ಕೋವಿಡ್ ಮಹಾಮಾರಿ ಜಗತ್ತಿನ ಮೂಲೆ ಮೂಲೆಗಳನ್ನೂ ಕಾಡಿದೆ. ಖಂಡ ಖಂಡಗಳನ್ನು ದಾಟಿ ಆವರಿಸಿದ ಕೊರೊನಾ ವೈರಸ್ ಲಕ್ಷಾಂತರ ಜನರನ್ನು ಬಲಿ ತೆಗೆದುಕೊಂಡಿದೆ. ದಿನ ಕಳೆದಂತೆ ವೈರಸ್ ಅಟ್ಟಹಾಸ ಹತ್ತಿಕ್ಕಲು ಲಸಿಕೆಯೊಂದೇ ಮಾರ್ಗ ಎಂಬ ಸತ್ಯ ಎಲ್ಲ ದೇಶಗಳಿಗೂ ಈಗ ಅರಿವಾಗಿದೆ. ಈ ನಡುವೆ ವೈರಸ್ ಕುರಿತಂತೆ ಪಿತೂರಿ ಸಿದ್ಧಾಂತಗಳ ಬೆಳವಣಿಗೆಯೂ ಮಾರಕವಾಗಿ ಪರಿಣಮಿಸಿತ್ತು. ಇಂತಹ ಸಿದ್ಧಾಂತಗಳನ್ನು ವಯಸ್ಸಾದವರಿಗಿಂತ ಯುವಕರೇ ಹೆಚ್ಚಾಗಿ ನಂಬುತ್ತಾರೆ ಎಂಬುದು ಸಂಶೋಧನೆಯಿಂದ ತಿಳಿದುಬಂದಿದೆ.
ಪಿತೂರಿ ಸಿದ್ಧಾಂತಗಳ ಬಗ್ಗೆ ಯುವಕರ ನಂಬುವಿಕೆಯ ಬಗ್ಗೆ ಸಂಪೂರ್ಣವಾಗಿ ಅರ್ಥವಾಗುತ್ತಿಲ್ಲ. ಆದರೆ, ಕಾರಣಗಳು ಏನೇ ಇದ್ದರೂ ಕೂಡ ಪಿತೂರಿ ಸಿದ್ಧಾಂತಗಳಲ್ಲಿನ ನಂಬಿಕೆಯು ಬಹಳ ಹಾನಿಕಾರಕವಾಗಿದೆ. ಆದ್ದರಿಂದ ನಾವು ಈ ಬೆಳವಣಿಗೆಯನ್ನು ವಿರೋಧಿಸಬೇಕು ಎಂದು ಅಧ್ಯಯನವು ಹೇಳುತ್ತಿದೆ.
ಸಂಶೋಧನೆ: ಕೋವಿಡ್ ಪಿತೂರಿ ಸಿದ್ಧಾಂತಗಳ ಬಗ್ಗೆ ತಿಳಿಯಲು ಪ್ರಪಂಚದಾದ್ಯಂತದ 133 ಅಧ್ಯಯನಗಳ ಫಲಿತಾಂಶಗಳನ್ನು ಪರಿಗಣಿಸಲಾಗಿದೆ. ವಂಚನೆ, ಪಿತೂರಿ ಸಿದ್ಧಾಂತಗಳು ಇದರ ಭಾಗವಾಗಿದ್ದರೂ, ಈ ಸಂಶೋಧನೆಯು ಪಿತೂರಿ ನಂಬಿಕೆಗಳನ್ನು ಹೆಚ್ಚು ವಿಸ್ತೃತವಾಗಿ ವಿಶ್ಲೇಷಿಸಿದೆ. ಅಧ್ಯಯನದಲ್ಲಿನ ಅಂಶಗಳು ಕೋವಿಡ್ ಪಿತೂರಿ ಸಿದ್ಧಾಂತಗಳಲ್ಲಿ ಯುವಕರ ನಂಬಿಕೆ ಬಗ್ಗೆ ಹೇಳಿವೆ.
ಉದಾಹರಣೆಗೆ, ಮತಿವಿಕಲ್ಪದಂತಹ ಕೆಲವು ವ್ಯಕ್ತಿತ್ವದ ಲಕ್ಷಣಗಳು ಮತ್ತು ಕಡಿಮೆ ಮಟ್ಟದ ವಿಶ್ಲೇಷಣಾತ್ಮಕ ಹಾಗೂ ವೈಜ್ಞಾನಿಕ ಚಿಂತನೆಯಂತಹ ಅರಿವಿನ ಲಕ್ಷಣಗಳು ಈ ಪಿತೂರಿ ನಂಬಿಕೆಗಳಿಗೆ ಸಂಬಂಧಿಸಿವೆ. ಹೆಚ್ಚಿನ ಅಧ್ಯಯನಗಳು ವಯಸ್ಸಾದವರಿಗಿಂತ ಕಿರಿಯ ಜನರು ಕೋವಿಡ್ ಪಿತೂರಿ ಸಿದ್ಧಾಂತಗಳನ್ನು ನಂಬುವ ಸಾಧ್ಯತೆಯಿದೆ ಎಂಬುದನ್ನು ಹೇಳಿವೆ. ಸಾಮಾಜಿಕ ಮತ್ತು ಸಾಂಸ್ಕೃತಿಕ ಸಂದರ್ಭಗಳೂ ಕೂಡ ಇದಕ್ಕೆ ಒಂದು ಸಂಭವನೀಯ ಕಾರಣವಿರಬಹುದು.
ನಿರ್ದಿಷ್ಟವಾಗಿ ಹೇಳುವುದಾದರೆ, ಹಿಂದುಳಿದವರು, ಸರ್ಕಾರದ ಮೇಲೆ ಅಪನಂಬಿಕೆ ಹೊಂದಿರುವವರು ಮತ್ತು ತಮ್ಮ ಜೀವನದ ಮೇಲೆ ಕಡಿಮೆ ನಿಯಂತ್ರಣ ಹೊಂದಿರುವ ಜನರು ಪಿತೂರಿ ಸಿದ್ಧಾಂತಗಳನ್ನು ನಂಬುವ ಸಾಧ್ಯತೆಯಿದೆ. ಅದರಲ್ಲೂ ಯುವ ಜನರಿಗೆ ಇದು ಅನ್ವಯಿಸಬಹುದು, ಯಾಕೆಂದರೆ ಅವರು ಕಡಿಮೆ ಆದಾಯದಲ್ಲಿ ವಾಸಿಸುತ್ತಾರೆ ಎಂದು ಅಧ್ಯಯನ ತಿಳಿಸಿದೆ.