ಕೋವಿಡ್ ರೋಗಿಗಳು ಹೊಸ ರೀತಿಯ ಮಧುಮೇಹಕ್ಕೆ ತುತ್ತಾಗಬಹುದು: ಅಧ್ಯಯನ ವರದಿ

ಕೋವಿಡ್ ರೋಗಿಗಳ ಮೇಲೆ ಬೋಸ್ಟನ್ ಮಕ್ಕಳ ಆಸ್ಪತ್ರೆಯ ಸಂಶೋಧಕರ ತಂಡ ನಡೆಸಿದ ಅಧ್ಯಯನದಲ್ಲಿ, ಈ ಮೊದಲು ಮಧುಮೇಹ ಸಮಸ್ಯೆ ಇಲ್ಲದವರಲ್ಲಿ ಕೋವಿಡ್​ಗೆ ತುತ್ತಾದ ಬಳಿಕ ಹೊಸ ರೀತಿಯ ಮಧುಮೇಹ ಕಂಡು ಬಂದಿದೆ ಎಂದು ತಿಳಿದು ಬಂದಿದೆ.

ನ್ಯೂಯಾರ್ಕ್ : ಬೋಸ್ಟನ್ ಮಕ್ಕಳ ಆಸ್ಪತ್ರೆ (Boston Children's Hospital) ಯ ಸಂಶೋಧಕರು 2020 ಮಾರ್ಚ್‌ನಿಂದ ಮೇವರೆಗೆ ಇಟಲಿಯಲ್ಲಿ ದಾಖಲಾದ 551 ಜನ ಕೋವಿಡ್ -19 ರೋಗಿಗಳ ಆರೋಗ್ಯದ ಬಗ್ಗೆ ಮಾಹಿತಿ ಕಲೆ ಹಾಕಿದ್ದಾರೆ.

ಈ ಪೈಕಿ ಅರ್ಧದಷ್ಟು (ಶೇ.46) ರಷ್ಟು ರೋಗಿಗಳಲ್ಲಿ ಈ ಹಿಂದೆ ಮಧುಮೇಹದ ಇದ್ದ ಬಗ್ಗೆ ಮಾಹಿತಿ ದೊರೆತಿಲ್ಲವಾದರೂ, ಅವರಲ್ಲಿ ಹೊಸ ಬಗೆಯ ಹೈಪರ್​ಗ್ಲೆಸೇಮಿಯಾ (Hyperglycemia) ಅಥವಾ ಹೈ ಬ್ಲಡ್ ಶುಗರ್ (High blood sugar) ಪತ್ತೆಯಾಗಿದೆ.

ಈ ಪೈಕಿ ಹೆಚ್ಚಿನ ರೋಗಿಗಳಿಗೆ ಚಿಕಿತ್ಸೆ ನೀಡಲಾಗಿದೆ. ಆದರೆ, ಹೊಸ ಹೈಪರ್​ಗ್ಲೆಸೇಮಿಯಾ ಇರುವ ಕೋವಿಡ್ ರೋಗಿಗಳ ಪೈಕಿ ಶೇ. 35 ರಷ್ಟು ಜನರು ಕನಿಷ್ಠ 6 ತಿಂಗಳ ಕಾಲ ಚಿಕಿತ್ಸೆ ಪಡೆದಿದ್ದಾರೆ ಎಂದು ಅಧ್ಯಯನ ತಂಡದ ಮುಖ್ಯಸ್ಥ ಪಾವೊಲೊ ಫಿಯೋರಿನಾ ಹೇಳಿದ್ದಾರೆ.

ಇತರ ಸಮಸ್ಯೆಗಳಿಗೆ ರೋಗಗಳಿಗೆ ಹೋಲಿಸಿದರೆ, ಹೈಪರ್​ಗ್ಲೆಸೇಮಿಯಾ ಇದ್ದ ಕೋವಿಡ್ ರೋಗಿಗಳ ಮೇಲೆ ಹೆಚ್ಚಿನ ನಿಗಾ ಇಡುವ ಅನಿವಾರ್ಯತೆ ಇತ್ತು. ಯಾಕೆಂದರೆ ಸೋಂಕಿತರು ದೀರ್ಘ ಸಮಯ ಆಸ್ಪತ್ರೆಗೆ ದಾಖಲಾಗಬೇಕಾಯಿತು, ಕೆಟ್ಟ ಕ್ಲಿನಿಕಲ್ ಲಕ್ಷಣಗಳು, ಆಮ್ಲಜನಕದ ಹೆಚ್ಚಿನ ಅಗತ್ಯತೆ, ತೀವ್ರ ನಿಗಾ ಘಟಕದ ಚಿಕಿತ್ಸೆಯ ಹೆಚ್ಚಿನ ಅಗತ್ಯ ಈ ಸೋಂಕಿತರಿಗೆ ಇತ್ತು ಎಂದು ಫಿಯೋರಿನಾ ತಿಳಿಸಿದ್ದಾರೆ.

ನೇಚರ್ ಮೆಟಾಬಾಲಿಸಂ ಪತ್ರಿಕೆಯಲ್ಲಿ ಈ ಅಧ್ಯಯನ ವರದಿ ಪ್ರಕಟಿಸಲಾಗಿದೆ. ಹೈಪರ್​ಗ್ಲೆಸೇಮಿಕ್ ರೋಗಿಗಳು ಅಸಹಜ ಹಾರ್ಮೋನುಗಳ ಮಟ್ಟವನ್ನು ಹೊಂದಿದ್ದರು ಎಂದು ಅಧ್ಯಯನ ತಂಡವು ಹೇಳಿದೆ. ಅಂತಹ ರೋಗಿಗಳಲ್ಲಿ ಹೈಪರ್​ಗ್ಲೆಸೇಮಿಕ್ ಮಟ್ಟ ಹೆಚ್ಚಿತ್ತು. ಅದು ಇನ್ಸುಲಿನ್ ಮಟ್ಟವನ್ನು ಹೆಚ್ಚಿನ ಪ್ರಮಾಣದಲ್ಲಿ ಉತ್ಪಾದಿಸುತ್ತದೆ ಎಂದು ಪಾವೊಲೊ ಫಿಯೋರಿನಾ ತಿಳಿಸಿದ್ದಾರೆ.