದ ವಾಹನ ಸವಾರರಿಗೆ ಚಮಕ್ ಕೊಡುವ ಈ ಯುವಕರು ಅಪಘಾತಕ್ಕೆ ಕಾರಣರಾಗುತ್ತಾರೆ. 

ಹೆದ್ದಾರಿಯಲ್ಲಿ ಪುಂಡರು ಬೈಕ್​ ಸ್ಟಂಟ್​​ ಹಾಗೂ ವ್ಹೀಲಿಂಗ್ ಮಾಡುವುದರಿಂದ ರಸ್ತೆಯಲ್ಲಿ ಸಂಚರಿಸುವ ಇತರೆ ವಾಹನ ಸವಾರರಿಗೂ ತೊಂದರೆಯಾಗುತ್ತದೆ. ಪೊಲೀಸರು ವ್ಹೀಲಿಂಗ್​ಗೆ ಕಡಿವಾಣ ಹಾಕಲು ಎಷ್ಟೇ ಕಠಿಣ ಕ್ರಮಗಳನ್ನು ಕೈಗೊಂಡರೂ ಪೂರ್ಣ ಪ್ರಮಾಣದಲ್ಲಿ ಇಂಥ ಅಟ್ಟಹಾಸ ನಿಲ್ಲುತ್ತಿಲ್ಲ ಎಂಬುದೇ ವಿಪರ್ಯಾಸ. ಈ ಕುರಿತು ಇತರೆ ಸವಾರರು ಆಕ್ರೋಶ ಹೊರಹಾಕಿದ್ದಾರೆ.

ಇದನ್ನೂ ಓದಿ:ಇಬ್ಬರು ಯುವತಿಯರನ್ನು ಕೂರಿಸಿಕೊಂಡು ಅಪಾಯಕಾರಿ ಬೈಕ್‌ ಸ್ಟಂಟ್‌, ಆರೋಪಿ ಸೆರೆ​- ವಿಡಿಯೋ