ನ್ಯೂಯಾರ್ಕ್: 2024ರಲ್ಲಿ ಫಾರ್ಮಾಸ್ಯೂಟಿಕಲ್ ಉದ್ಯಮದಲ್ಲಿ ಕೋಶ ಮತ್ತು ಜೀನ್ ಥೆರಪಿ (ಸಿಜಿಟಿ) ಹೆಚ್ಚಿನ ಪರಿಣಾಮ ಬೀರಲಿದೆ ಎಂದು ವರದಿ ಹೇಳಿದೆ. ಈ ಅಧ್ಯಯನ ವರದಿಯನ್ನು 115 ಆರೋಗ್ಯ ವಲಯ ಉದ್ಯಮದ ವೃತ್ತಿಪರರ ಸಮೀಕ್ಷೆ ಆಧರಿಸಿ ತಯಾರಿಸಲಾಗಿದೆ ಎಂದು ಡಾಟಾ ಮತ್ತು ಅನಾಲಿಟಿಕ್ಸ್ ಕಂಪನಿ ಗ್ಲೋಬಲ್ಡಾಟಾ ವರದಿ ತಿಳಿಸಿದೆ.
ಶೇ.18ರಷ್ಟು ವೈದ್ಯಕೀಯ ವೃತ್ತಿಪರರು ಸಿಜಿಟಿ ಚಿಕಿತ್ಸೆಯನ್ನು ಮನವರಿಕೆ ಮಾಡಿಕೊಂಡಿದ್ದಾರೆ. ಮುಂದಿನ ವರ್ಷ ಫಾರ್ಮಾ (ಔಷಧ ವಲಯ) ಕ್ಷೇತ್ರದಲ್ಲಿ ಇದು ಪ್ರಾಬಲ್ಯ ಮೆರೆಯಲಿದೆ. ಕೋಶ ಮತ್ತು ಜೀನ್ ಚಿಕಿತ್ಸೆಯು ನಿಧಾನವಾಗಿ ವೈದ್ಯಕೀಯ ಕ್ಷೇತ್ರದಲ್ಲಿ ಹೆಚ್ಚಿನ ಗಮನ ಪಡೆಯುತ್ತಿದೆ. ಇದರ ಸಂಪೂರ್ಣ ಸಾಮರ್ಥ್ಯದ ಕುರಿತು ಇನ್ನೂ ಅರಿವಿಗೆ ಬಂದಿಲ್ಲ. 2010ರಲ್ಲೇ ಪ್ರೊಸ್ಟೇಟ್ ಕ್ಯಾನ್ಸರ್ಗೆ ಕೋಶ ಚಿಕಿತ್ಸೆಗೆ ಅನುಮೋದನೆ ಪಡೆಯಲಾಗಿದ್ದು, ಭರವಸೆದಾಯಕ ಚಿಕಿತ್ಸೆಯಾಗಿ ಹೊರಹೊಮ್ಮಿದೆ.
ಕೋಶ, ಜೀನ್ ಚಿಕಿತ್ಸೆಯು ಮುಂಬರುವ ವರ್ಷದಲ್ಲಿ ಸ್ಥಾಪಿತ ಚಿಕಿತ್ಸಾ ವಿಧಾನವಾಗಲಿದೆ ಎಂದು ಗ್ಲೋಬಲ್ ಡಾಟಾ ನಿರೀಕ್ಷಿಸಿದೆ. ಉನ್ನತ ಅಭಿವೃದ್ಧಿ, ಉತ್ಪಾದನಾ ವೆಚ್ಚ, ಕ್ಲಿನಿಕಲ್ ಪ್ರಯೋಗದಲ್ಲಿನ ವಿಫಲತೆಯ ಅಪಾಯ, ಬೆಲೆ ಏರಿಕೆ ಮತ್ತು ಮರು ಪಾವತಿಯ ಒತ್ತಡ ಈ ಹೊಸ ಚಿಕಿತ್ಸೆಯೊಂದಿಗಿದೆ ಎಂದು ತಿಳಿಸಿದೆ.
ಈ ಉದ್ಯಮವು ಹೊರಗುತ್ತಿಗೆಯ ಮೂಲಕ ಹೆಚ್ಚಿನ ಅಭಿವೃದ್ಧಿ ವೆಚ್ಚವನ್ನು ಸರಿದೂಗಿಸಲು ಪ್ರಯತ್ನಿಸಬಹುದು. ಬೇಯರ್ಸ್ ಘೋಷಣೆ ಇದಕ್ಕೊಂದು ಇತ್ತೀಚಿನ ಉದಾಹರಣೆ. ನವೆಂಬರ್ 2023ಯಲ್ಲಿ ಚೀನಾದ ಶಾಂಘೈ ಫಾರ್ಮಾಸ್ಯೂಟಿಕಲ್ ಜೊತೆಗೆ ಬೇಯರ್ಸ್ ಸಹಕಾರವನ್ನು ಘೋಷಿಸಿತು. ಸಿಜಿಟಿಗೆ ಮೊದಲ ಚೀನಾದ ಪ್ರಯೋಗಾಲಯವಾಗಿದ್ದು, ಕ್ಯಾನ್ಸರ್ ಔಷಧ ಅಭಿವೃದ್ಧಿ ಮಾಡಲಿದೆ. ಸಿಜಿಟಿ ಅಭಿವೃದ್ಧಿಗೆ ಚೀನಾದಂತಹ ದೇಶಗಳು ಆಕರ್ಷಣೀಯ ಮಾರುಕಟ್ಟೆಯಾಗಿದೆ.
2029ರ ಹೊತ್ತಿಗೆ ಜಾಗತಿಕ ಸಿಜಿಟಿ ಮಾರುಕಟ್ಟೆಯ ಯೋಜನೆಗಳು 80 ಡಾಲರ್ ಬಿಲಿಯನ್ ತಲುಪಲಿದೆ ಎಂದು ವರದಿ ಅಂದಾಜಿಸಿದೆ. ಸೆಲ್ ಮತ್ತು ಜೀನ್ ಚಿಕಿತ್ಸೆಯಲ್ಲಿ ಆಂಕೋಲಾಜಿ ಪ್ರಮುಖವಾಗಿದ್ದು, ಇದರಲ್ಲಿ ಹೆಚ್ಚಿನ ಪ್ರಗತಿ ಕಾಣಲಿದೆ. 2029ರಲ್ಲಿ ಆಂಕೋಲಾಜಿ ಕ್ಷೇತ್ರದ ಸಿಜಿಟಿ ಮಾರುಕಟ್ಟೆ ಶೇ.44ರಷ್ಟಿರಲಿದೆ. ಕೋಶ ಮತ್ತು ಜೀನ್ ಚಿಕಿತ್ಸೆಗಳು ಮುಖ್ಯವಾಗಿ ಆಂಕೊಲಾಜಿ ಕ್ಷೇತ್ರದಲ್ಲಿ ಬಳಸಲು ಅನುಮೋದಿಸಲ್ಪಟ್ಟಿದೆ. ಆದರೆ, ಈ ಚಿಕಿತ್ಸೆಯನ್ನು ಆನುವಂಶಿಕ ಕಾಯಿಕೆಗೆ ಹೆಚ್ಚಾಗಿ ಬಳಕೆ ಮಾಡಬಹುದು. ನ್ಯೂರೋ ಡಿಜೆನೆರೇಟಿವ್, ಆಟೋಇಮ್ಯೂನ್ ಮತ್ತು ಹೃದಯರಕ್ತನಾಳದ ಕಾಯಿಲೆಗಳ ಚಿಕಿತ್ಸೆಗೆ ಈ ಸಿಜಿಟಿ ಹೆಚ್ಚಿನ ಪ್ರಯೋಜನ ಹೊಂದಿದೆ. (ಐಎಎನ್ಎಸ್)
ಇದನ್ನೂ ಓದಿ: ಅಪರೂಪದ ರೋಗಗಳ ವಿರುದ್ಧ ಹೋರಾಟಕ್ಕೆ ಭಾರತಕ್ಕಿರುವ ಸವಾಲೇನು?: ಕಾರಣ ಬಿಚ್ಚಿಟ್ಟ ವರದಿ
