ಮಾನಸಿಕ ಮತ್ತು ದೈಹಿಕ ತೊಂದರೆಗಳಿಗೆ ಕಾರಣವಾಗುತ್ತಿರುವ ಆಟಿಸಂ ಮಕ್ಕಳ ಆರೈಕೆ!

ಆಟಿಸಂ ಅಥವಾ ಆಟಿಸ್ಟಿಕ್ ಸ್ಪೆಕ್ಟ್ರಮ್ ಡಿಸಾರ್ಡರ್ ಎಂಬುದು ಮಕ್ಕಳಲ್ಲಿ ಕಂಡುಬರುವ ಗಂಭೀರ ಆರೋಗ್ಯ ಸಮಸ್ಯೆಯಾಗಿದೆ. ಇದು ಅಂತಹ ಮಕ್ಕಳ ಆರೈಕೆದಾರರ ಮೇಲೆ ಮಾನಸಿಕ ಮತ್ತು ದೈಹಿಕ ತೊಂದರೆಯನ್ನು ಉಂಟುಮಾಡುತ್ತದೆ.

ಹೈದರಾಬಾದ್: ಜೊಹೋ ಸಿಇಒ ಶ್ರೀಧರ್ ವೆಂಬು ತನ್ನನ್ನು ಮತ್ತು ಆಟಿಸ್ಟಿಕ್ ಮಗುವನ್ನು ತೊರೆದಿದ್ದಾರೆ ಎಂದು ಅವರ ಪತ್ನಿ ಆರೋಪಿಸಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿರುವ ವೆಂಬು ಮಗನ ಆಟಿಸಂ ಸ್ಥಿತಿಯು ತನ್ನ ವೈಯಕ್ತಿಕ ಜೀವನಕ್ಕೆ ಮತ್ತು ಅವನ ಜೀವನದಲ್ಲಿನ ವಿವಿಧ ಕಷ್ಟಗಳಿಗೆ ಕಾರಣವಾಗಿದೆ ಎಂದು ಟ್ವಿಟರ್​ನಲ್ಲಿ ಬರೆದುಕೊಂಡಿದ್ದಾರೆ.

ಈ ಘಟನೆಯು ಆಟಿಸ್ಟಿಕ್ ಮಕ್ಕಳ ಆರೈಕೆ ಮತ್ತು ಅದು ಆರೈಕೆದಾರರ ಮೇಲೆ ಹೇಗೆ ಪರಿಣಾಮ ಬೀರುತ್ತದೆ ಎಂಬ ಚರ್ಚೆಗೆ ಗ್ರಾಸವಾಗುವಂತೆ ಮಾಡಿದೆ. ಭಾರತದ ರಾಷ್ಟ್ರೀಯ ಆರೋಗ್ಯ ಪೋರ್ಟಲ್ 'ಆಟಿಸಂ' ಅಥವಾ 'ಆಟಿಸ್ಟಿಕ್ ಸ್ಪೆಕ್ಟ್ರಮ್ ಡಿಸಾರ್ಡರ್' (asd) ಅನ್ನು ಸಾಮಾಜಿಕ ದೌರ್ಬಲ್ಯಗಳು, ಸಂವಹನದಲ್ಲಿನ ತೊಂದರೆಗಳು ಮತ್ತು ನಡವಳಿಕೆಯ ನಿರ್ಬಂಧಿತ-ಪುನರಾವರ್ತಿತ ಮಾದರಿಗಳಿಂದ ನಿರೂಪಿಸಲ್ಪಟ್ಟ ಸಂಕೀರ್ಣ ನರವಿಕಾಸ ಅಸ್ವಸ್ಥತೆಗಳ ಶ್ರೇಣಿ ಎಂದು ವ್ಯಾಖ್ಯಾನಿಸಿದೆ. ಈ ಜೀವಿತಾವಧಿಯ ಸ್ಥಿತಿಯನ್ನು ಸಾಮಾನ್ಯವಾಗಿ ಜೀವನದ ಮೊದಲ ಮೂರು ವರ್ಷಗಳಲ್ಲಿ ಕಂಡುಹಿಡಿಯಲಾಗುತ್ತದೆ. ಮತ್ತು ತಳಿಶಾಸ್ತ್ರ ಅಥವಾ ಪರಿಸರದ ಅಂಶಗಳನ್ನು ಸಾಮಾನ್ಯವಾಗಿ ಅದರ ಕಾರಣಗಳೆಂದು ಪರಿಗಣಿಸಲಾಗುತ್ತದೆ.

ಆನುವಂಶಿಕ ಕಾಯಿಲೆಗಳಿಗೆ ಡಿಎನ್ಎ ಪರೀಕ್ಷೆ, ನಡವಳಿಕೆಯ ಮೌಲ್ಯಮಾಪನ, ಶ್ರವಣ ಮತ್ತು ದೃಷ್ಟಿ ಸಮಸ್ಯೆಗಳನ್ನು ಪರಿಶೀಲಿಸಲು ಆಡಿಯೋ-ದೃಶ್ಯ ಪರೀಕ್ಷೆಗಳು, ಔದ್ಯೋಗಿಕ ಚಿಕಿತ್ಸೆ ಸ್ಕ್ರೀನಿಂಗ್ ಮತ್ತು ಅಭಿವೃದ್ಧಿ ಪ್ರಶ್ನಾವಳಿಗಳಂತಹ ವಿವಿಧ ಸ್ಕ್ರೀನಿಂಗ್‌ಗಳ ಮೂಲಕ ಆಟಿಸಂ ಅನ್ನು ಕಂಡುಹಿಡಿಯಬಹುದು. ರೋಗನಿರ್ಣಯದ ನಂತರವೂ, ಈ ಸ್ಥಿತಿಗೆ ಯಾವುದೇ ನಿರ್ದಿಷ್ಟ ಚಿಕಿತ್ಸೆ ಇಲ್ಲ. ಆದರೆ ಇದನ್ನು ವಿವಿಧ ಮಾತು ಮತ್ತು ಔದ್ಯೋಗಿಕ ಚಿಕಿತ್ಸೆಗಳು, ಸಾಮಾಜಿಕ ಕೌಶಲ್ಯಗಳ ತರಬೇತಿ, ಔಷಧೋಪಚಾರ ಮತ್ತು ಆಹಾರ ವಿಧಾನಗಳ ಸಹಾಯದಿಂದ ನಿರ್ವಹಿಸಬಹುದು.

ಮಾನಸಿಕ ಮತ್ತು ದೈಹಿಕ ಸಮಸ್ಯೆಗಳಿಂದ ಬಳಲುತ್ತಿರುವ ಆರೈಕೆದಾರರು:ಆದರೆ ಎಲ್ಲಕ್ಕಿಂತ ಮುಖ್ಯವಾಗಿ, ಅದರ ಬಗ್ಗೆ ಶಿಕ್ಷಣ ಪಡೆಯುವುದು ಮತ್ತು ಅದರ ಸ್ವೀಕಾರವು ಹೆಚ್ಚು ಮುಖ್ಯವಾಗಿದೆ. ಹೆಚ್ಚಿನ ಸಂದರ್ಭಗಳಲ್ಲಿ, ಆಟಿಸ್ಟಿಕ್ ಸ್ಪೆಕ್ಟ್ರಮ್ ಅಸ್ವಸ್ಥತೆಯಿಂದ ಬಳಲುತ್ತಿರುವ ಮಕ್ಕಳನ್ನು ನೋಡಿಕೊಳ್ಳುವುದು ಆರೈಕೆದಾರರ ಜೀವನದ ಮೇಲೆ ಭಾರಿ ಪರಿಣಾಮ ಬೀರಿದೆ, ಇದರಿಂದಾಗಿ ಅವರು ಅನೇಕ ಸವಾಲುಗಳನ್ನು ಎದುರಿಸಬೇಕಾಗುತ್ತದೆ. ಆಟಿಸ್ಟಿಕ್ ಸ್ಪೆಕ್ಟ್ರಮ್ ಅಸ್ವಸ್ಥತೆ ಹೊಂದಿರುವ ಮಕ್ಕಳನ್ನು ನೋಡಿಕೊಳ್ಳುವಾಗ ಆರೈಕೆದಾರರು ಆಗಾಗ್ಗೆ ಮಾನಸಿಕ ತೊಂದರೆ, ಆತಂಕ, ಖಿನ್ನತೆ ಮತ್ತು ಇತರ ಮಾನಸಿಕ ಮತ್ತು ದೈಹಿಕ ಸಮಸ್ಯೆಗಳಿಂದ ಬಳಲುತ್ತಿದ್ದಾರೆ ಎಂದು ತಿಳಿದುಬಂದಿದೆ.

ಎಎಸ್​ಡಿ ಹೊಂದಿರುವ ಮಕ್ಕಳ ಬೌದ್ಧಿಕ ಅಸಮರ್ಥತೆ ಮತ್ತು ಸಂವಹನ ಕೊರತೆಗಳನ್ನು ನಿರ್ವಹಿಸುವುದು ಸಹ ಆರೈಕೆದಾರರ ಮೇಲೆ ಆರ್ಥಿಕ ಪರಿಣಾಮ ಬೀರುತ್ತದೆ. ಈ ರೀತಿಯ ರೋಗ ಪೀಡಿತ ಮಗುವನ್ನು ನೋಡಿಕೊಳ್ಳಲು ಸಾಕಷ್ಟು ಸಮಯ, ಶ್ರಮ ಮತ್ತು ತಾಳ್ಮೆಯ ಅಗತ್ಯವಿರುತ್ತದೆ, ಇದು ಆಗಾಗ್ಗೆ ಮಾನಸಿಕ ತೊಂದರೆ, ಆತಂಕ, ಖಿನ್ನತೆ ಮತ್ತು ವಿವಿಧ ದೈಹಿಕ ಕಾಯಿಲೆಗಳಿಗೆ ಕಾರಣವಾಗುತ್ತದೆ. ಸುಧಾರಿತ ಆರೈಕೆಗೆ ಆರೈಕೆದಾರರಲ್ಲಿ ಸಕಾರಾತ್ಮಕತೆ ಮತ್ತು ಆತ್ಮವಿಶ್ವಾಸವನ್ನು ಕಾಪಾಡಿಕೊಳ್ಳುವುದು ಸಹ ಅತ್ಯಗತ್ಯ.

ಆರೈಕೆದಾರರಿಗೆ ಬೇಕು ಸಹಾನುಭೂತಿ:ಆಟಿಸಂ ಇನ್ನೂ ಒಂದು ಒಗಟಾಗಿದೆ ಮತ್ತು ಉತ್ತಮವಾಗಿ ಅರ್ಥ ಮಾಡಿಕೊಳ್ಳಲು ಸುಧಾರಿತ ಸಂಶೋಧನೆ, ವರ್ಧಿತ ಜಾಗೃತಿ ಮತ್ತು ಆರಂಭಿಕ ರೋಗ ನಿರ್ಣಯದ ಅಗತ್ಯವಿದೆ. ಆದರೆ ಎಲ್ಲಕ್ಕಿಂತ ಹೆಚ್ಚಾಗಿ, ಈ ಸ್ಥಿತಿಯನ್ನು ಹೊಂದಿರುವ ಮಕ್ಕಳ ಬಗ್ಗೆ ಮತ್ತು ಅವರನ್ನು ನೋಡಿಕೊಳ್ಳುವ ಆರೈಕೆದಾರರಿಗೆ ಸಹಾನುಭೂತಿ ಬೇಕು.

ಇದನ್ನೂ ಓದಿ:ದೇಶದಲ್ಲಿ ಎಚ್​3ಎನ್​2 ವೈರಸ್​ ಬಗ್ಗೆ ಭಯಬೇಡ, ಎಚ್ಚರಿಕೆ ಅಗತ್ಯ: ವೈದ್ಯರ ಸಲಹೆ