ಯುವ ಜನತೆ ಕಾಡುತ್ತಿರುವ ಪಾರ್ಶ್ವವಾಯು: ಏಮ್ಸ್​ ಅಂಕಿ ಅಂಶದಲ್ಲಿ ಆಘಾತಕಾರಿ ಅಂಶ ಬಯಲು

ಬದಲಾಗುತ್ತಿರುವ ಜೀವನಶೈಲಿಯಲ್ಲಿ ರಕ್ತದ ಒತ್ತಡ ಪ್ರಕರಣಗಳು ಯುವ ಜನತೆಯಲ್ಲಿ ಕಂಡು ಬರುತ್ತಿದ್ದು, ಇವು ಮಿದುಳಿನ ಪಾರ್ಶ್ವವಾಯುಗೆ ಕಾರಣವಾಗುತ್ತಿದೆ.

ಹೈದರಾಬಾದ್​: ಪಾರ್ಶ್ವವಾಯು ಎಂದರೆ ಸಾಮಾನ್ಯವಾಗಿ ಹಿರಿಯರನ್ನು ಕಾಡುವ ಸಮಸ್ಯೆ ಎಂದು ಭಾವಿಸುತ್ತೇವೆ. ಆದರೆ, ಇಂದು ಈ ಸಮಸ್ಯೆ ಯುವ ಜನತೆಯನ್ನು ಕಾಡುತ್ತಿರುವುದು ಆತಂಕಕಾರಿ ಬೆಳವಣಿಗೆಯಾಗಿದೆ. ಈ ಕುರಿತು ಅನೇಕ ವರದಿಗಳು ಆಗುತ್ತಿದ್ದು, ಇತ್ತೀಚಿನ ದೆಹಲಿ ಏಮ್ಸ್​ ಬಿಡುಗಡೆ ಮಾಡಿದ ಅಂಕಿ - ಅಂಶಗಳು ಮತ್ತಷ್ಟು ಚಿಂತಿಸುವಂತೆ ಮಾಡಿದೆ.

ವರದಿ ಪ್ರಕಾರ, ಏಮ್ಸ್​ನಲ್ಲಿ 100ರಲ್ಲಿ ಎರಡು ಬ್ರೈನ್ಸ್​ ಸ್ಟ್ರೋಕ್​ ಪ್ರಕರಣಗಳು 20 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರಲ್ಲಿ ಕಂಡು ಬರುತ್ತಿದೆ. ಅಲ್ಲದೇ ಪಾರ್ಶ್ವವಾಯುಗೆ ತುತ್ತಾದ 300ರಲ್ಲಿ 77 ಮಂದಿ 21ರಿಂದ 45 ವರ್ಷದ ಒಳಗಿನವರಾಗಿದ್ದಾರೆ. ಶೇ 25ರಷ್ಟು ಯುವ ಜನತೆ ಈ ಪಾರ್ಶ್ವವಾಯುಗೆ ಗುರಿಯಾಗುತ್ತಿದ್ದಾರೆ. ತೆಲಂಗಾಣದ ನಿಮ್ಸ್​​, ಗಾಂಧಿ ಮತ್ತು ಉಸ್ಮಾನಿಯಾ ಆಸ್ಪತ್ರೆಗಳಿಂದ ಬರುತ್ತಿರುವ ಇಂತಹ ಪ್ರಕರಣದಲ್ಲಿ 40 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ರೋಗಿಗಳು ಕಂಡು ಬರುತ್ತಿದ್ದಾರೆ. ಶೇ 15ರಷ್ಟು ರೋಗಿಗಳು ಯುವ ವಯುಸ್ಸಿನವರಾಗಿದ್ದಾರೆ. ಈ ಪಾರ್ಶ್ವವಾಯುವಿನಿಂದ ಶೇ 30ರಷ್ಟು ರೋಗಿಗಳು ಶಾಶ್ವತವಾಗಿ ಅಂಗವೈಕಲ್ಯತೆಗೆ ಗುರಿಯಾಗುತ್ತಿದ್ದಾರೆ.

ಬ್ರೈನ್​​ ಸ್ಟ್ರೋಕ್ ಕಾರಣ:ಅಧಿಕ ರಕ್ತದೊತ್ತಡವೂ ಬ್ರೈನ್​​ ಸ್ಟ್ರೋಕ್​ಗೆ ಪ್ರಮುಖ ಕಾರಣವಾಗಿರುವ ಅಂಶವಾಗಿದೆ. ಅನೇಕ ಮಂದಿ ತಮ್ಮ ರಕ್ತದ ಒತ್ತಡವನ್ನು ಪ್ರತಿ ವರ್ಷ ಪರೀಕ್ಷೆ ಮಾಡುವುದಿಲ್ಲ. ಅನೇಕರು ಅಧಿಕ ರಕ್ತದೊತ್ತಡದಿಂದ ಬಳಲುತ್ತಿದ್ದರೂ ಈ ಬಗ್ಗೆ ಅವರಿಗೆ ತಿಳಿಯದ ಕಾರಣ ಇದು. ಯಾವುದೇ ಲಕ್ಷಣಗಳು ಗೋಚರಿಸುವುದಿಲ್ಲ. ಈ ಹಿನ್ನೆಲೆಯಲ್ಲಿ, ಈ ಕುರಿತು ಸೂಕ್ತ ಚಿಕಿತ್ಸೆಗೆ ಅಥವಾ ತಡೆಗಟ್ಟುವ ಕ್ರಮಕ್ಕೆ ಅವರು ಮುಂದಾಗುವುದಿಲ್ಲ. ವಿಶ್ವ ಆರೋಗ್ಯ ಸಂಸ್ಥೆ ಪ್ರಕಾರ, ಮೂರರಲ್ಲಿ ಒಬ್ಬರು ವಯಸ್ಕರು ಅಧಿಕ ರಕ್ತದೊತ್ತಡದಿಂದ ಬಳಲುತ್ತಿದ್ದಾರೆ.

ಮಿದುಳಿಗೆ ರಕ್ತ ಸಂಚಾರದಲ್ಲಿ ಉಂಟಾಗುವ ಅಡ್ಡಿಯಿಂದ ಬ್ರೈನ್​ ಸ್ಟ್ರೋಕ್​ನ ಉಂಟಾಗುತ್ತದೆ. ದೇಹದ ಕಾಲು ಅಥವಾ ಕೈ ನಿಯಂತ್ರಿಸುವಂತಹ ಮಿದುಳು ಪ್ರಮುಖ ಭಾಗದಲ್ಲಿ ರಕ್ತದ ಪರಿಚಲನೆಯಲ್ಲಿ ಅಡೆತಡೆಯಾದರೆ ಆ ಭಾಗವೂ ಸಂಪೂರ್ಣವಾಗಿ ಸತ್ತಂತೆ ಆಗುತ್ತದೆ. ಇದೇ ಪಾರ್ಶ್ವವಾಯುವಾಗಿದೆ. ಈ ರೀತಿ ಕಣ್ಣು, ಮುಖ, ಬಾಯಿ ಕೆಲವೊಮ್ಮೆ ದೇಹದ ಎರಡು ಭಾಗಗಳಿಗೂ ಹಾನಿ ಉಂಟಾಗಬಹುದು. ಅಸ್ಪಷ್ಟ ಮಾತು, ಅಸ್ಥಿರತೆ, ದೃಷ್ಟಿ ದೋಷ, ಎಚ್ಚರ ತಪ್ಪುವಂತಹ ಲಕ್ಷಣಗಳು ಕಂಡು ಬಂದರೆ ಇವು ಬ್ರೈನ್​ ಸ್ಟ್ರೋಕ್​ ಲಕ್ಷಣವಾಗಿದ್ದು, ಇದಕ್ಕೆ ತಕ್ಷಣಕ್ಕೆ ಚಿಕಿತ್ಸೆ ನೀಡಬೇಕಾಗುತ್ತದೆ.

ತಡೆಗೆ ಕ್ರಮ: ಈ ಗಂಭೀರ ಸ್ವರೂಪದ ಪಾರ್ಶ್ವವಾಯುವಿನಿಂದ ತಪ್ಪಿಸಿಕೊಳ್ಳಲು ಮುಂದಾಗಲು ನಿಯಮಿತವಾಗಿ ಬಿಪಿ ಪರೀಕ್ಷೆಗೆ ಒಳಗಾಗಬೇಕು. ಅಧಿಕ ರಕ್ತದೊತ್ತಡವನ್ನು ಸದಾ ನಿಯಂತ್ರಣದಲ್ಲಿ ಇಡಬೇಕು. ಮಧುಮೇಹ ಮತ್ತು ಕೊಲೆಸ್ಟ್ರಾಲ್​ ಮಟ್ಟವನ್ನು ನಿಯಮಿತವಾಗಿ ನಿರ್ವಹಣೆ ಮಾಡಬೇಕು. ವೈದ್ಯರ ಪ್ರಕಾರ, ನಿಯಮಿತವಾಗಿ ವ್ಯಕ್ತಿ ಆರೋಗ್ಯ ತಪಾಸಣೆಗೆ ಒಳಗಾಗಬೇಕಿದೆ. ಸ್ಥೂಲಕಾಯ ತಪ್ಪಿಸಬೇಕು. ದಿನಕ್ಕೆ 6-7 ಗಂಟೆ ಉತ್ತಮ ನಿದ್ದೆಯನ್ನು ಹೊಂದಬೇಕಿದೆ. ಅಲ್ಲದೇ ಒತ್ತಡ ಮುಕ್ತ ಬದುಕಿಗೆ ಹೆಚ್ಚಿನ ಗಮನವನ್ನು ಹರಿಸಬೇಕಿದೆ. ಈ ನಿಟ್ಟಿನಲ್ಲಿ ಸಮತೋಲಿತ ಆಹಾರ ಸೇವನೆ, ದಿನಕ್ಕೆ 45 ನಿಮಿಷ ವ್ಯಾಯಾಮದಂತಹ ಚಟುವಟಿಕೆಗಳು ಸಹಾಯ ಮಾಡುತ್ತದೆ. ಜೊತೆಗೆ ಧೂಮಪಾನ ಮತ್ತು ಆಲ್ಕೋಹಾಲ್​ ಸೇವನೆಯಿಂದ ದೂರವಿರುವುದು. ದಿನಕ್ಕೆ 3-4 ಗ್ರಾಂಗಿಂತ ಹೆಚ್ಚಿನ ಉಪ್ಪು ಸೇವನೆ ಮಾಡದಿರುವುದು ಆರೋಗ್ಯಯುತ ಜೀವನಶೈಲಿಯ ಮಾರ್ಗವಾಗಿರಲಿದೆ.

ಇದನ್ನೂ ಓದಿ: ಧೂಮಪಾನ, ಹೆಚ್ಚಿನ ಒತ್ತಡ, ಬಿಡುವಿಲ್ಲದ ನಿರಂತರ ಕೆಲಸವೇ ಪಾರ್ಶ್ವವಾಯುವಿಗೆ ಕಾರಣವಂತೆ.. ಇದಕ್ಕಿಲ್ಲವೇ ಪರಿಹಾರ?