ಮೆಸ್ಸಾಚ್ಯೂಸೆಟ್ ( ಅಮೆರಿಕ): ಸೆಪ್ಸಿಸ್ ಎನ್ನುವುದು ಜೀವಕ್ಕೆ ಅಪಾಯಕಾರಿ ಸ್ಥಿತಿಯಾಗಿದ್ದು, ಸೋಂಕಿನ ವಿರುದ್ಧ ದೇಹವು ಅತಿಯಾಗಿ ಪ್ರತಿಕ್ರಿಯಿಸುವುದರಿಂದ ಈ ಹಾನಿ ಉಂಟಾಗುತ್ತದೆ. ಇದು ತನ್ನದೇ ಆದ ಅಂಗಾಂಶಗಳು ಮತ್ತು ಅಂಗಗಳನ್ನು ಗಾಯಗೊಳಿಸುತ್ತದೆ ಎನ್ನುವುದು ಆತಂಕಕಾರಿ ವಿಷಯವಾಗಿದೆ. ಸೆಪ್ಸಿಸ್ ಮೊದಲ ಬಾರಿಗೆ ಅಂದರೆ 2,700 ವರ್ಷಗಳ ಹಿಂದೆ ಗ್ರೀಕ್ ಕವಿ ಹೋಮರ್ ಉಲ್ಲೇಖಿಸಿದ್ದ. ಇದು 'ಸೆಪೋ' ಎಂಬ ಪದದಿಂದ ಬಂದಿದ್ದು, ಇದರ ಅರ್ಥ ನಾನು ಕೊಳೆಯುತ್ತೇನೆ ಎಂಬುದಾಗಿದೆ.
ಸೆಪ್ಸಿಸ್‌ನ ಹಿಂದಿನ ರೋಗನಿರೋಧಕ ಕಾರ್ಯವಿಧಾನಗಳನ್ನು ಅರ್ಥಮಾಡಿಕೊಳ್ಳುವಲ್ಲಿ ಸುಧಾರಣೆಗಳ ಹೊರತಾಗಿಯೂ, ಪ್ರಮುಖ ವೈದ್ಯಕೀಯ ಕಾಳಜಿಯಾಗಿಯೇ ಉಳಿದಿದೆ. ಅಮೆರಿಕದಲ್ಲಿ 750,000 ಜನರು ಮತ್ತು ಪ್ರತಿ ವರ್ಷ ಜಾಗತಿಕವಾಗಿ ಸುಮಾರು 50 ಮಿಲಿಯನ್ ಜನರ ಮೇಲೆ ಇದು ಪರಿಣಾಮ ಬೀರುತ್ತದೆ. ಸೆಪ್ಸಿಸ್ 2017 ರಲ್ಲಿ ವಿಶ್ವಾದ್ಯಂತ 11 ಮಿಲಿಯನ್ ಸಾವುಗಳಿಗೆ ಕಾರಣವಾಗಿದೆ ಎಂಬುದು ಗಮನಾರ್ಹ ಅಂಶವಾಗಿದೆ. ಅಮೆರಿಕದಲ್ಲಿ ಇದು ಅತ್ಯಂತ ದುಬಾರಿ ವೈದ್ಯಕೀಯ ಚಿಕಿತ್ಸೆ ಆಗಿದೆ. ವಾರ್ಷಿಕವಾಗಿ ಹತ್ತಾರು ಶತಕೋಟಿ ಡಾಲರ್‌ಗಳಷ್ಟು ಈ ಸೆಪ್ಸಿಸ್ ನಿವಾರಣೆಗೆ ವೆಚ್ಚವಾಗುತ್ತದೆ.
ಸೋಂಕಿನ ಸಮಯದಲ್ಲಿ ಕೆಲವು ವಿಧದ ಬ್ಯಾಕ್ಟೀರಿಯಾಗಳು ಅಂಗಾಂಶದೊಂದಿಗೆ ಹೇಗೆ ಹೋರಾಡುತ್ತವೆ ಎಂಬುದರ ಕುರಿತು ಸಂಶೋಧಕರು ಅಧ್ಯಯನ ನಡೆಸಿದ್ದಾರೆ. ಅತಿಯಾಗಿ ಪ್ರತಿಕ್ರಿಯಾತ್ಮಕ ಪ್ರತಿರಕ್ಷಣಾ ವ್ಯವಸ್ಥೆಯು ಸೆಪ್ಸಿಸ್‌ನಂತಹ ಹಾನಿಕಾರಕ ಮತ್ತು ಮಾರಕ ಪರಿಣಾಮಗಳಿಗೆ ಹೇಗೆ ಕಾರಣವಾಗಬಹುದು ಎಂಬುದನ್ನು ತಿಳಿಯಲು ಈ ಸಂಶೋಧನೆ ನಡೆಸಲಾಗಿದ್ದು, ಸೆಪ್ಸಿಸ್ಗೆ ಕಾರಣ ಏನು ಎಂಬುದನ್ನು ಕಂಡುಕೊಳ್ಳಲಾಗಿದೆ. ಸೆಪ್ಸಿಸ್‌ನಿಂದ ಸಾವನ್ನು ಪ್ರಚೋದಿಸುವ ಜೀವಕೋಶಗಳು ಮತ್ತು ಅಣುಗಳು ಪತ್ತೆಯಾಗಿದೆ ಎಂದು ಅಧ್ಯಯನ ತಿಳಿಸಿದೆ.
ಟಿಎನ್ಎಫ್ನಲ್ಲಿ ಸ್ವಯಂ ನಿರೋಧಕತೆ ಮತ್ತು ಸೆಪ್ಸಿಸ್:ಪ್ರತಿರಕ್ಷಣಾ ಕೋಶಗಳು ಆಕ್ರಮಣಕಾರಿ ರೋಗಕಾರಕದ ಅಂಶಗಳನ್ನು ಗುರುತಿಸಿದಾಗ ಸೋಂಕಿನ ದೇಹದ ಪ್ರತಿಕ್ರಿಯೆಯು ಪ್ರಾರಂಭವಾಗುತ್ತದೆ. ಈ ಜೀವಕೋಶಗಳು ನಂತರ ಸೋಂಕು ತೊಡೆದು ಹಾಕಲು ಸಹಾಯ ಮಾಡುವ ಸೈಟೊಕಿನ್‌ಗಳಂತಹ ಅಣುಗಳನ್ನು ಬಿಡುಗಡೆ ಮಾಡುತ್ತವೆ. ಸೈಟೊಕಿನ್‌ಗಳು ಸಣ್ಣ ಪ್ರೊಟೀನ್‌ಗಳ ಒಂದು ವಿಶಾಲ ಗುಂಪಾಗಿದ್ದು, ಸೋಂಕು ಅಥವಾ ಗಾಯದ ಸ್ಥಳಕ್ಕೆ ಇತರ ಪ್ರತಿರಕ್ಷಣಾ ಕೋಶಗಳನ್ನು ನೇಮಿಸಿಕೊಳ್ಳುತ್ತವೆ.