ನಿಂತುಕೊಂಡೇ ಸುಖ ನಿದ್ರೆ ಮಾಡುವ ಅಂಬಾರಿ ಕ್ಯಾಪ್ಟನ್ ಅಭಿಮನ್ಯು : ವಿಡಿಯೋ - ಬನ್ನಿ ಮಂಟಪದವರೆಗೆ ತಾಲೀಮು

ಮೈಸೂರು : ಅರಮನೆಯ ಕೋಡಿ ಸೋಮೇಶ್ವರ ದೇವಾಲಯದ ಮುಂಭಾಗದಲ್ಲಿರುವ ಶೆಡ್​ನಲ್ಲಿ ವಾಸ್ತವ್ಯ ಹೂಡಿರುವ, ಚಿನ್ನದ ಅಂಬಾರಿ ಹೊರುವ ಅಭಿಮನ್ಯು, ನಿಂತುಕೊಂಡೇ ನಿದ್ದೆ ಮಾಡುವ ಮೂಲಕ ತಾಲೀಮಿನ ಸುಸ್ತಿನಿಂದ ರಿಲ್ಯಾಕ್ಸ್ ಮಾಡುತ್ತಿದೆ. ಅದರ ವಿಡಿಯೋ ಇಲ್ಲಿದೆ.

ಜಂಬೂಸವಾರಿಯಲ್ಲಿ ಭಾಗವಹಿಸಲು ಸೆಪ್ಟೆಂಬರ್ 5 ರಂದು ಅರಮನೆ ಪ್ರವೇಶ ಮಾಡಿರುವ ಅಭಿಮನ್ಯು ನೇತೃತ್ವದ 8 ಗಜಪಡೆ, ಅರಮನೆ ಮುಂಭಾಗದ ಕೋಡಿ ಸೋಮೇಶ್ವರ ದೇವಾಲಯದ ಆವರಣದಲ್ಲಿರುವ ಆನೆ ಶೆಡ್​ಗಳಲ್ಲಿ ವಾಸ್ತವ್ಯ ಹೂಡಿವೆ. ಅದರಲ್ಲಿ ಈ ಬಾರಿಯೂ ಚಿನ್ನದ ಅಂಬಾರಿ ಹೊರುವ ಅಭಿಮನ್ಯು ಆನೆಗೆ ವಿಶೇಷವಾಗಿ ಪ್ರತ್ಯೇಕ ಶೆಡ್ ಅನ್ನು ಹಾಕಲಾಗಿದೆ. ಈ ಶೆಡ್​ಗೆ ಸಿಸಿಟಿವಿ ಕಣ್ಗಾವಲನ್ನು ಸಹ ಇಡಲಾಗಿದೆ. 

ಪ್ರತಿನಿತ್ಯ ಬೆಳಗ್ಗೆ 7 ಗಂಟೆಗೆ ಹಾಗೂ ಸಂಜೆ 6 ಗಂಟೆಗೆ ಅರಮನೆಯಿಂದ ತಾಲೀಮನ್ನು ಆರಂಭಿಸಿ, ಜಂಬೂಸವಾರಿ ಸಾಗುವ ರಾಜಮಾರ್ಗದಲ್ಲಿ 5 ಕಿಲೋ ಮೀಟರ್ ದೂರ ಇರುವ ಬನ್ನಿ ಮಂಟಪದವರೆಗೆ ತಾಲೀಮು ನಡೆಯುತ್ತೆ. ಪುನಃ ಅರಮನೆಗೆ ಆನೆಗಳು ವಾಪಸ್ ಆಗುತ್ತವೆ. ಅರಮನೆಯ ಶೆಡ್​ನಲ್ಲಿ ಗಜಪಡೆಗೆ ತಯಾರಾಗಿರುವ ವಿಶೇಷ ಆಹಾರವನ್ನು ತಿಂದು, ಸ್ನಾನ ಮಾಡಿಸಿಕೊಂಡು, ಶೆಡ್​​ಗೆ ಬಂದು ಆಯಾಸವನ್ನು ನೀಗಿಸಿಕೊಳ್ಳುವ ಅಭಿಮನ್ಯು ಆನೆ, ಶೆಡ್​ನಲ್ಲಿ ನಿಂತುಕೊಂಡೇ ನಿದ್ರೆ ಮಾಡುತ್ತದೆ. ಸುತ್ತಮುತ್ತ ಶಬ್ದವಾದರೆ ಒಂದು ಕಣ್ಣನ್ನು ತೆರೆದು ನೋಡಿ, ಪುನಃ ಕಣ್ಮುಚ್ಚಿ ಸುಖನಿದ್ರೆಗೆ ಅಭಿಮನ್ಯು ಜಾರುತ್ತಾನೆ.

ಇದನ್ನೂ ಓದಿ:Mysuru Dussehra: ದಸರಾ ಗಜಪಡೆ ತೂಕ ಪರೀಕ್ಷೆ.. ಕ್ಯಾಪ್ಟನ್ ಅಭಿಮನ್ಯುನೇ ಹೆಚ್ಚು ಬಲಶಾಲಿ