ನಾವು ಧರಿಸುವ ಬಟ್ಟೆಗಳಿಂದಲೂ ಭೂಮಿಯ ಸಂರಕ್ಷಣೆ: ಹೇಗೆ ಗೊತ್ತೇ?

ತೊಡುವ ಬಟ್ಟೆಗಳು ಪರಿಸರಕ್ಕೆ ಪೂರಕವಾಗಿರಬೇಕೇ ಹೊರತು ಮಾರಕವಲ್ಲ. ಫ್ಯಾಷನ್​ ನೆಪದಲ್ಲಿ ಪ್ರಾಣಿಗಳನ್ನು ಕೊಂದು ಅದರ ತುಪ್ಪಳದಿಂದ ಬಟ್ಟೆ ತಯಾರಿಸುವುದರಿಂದ ಭೂಮಿಗೆ ಹಾನಿಯೇ ಹೆಚ್ಚು.

ವ್ಯಕ್ತಿತ್ವದ ವಿಚಾರದಲ್ಲಿ ಹಲವು ಬಾರಿ ಬಟ್ಟೆಗಳು ಕೂಡ ಪ್ರಮುಖವಾಗುತ್ತವೆ. ಬಟ್ಟೆಗಳು ದೇಹದ ಅಂದ ಮಾತ್ರವಲ್ಲ, ಆತ್ಮವಿಶ್ವಾಸವನ್ನೂ ಹೆಚ್ಚಿಸುತ್ತವೆ. ಇದೇ ಬಟ್ಟೆಗಳಿಂದ ನಮ್ಮ ಭೂಮಿಯ ರಕ್ಷಣೆಯೂ ಸಾಧ್ಯವಿದೆ. ಸರಿಯಾದ ಬಟ್ಟೆಗಳನ್ನು ಆಯ್ಕೆ ಮಾಡುವ ಮೂಲಕ ನಮ್ಮ ಭೂಮಿಯನ್ನು ಸಂರಕ್ಷಿಸಬಹುದು.

ಚರ್ಮದ ಉತ್ಪನ್ನಗಳ ತೊರೆಯುವಿಕೆ: ಫ್ಯಾಷನ್​ ಬಟ್ಟೆಗಳ ವಿಚಾರದಲ್ಲಿ ಪ್ರಾಣಿಗಳ ಚರ್ಮಗಳ ಬಳಕೆಯಾಗುತ್ತಿರುವುದು ಹೊಸ ವಿಚಾರವಲ್ಲ. ಈ ಬಗ್ಗೆ ಈಗಾಗಲೇ ಅನೇಕರು ಧ್ವನಿ ಎತ್ತಿದ್ದಾರೆ. ಕಳೆದ ವರ್ಷ ನಟಿ ಸೋನಾಕ್ಷಿ ಸಿನ್ಹಾ ಪೆಟಾ ಇಂಡಿಯಾ ಜೊತೆ ಕೈ ಜೋಡಿಸಿ, ಬಟ್ಟೆಗಳ ತಯಾರಿಕೆಯಲ್ಲಿ ಬಳಕೆ ಮಾಡುವಂತಹ ಚರ್ಮ (ಲೆದರ್​) ತ್ಯಜಿಸುವಂತೆ ತಮ್ಮ ಅಭಿಮಾನಿಗಳಿಗೆ ಕರೆ ನೀಡಿದ್ದರು. ಇದಕ್ಕೂ ಮೊದಲು ಮಿಲಿಂದ್​, ಸೋಮನ್​ ಮತ್ತು ಅಂಕಿತಾ ಕೊನ್ವರ್​ ಕೂಡ FDCI x Lakme ಅಲ್ಲಿ ಲೆಥರ್​ ಫ್ರೀ ಸಸ್ಟೈನಬಲ್​ ಫ್ಯಾಶನ್​ ವೀಕ್​ನಲ್ಲಿ ಹೆಜ್ಜೆ ಹಾಕಿದ್ದರು. 2017ರಲ್ಲಿ ಪ್ರಕಟವಾದ ಫ್ಯಾಶನ್​ ಇಂಡಸ್ಟ್ರಿ ಪಲ್ಸ್​ ವರದಿಯಲ್ಲಿ ಫ್ಯಾಷನ್​ ಶೋದಲ್ಲಿ ಬಳಕೆಯಾಗುತ್ತಿರುವ ಹಸುವಿನ ಚರ್ಮದ ಉತ್ಪನ್ನ ಪರಿಸರದ ಮಾಲಿನ್ಯಕ್ಕೆ ಕಾರಣವಾಗಿದೆ. ಜೊತೆಗೆ, ರೇಷ್ಮೆ ಮತ್ತು ಉಣ್ಣೆ ಕೂಡ ಈ ಪಟ್ಟಿಯಲ್ಲಿ ಸೇರಿದೆ ಎಂದು ತಿಳಿಸಿತ್ತು.

ಚರ್ಮದ ಬಳಕೆಯಿಂದ ಆಗುವ ಪರಿಣಾಮವೇನು?:ಫ್ಯಾಷನ್​ಗೆ ಬಳಕೆಯಾಗುವ ಲೆದರ್​ ಅನ್ನು ಕೊಳೆಯದಂತೆ ಮಾಡಲು ಅದಕ್ಕೆ ರಾಸಾಯನಿಕ ಬಳಕೆ ಮಾಡಲಾಗುತ್ತದೆ. ಹಸು, ಎಮ್ಮೆ, ಹಂದಿ, ಆಡು, ಕುರಿ, ಆಸ್ಟ್ರೀಚ್, ಕಾಂಗರೂ, ನಾಯಿ, ಬೆಕ್ಕು, ಮೊಸಳೆ ಮತ್ತಿತ್ತರ ಪ್ರಾಣಿಗಳ ಚರ್ಮವನ್ನು ಫ್ಯಾಷನ್​ಗೆ ಬಳಕೆ ಮಾಡಲಾಗುವುದು. ಈ ಪ್ರಾಣಿಗಳ ಚರ್ಮ ಹಾಳಾಗದಂತೆ ದೀರ್ಘಕಾಲ ಉಪಯೋಗಕ್ಕೆ ಬರಲು ಅದಕ್ಕೆ ಸೋಪ್​ನಂತಹ ಹಾನಿಕಾರಕಗಳನ್ನು ಬಳಕೆ ಮಾಡುತ್ತಾರೆ. ಇದು ಮಣ್ಣು ಮತ್ತು ಅಂತರ್ಜಲ, ನದಿ ಮತ್ತಿತರ ಜಲಮೂಲಗಳಿಗೆ ಸೇರುವ ಮೂಲಕ ಪರಿಸರ ಮಾಲಿನ್ಯವಾಗುತ್ತದೆ. ಚರ್ಮಗಳ ಉತ್ಪನ್ನಗಳ ಟ್ಯಾನರಿ ಕೆಲಸ ಮಾಡುವವರು ವಿವಿಧ ರಾಸಾಯನಿಕ ಜೊತೆ ಕೆಲಸ ಮಾಡುವುದರಿಂದ ಅವರಿಗೂ ಕ್ಯಾನ್ಸರ್​ ತಗಲುವ ಅಪಾಯ ಇರುತ್ತದೆ.

ಇಂತಹ ಟ್ಯಾನರಿ ರಾಸಾಯನಿಕ ಕಾರ್ಯದಿಂದಾಗಿ ದಕ್ಷಿಣ ಭಾರತದ ಪಾಲಾರ್​ ನದಿ ಕಲುಷಿತಗೊಂಡಿದ್ದು, ಇದು ಕೊಳಕಾಗಿದೆ ಎಂದು ವರದಿಗಳು ತಿಳಿಸಿದ್ದವು. ಇನ್ನು ಉತ್ತರ ಪ್ರದೇಶದ ಕಾನ್ಫುರ್​ ಮತ್ತು ಉನ್ನಾವೊ ಪ್ರದೇಶದಲ್ಲಿ ಈ ರೀತಿಯ ಸುಮಾರು 250 ಚರ್ಮೋದ್ಯಮಗಳಿದ್ದು, ಇದರ ರಾಸಾಯನಿಕಗಳು ನೇರವಾಗಿ ಗಂಗಾ ನದಿ ಸೇರುತ್ತಿದ್ದು ಕಲುಷಿತಗೊಂಡಿದೆ.

ಪ್ರಾಣಿಗಳ ಸಂತಾನೋತ್ಪತ್ತಿ, ಸಾಗಾಣಿಕೆ ಮತ್ತು ವಧೆ ಬಳಿಕ ಆ ಚರ್ಮಗಳನ್ನು ಫ್ಯಾಷನ್​ಗಳಲ್ಲಿ ಬಳಕೆ ಮಾಡುವುದಕ್ಕೆ ಬೃಹತ್​ ಪ್ರಮಾಣದಲ್ಲಿ ನೀರು, ಭೂಮಿ ಮತ್ತು ಪಳೆಯುಳಿಕೆ ಇಂಧನ ಬೇಕಾಗುತ್ತದೆ. ಇದರ ಪರಿಣಾಮ ವಾತಾವರಣದ ಮೇಲೆ ಆಗುತ್ತದೆ. ಹೈನುಗಾರಿಕೆಯ ಉದ್ಯಮದಿಂದಾಗಿ (ಲೆದರ್​ ನಿರ್ಮಾಣ) ಭೂಮಿ ಮೇಲೆ ಹಸಿರು ಮನೆ ಪರಿಣಾಮ ಉಂಟಾಗುತ್ತಿದೆ. ಕಸಾಯಿಖಾನೆಯ ಕಾರ್ಯಚಟುವಟಿಕೆಗಳು ಯುಟ್ರೋಫಿಕೇಶನ್​ಗೆ ಕಾರಣವಾಗುತ್ತದೆ. ಪ್ರಾಣಿಗಳ ತ್ಯಾಜ್ಯದಿಂದ ವಾತಾವರಣದಲ್ಲಿನ ಆಮ್ಲಜನಕ ಪ್ರಮಾಣ ಕಡಿಮೆಯಾಗಿ, ಪ್ರಾಣಿಗಳ ಉಸಿರುಗಟ್ಟುವಿಕೆಗೆ ಕಾರಣವಾಗುತ್ತದೆ.

ಪರಿಸರ ಸಂರಕ್ಷಣೆ ಕೈ ಜೋಡಿಸಬೇಕಿದೆ: ಕೆಲ ಪರಿಸರ ಕಾಳಜಿ ಹೊಂದಿರುವ ಫ್ಯಾಷನ್​ ಡಿಸೈನರ್​ಗಳು ತಮ್ಮ ಫ್ಯಾಷನ್​ನಲ್ಲಿ ಪ್ರಾಣಿಗಳ ಚರ್ಮವಲ್ಲದ ಲೆದರ್​ ಬಳಕೆ ಮಾಡುವ ಮೂಲಕ ಪರಿಸರದ ಮೇಲೆ ಆಗುವ ಪರಿಣಾಮ ಕಡಿಮೆ ಮಾಡುತ್ತಿದ್ದಾರೆ. ಪೇಟಾ ಇಂಡಿಯಾ ಮತ್ತು ಲಾಕ್ಮೆ ಫ್ಯಾಷನ್​ ವೀಕ್​ ಈ ಸಂಬಂಧ ಅನೇಕ ಭಾರತದ ಫ್ಯಾಷನ್​ ಡಿಸೈನರ್​ಗಳನ್ನು ಭೇಟಿಯಾಗಿ ಪರಿಸರದ ಮೇಲೆ ಆಗುತ್ತಿರುವ ಪರಿಣಾಮ ತಿಳಿಸಿದ್ದಾರೆ. ಇದರ ಪರಿಣಾಮವಾಗಿ 33 ವಿನ್ಯಾಸಕರು ಪ್ರಾಣಿ ಉತ್ಪನ್ನದ ಬಳಕೆಯನ್ನು ಕೈ ಬಿಟ್ಟಿದ್ದಾರೆ. ಇನ್ನು ಕೆಲವು ಡಿಸೈನರ್​ಗಳು ಅನಾನಸ್ ಎಲೆಗಳು, ಕಾರ್ಕ್, ಹಣ್ಣಿನ ತ್ಯಾಜ್ಯ, ಮರುಬಳಕೆಯ ಪ್ಲಾಸ್ಟಿಕ್‌ಗಳು, ಅಣಬೆಗಳು, ಹಿಪ್ಪುನೇರಳೆ ಎಲೆಗಳು, ತೆಂಗಿನ ತ್ಯಾಜ್ಯಗಳ ಬಳಕೆಯನ್ನು ತಮ್ಮ ಫ್ಯಾಷನ್​ ಧಿರಿಸಿನಲ್ಲಿ ಪ್ರಯೋಗ ಮಾಡಲು ಮುಂದಾದರು.

ಮಾರ್ಚ್​ 22ರಂದು ವಿಶ್ವ ನೀರಿನ ದಿನ ಆಚರಣೆ ಮಾಡುತ್ತಿದ್ದು, ನೀರಿನ ಸಂರಕ್ಷಣೆಗೆ ಮುಂದಾಗಬೇಕಿದೆ. ಸ್ನಾನ ಮಾಡುವಾಗ, ಪಾತ್ರ ಸೇರಿದಂತೆ ಮನೆಗೆಲಸದಲ್ಲಿ ಅನಗತ್ಯ ನೀರಿನ ಬಳಕೆ ಮಾಡದೆ ಅದನ್ನು ಉಳಿಸಬೇಕಿದೆ. ನಮ್ಮ ಬಟ್ಟೆ ಬೀರುಗಳಲ್ಲಿ ಕೂಡ ಹಸಿರಿನ ಹೆಚ್ಚಳಕ್ಕೆ ಕಾರಣವಾಗುವ ಬಟ್ಟೆಗಳನ್ನು ಜೋಡಿಸಬೇಕಿರುವುದು ಅವಶ್ಯವಾಗಿದೆ.

ಇದನ್ನೂ ಓದಿ: ಪರೋಕ್ಷ ಧೂಮಪಾನಿಗಳಲ್ಲಿ ಕೊರೊನಾ ಸೋಂಕಿನ ಅಪಾಯ ಹೆಚ್ಚು