WHO ವಾರ್ನಿಂಗ್: ಹವಾಮಾನ ಬದಲಾವಣೆಯಿಂದ ಡೆಂಘೀ, ಚಿಕೂನ್‌ಗುನ್ಯಾ ಹೆಚ್ಚಳ!

ಹವಾಮಾನ ಬದಲಾವಣೆಯು ಜನರಲ್ಲಿ ತೀವ್ರ ಅನಾರೋಗ್ಯಕ್ಕೆ ಕಾರಣವಾಗುತ್ತಿದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆ ಹೇಳಿದೆ. ಹವಾಮಾನ ಬದಲಾವಣೆಯಿಂದ ಸೊಳ್ಳೆಜನ್ಯ ರೋಗಗಳಾದ ಡೆಂಘೀ, ಜಿಕಾ ಮತ್ತು ಚಿಕೂನ್‌ಗುನ್ಯಾ ರೋಗಗಳ ಹರಡುವಿಕೆ ಹೆಚ್ಚಾಗುತ್ತಿದೆ ಎಂದು ಅದು ತಿಳಿಸಿದೆ.

ನವದೆಹಲಿ : ಹವಾಮಾನ ಬದಲಾವಣೆಯ ಕಾರಣದಿಂದ ವಿಶ್ವದಲ್ಲಿ ಸೊಳ್ಳೆಜನ್ಯ ರೋಗಗಳಾದ ಡೆಂಘೀ, ಜಿಕಾ ಮತ್ತು ಚಿಕೂನ್‌ಗುನ್ಯಾ ರೋಗಗಳ ಹರಡುವಿಕೆ ಉಲ್ಬಣಗೊಳ್ಳುವ ಸಾಧ್ಯತೆಗಳಿವೆ ಎಂದು ವಿಶ್ವ ಆರೋಗ್ಯ ಸಂಸ್ಥೆ ಬುಧವಾರ ಎಚ್ಚರಿಕೆ ನೀಡಿದೆ. ಡೆಂಘೀ, ಝಿಕಾ ಮತ್ತು ಚಿಕೂನ್‌ಗುನ್ಯಾದಂಥ ಆರ್ಬೋವೈರಸ್‌ಗಳಿಂದ ಉಂಟಾಗುವ ಸೋಂಕು ರೋಗಗಳ ಪ್ರಮಾಣ ಇತ್ತೀಚಿನ ದಶಕಗಳಲ್ಲಿ ಪ್ರಪಂಚದಾದ್ಯಂತ ಗಮನಾರ್ಹವಾಗಿ ಬೆಳೆದಿದೆ. ವಿಶ್ವದ ಜನಸಂಖ್ಯೆಯ ಅರ್ಧದಷ್ಟು ಜನರು ಈಗ ಡೆಂಘೀ ತಗಲುವ ಅಪಾಯದಲ್ಲಿದ್ದಾರೆ ಮತ್ತು ಪ್ರತಿ ವರ್ಷ ಅಂದಾಜು 100 ರಿಂದ 400 ಮಿಲಿಯನ್ ಸೋಂಕುಗಳು ಸಂಭವಿಸುತ್ತವೆ. ಚಿಕೂನ್‌ಗುನ್ಯಾ ವೈರಸ್ (CHIKV) ಬಹುತೇಕ ಎಲ್ಲಾ ಖಂಡಗಳಲ್ಲಿ ಕಂಡುಬರುತ್ತದೆ ಮತ್ತು ಇಲ್ಲಿಯವರೆಗೆ 115 ದೇಶಗಳು ಪ್ರಸರಣವನ್ನು ವರದಿ ಮಾಡಿದೆ.

ಝಿಕಾ ವೈರಸ್ ರೋಗವು ಜಾಗತಿಕವಾಗಿ ಇಳಿಮುಖವಾಗಿದ್ದರೂ, ಇಲ್ಲಿಯವರೆಗೆ 89 ದೇಶಗಳು ಪ್ರಸ್ತುತ ಅಥವಾ ಈ ಹಿಂದೆ ಝಿಕಾ ವೈರಸ್ ಹರಡುವಿಕೆಯನ್ನು ಹೊಂದಿವೆ. ಸೊಳ್ಳೆಗಳಿಂದ ಜನರಿಗೆ ಹರಡುವ ಈ ರೋಗಗಳು ಪ್ರಪಂಚದಾದ್ಯಂತ ಹೆಚ್ಚುತ್ತಿರುವ ಅನಾರೋಗ್ಯಕ್ಕೆ ಕಾರಣವಾಗುತ್ತಿವೆ. ಹವಾಮಾನ ಬದಲಾವಣೆ, ಅರಣ್ಯನಾಶ ಮತ್ತು ನಗರೀಕರಣ ಮುಂತಾದ ಕಾರಣಗಳಿಂದ ಸೊಳ್ಳೆಗಳು ಹೊಸ ಪರಿಸರಕ್ಕೆ ಉತ್ತಮವಾಗಿ ಹೊಂದಿಕೊಳ್ಳಲು ಮತ್ತು ಭೌಗೋಳಿಕವಾಗಿ ಸೋಂಕು ಹರಡಲು ಅನುವು ಮಾಡಿಕೊಡುತ್ತಿವೆ.

ಜಾಗತಿಕವಾಗಿ ಆರ್ಬೋವೈರಸ್‌ಗಳ ಹರಡುವಿಕೆಯನ್ನು ತಡೆಗಟ್ಟಲು ಇದು ಅತ್ಯಂತ ಸೂಕ್ತ ಸಮಯವಾಗಿದೆ ಎಂದು ಡಬ್ಲ್ಯುಎಚ್‌ಒ ದ ನಿರ್ಲಕ್ಷಿತ ಉಷ್ಣವಲಯದ ಕಾಯಿಲೆಗಳ ನಿಯಂತ್ರಣದ ಜಾಗತಿಕ ಕಾರ್ಯಕ್ರಮದ ಘಟಕದ ಮುಖ್ಯಸ್ಥ ಡಾ ರಾಮನ್ ವೇಲಾಯುಧನ್ ಮಾಧ್ಯಮ ಸಂವಾದದಲ್ಲಿ ಹೇಳಿದರು. ಸುಮಾರು 129 ದೇಶಗಳು ಡೆಂಘೀ ಹರಡುವ ಅಪಾಯದಲ್ಲಿವೆ ಮತ್ತು 100 ಕ್ಕೂ ಹೆಚ್ಚು ದೇಶಗಳಲ್ಲಿ ಇದು ಸ್ಥಳೀಯವಾಗಿದೆ. 2000 ನೇ ಇಸ್ವಿಯಲ್ಲಿ ಸುಮಾರು ಅರ್ಧ ಮಿಲಿಯನ್ ಪ್ರಕರಣಗಳಿಂದ ಇದು 2019 ರಲ್ಲಿ 5.2 ಮಿಲಿಯನ್‌ಗೆ ಎಷ್ಟೋ ಒಟ್ಟು ಬೆಳೆದಿದೆ ಎಂದು ವೇಲಾಯುಧನ್ ಹೇಳಿದರು.

ಹೀಗೆ ಸೋಂಕು ಹರಡುವಿಕೆಯ ಪ್ರವೃತ್ತಿಯು 2023 ರಲ್ಲಿ ಮುಂದುವರಿಯುತ್ತಿದೆ. ಮಾರ್ಚ್ 2023 ರ ಅಂತ್ಯದವರೆಗೆ 4,41,898 ಡೆಂಘೀ ಪ್ರಕರಣಗಳು ಮತ್ತು 119 ಸಾವುಗಳು ವರದಿಯಾಗಿವೆ. ಹವಾಮಾನ ಬದಲಾವಣೆಯು ದಕ್ಷಿಣಕ್ಕೆ ವೆಕ್ಟರ್ ಸೊಳ್ಳೆಗಳ ಹರಡುವಿಕೆಯನ್ನು ಸುಗಮಗೊಳಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿರುವುದು ನಿಜವಾಗಿಯೂ ಆತಂಕಕಾರಿಯಾಗಿದೆ ಮತ್ತು ನಂತರ ಜನರು ಪ್ರಯಾಣಿಸಿದಾಗ ವೈರಸ್​ ನೈಸರ್ಗಿಕವಾಗಿಯೇ ಅವರೊಂದಿಗೆ ಚಲಿಸುತ್ತದೆ ಎಂದು ಅವರು ಹೇಳಿದರು.

ಜನರ ಚಲನೆ, ನಗರೀಕರಣ ಮತ್ತು ನೀರು ಮತ್ತು ನೈರ್ಮಲ್ಯಕ್ಕೆ ಸಂಬಂಧಿಸಿದ ಸಮಸ್ಯೆಗಳು ಹೊಸ ಪ್ರದೇಶಗಳಿಗೆ ವೈರಸ್​ಗಳ ನಿರಂತರ ಹರಡುವಿಕೆಗೆ ಕಾರಣವಾಗುವ ಅಂಶಗಳಾಗಿವೆ ಎಂದು ವೇಲಾಯುಧನ್ ಮಾಹಿತಿ ನೀಡಿದರು. ಹವಾಮಾನ ಬದಲಾವಣೆಯ ವಿಷಯದಲ್ಲಿ ನೋಡುವುದಾದರೆ ನಿಸ್ಸಂಶಯವಾಗಿ ಹೆಚ್ಚಿದ ಮಳೆ, ಹೆಚ್ಚಿನ ತಾಪಮಾನ, ಹೆಚ್ಚಿನ ಆರ್ದ್ರತೆಯು ಸೊಳ್ಳೆಗಳಿಗೆ ಅನುಕೂಲಕರವಾಗಿದೆ ಎಂದು ಅವರು ಹೇಳಿದರು. ವಿಶ್ವ ಆರೋಗ್ಯ ಸಂಸ್ಥೆಯ ಚಿಕೂನ್‌ಗುನ್ಯಾ ಮತ್ತು ಝೀಕಾ ವಿಭಾಗದ ತಾಂತ್ರಿಕ ಮುಖ್ಯಸ್ಥೆ ಡಯಾನಾ ರೋಜಾಸ್ ಅಲ್ವಾರೆಜ್ ಮಾತನಾಡಿ, ಹೊಸ ಪ್ರದೇಶಗಳಲ್ಲಿ ಸೊಳ್ಳೆಗಳ ಹರಡುವಿಕೆಯನ್ನು ನಿಯಂತ್ರಿಸಲು ತುರ್ತು ಕ್ರಮ ಕೈಗೊಳ್ಳುವುದು ಅಗತ್ಯ ಎಂದರು.

ಇದನ್ನೂ ಓದಿ : ವ್ಯಕ್ತಿಯ ಪ್ರಾಣಕ್ಕೆ ಕುತ್ತು ತಂದ ಸೊಳ್ಳೆ; 30 ಸರ್ಜರಿ, ನಾಲ್ಕು ಬಾರಿ ಕೋಮಾ ಸ್ಥಿತಿ!