ನವದೆಹಲಿ: ದ್ವಿಚಕ್ರ ವಾಹನ ಚಾಲನೆ ವೇಳೆ ಹೆಲ್ಮೆಟ್ ಧರಿಸುವುದು ಕಡ್ಡಾಯ. ಇದು ಕೇವಲ ಸಂಚಾರಿ ನಿಯಮವಲ್ಲ. ಇದು ಅಪಘಾತದಿಂದ ಸವಾರನ ರಕ್ಷಣೆ ಮಾಡುವ ಸಾಧನವೂ ಆಗಿದೆ. ಆದರೆ, ದೀರ್ಘ ಕಾಲದ ಹೆಲ್ಮೆಟ್ ಧರಿಸುವುದರಿಂದ ಕೂದಲಿನ ಸಮಸ್ಯೆ ಕಾಡದೆ ಇರಲಾರದು. ಈ ಕುರಿತು ಎಸ್ ಎನ್ ಮೆಡಿಕಲ್ ಕಾಲೇಜಿನ ವೈದ್ಯರು ಮಾತನಾಡಿದ್ದಾರೆ.
ದ್ವಿಚಕ್ರ ಸವಾರರಿಗೆ ಹೆಲ್ಮೆಟ್ ಅತ್ಯವಶ್ಯಕವಾಗಿದೆ. ಇದು ಸುರಕ್ಷ ಸಾಧನವಾಗಿದೆ. ಆದರೆ, ದೀರ್ಘ ಕಾಲ ಹೆಲ್ಮೆಟ್ ಧರಿಸುವುದು ಕೂದಲು ತುಂಡಾಗಲು ಕಾರಣವಾಗಬಹುದು. ಕೆಲವು ಪ್ರಕರಣದಲ್ಲಿ ಇದು ಹೇರ್ ಟ್ರಾಮಗೆ ಕೂಡ ಕಾರಣವಾಗಿದೆ. ಈ ರೀತಿಯ ಐದರಿಂದ ಆರು ಪ್ರಕರಣಗಳು ಎಸ್ಎನ್ ಮೆಡಿಕಲ್ ಕಾಲೇಜಿನ ಚರ್ಮ ಮತ್ತು ಚರ್ಮ ಸಂಬಂಧಿ ಸಮಸ್ಯೆಗಳ ವಿಭಾಗ ಒಪಿಡಿಯಲ್ಲಿ ಕಾಣಸಿಗುತ್ತಿದೆ. ರೋಗಿಗಳು ದಿಢೀರ್ ಎಂದು ತಮ್ಮ ಕೂದಲು ಬೆಳವಣಿಗೆಯಾಗುವುದು ನಿಂತು ಹೋಗಿದೆ ಎಂದು ದೂರಿದ್ದಾರೆ. ರೋಗಿಗಳ ಇತಿಹಾಸ ಕೇಳಿದಾಗ ಹೆಚ್ಚು ಹೆಲ್ಮೆಟ್ ಧರಿಸುವುದರಿಂದ ಅವರಲ್ಲಿ ಕೂದಲು ನಷ್ಟದ ಸಮಸ್ಯೆ ಕಂಡು ಬಂದಿದೆ ಎಂದಿದ್ದಾರೆ.
ಹೆಚ್ಚುತ್ತಿರುವ ಸಮಸ್ಯೆ: ಪ್ರತಿ ದಿನ ಈ ರೀತಿಯ ಪ್ರಕರಣಗಳು ಒಪಿಡಿಗೆ ಬರುತ್ತಿವೆ. ಕೂದಲು ಉದುರಿ ತಮ್ಮ ಭುಜದ ಮೇಲೆ ಬೀಳುತ್ತಿರುವುದಾಗಿ ರೋಗಿಗಳು ತಿಳಿಸಿದ್ದಾರೆ. ಸ್ನಾನ ಮಾಡುವಾಗ ಹೆಚ್ಚು ಕೂದಲು ತುಂಡಾಗುತ್ತಿವೆ ಎಂದು ಅಲವತ್ತುಕೊಂಡಿದ್ದಾರೆ. ದಿನಕ್ಕೆ 40 ಕಿ.ಮೀ ಅಥವಾ ಅದಕ್ಕಿಂತ ಹೆಚ್ಚು ದೂರವನ್ನು ದ್ವಿಚಕ್ರದಲ್ಲಿ ಸಾಗುವ ಸವಾರರಲ್ಲಿ ಈ ಸಮಸ್ಯೆ ಕಂಡು ಬರುತ್ತದೆ. ಹಾಗೆಂದ ಮಾತ್ರಕ್ಕೆ ಹೆಲ್ಮೆಟ್ ಧರಿಸದಿರಲು ಸಾಧ್ಯವಿಲ್ಲ. ಹೆಲ್ಮೆಟ್ ಧರಿಸುವುದು ಜೀವ ರಕ್ಷಣೆಗೆ ಎಂದಿದ್ದಾರೆ.
30 ರಿಂದ 45 ವರ್ಷದವರಲ್ಲಿ ಸಮಸ್ಯೆ: ವೈದ್ಯ ಯತೀಂದ್ರ ಸಿಂಗ್ ಚಹರ್ ವಿವರಿಸುವಂತೆ, ಶೇ 80ರಷ್ಟು ರೋಗಿಗಳಲ್ಲಿ ಕೂದಲು ನಷ್ಟ, ಕೂದಲು ತುಂಡಾಗುವುದು ಅಥವಾ ತೆಳುವಾಗುವುದು ಸಾಮಾನ್ಯ. ಅದರಲ್ಲೂ 30 ರಿಂದ 45 ವರ್ಷದವರಲ್ಲಿ ಹೆಚ್ಚು. ಈ ಸಮಸ್ಯೆ ಯುವಕರು, ಸೇಲ್ಸ್ ಮ್ಯಾನ್ ಮತ್ತಿತರರಲ್ಲಿ ಹೆಚ್ಚಿದೆ. ಹೆಲ್ಮೆಟ್ ಧರಿಸುವುದರಿಂದ ಕೂದಲಿನ ಮಧ್ಯ ಭಾಗದಲ್ಲಿ ಹೆಚ್ಚು ಅಥವಾ ಬುಡದಲ್ಲಿ ಹೆಚ್ಚು ತುಂಡಾಗುತ್ತದೆ. ಇದರಿಂದ ಕೂದಲಿನ ಕಾಂಡಕ್ಕೆ ಹಾನಿಯಾಗುತ್ತದೆ. ಇದು ಟ್ರಾಮಕ್ಕೆ ಕಾರಣವಾಗುತ್ತದೆ.