ಕೆಪಿಸಿಸಿ ಅಧ್ಯಕ್ಷ ಗಾದಿಗಾಗಿ ದೇವರ ಮೊರೆ ಹೋದ್ರಾ ಡಿಕೆಶಿ?

ಭಾರಿ ಪೈಪೋಟಿಗೆ ಕಾರಣವಾಗಿರುವ ಕೆಪಿಸಿಸಿ ಅಧ್ಯಕ್ಷ ಸ್ಥಾನದ ಸಮೀಪವಿರುವ ಡಿ.ಕೆ.ಶಿವಕುಮಾರ್ ರಾತ್ರೋರಾತ್ರಿ ದೇವಸ್ಥಾನದ ಪ್ರಧಾನ ಅರ್ಚಕ ಮಹಾದೇವಪ್ಪ ಅವರನ್ನು ಬೆಂಗಳೂರಿಗೆ ಕರೆಯಿಸಿಕೊಂಡು ತಮ್ಮ ನಿವಾಸದಲ್ಲಿ ವಿಶೇಷ ಪೂಜೆ ಆರಂಭಿಸಿದ್ದಾರೆ ಎಂಬ ಮಾಹಿತಿ ದೊರೆತಿದೆ.

ಯಾದಗಿರಿ : ಕೆಪಿಸಿಸಿ ಅಧ್ಯಕ್ಷ ಪಟ್ಟ ಯಾರಿಗೆ ಎನ್ನುವ ಬಗೆಗಿನ ಗೊಂದಲಗಳು ಬಹುತೇಕ ನಿವಾರಣೆಯಾಗಿದೆ ಎಂದೇ ಹೇಳಲಾಗುತ್ತಿದೆ. ಈ ಹುದ್ದೆ ಡಿ.ಕೆ.ಶಿವಕುಮಾರ್ ಅವರಿಗೆ ಸಿಗಲಿದೆ ಎಂದೇ ಜೋರಾಗಿ ಚರ್ಚೆಯಾಗುತ್ತಿದೆ. ಈ ಮಧ್ಯೆ ಡಿಕೆಶಿ ಗೋನಾಲ ಗ್ರಾಮದಲ್ಲಿ ಗಡೆ ದುರ್ಗಾದೇವಿ ಮೊರೆ ಹೋಗಿದ್ದಾರೆ.

ಜಿಲ್ಲೆಯ ವಡಗೇರಾ ತಾಲೂಕಿನ ಗೋನಾಲ ಗ್ರಾಮದಲ್ಲಿ ಗಡೆ ದುರ್ಗಾಮಾತೆಯ ಪರಮಭಕ್ತರಾಗಿರುವ ಕಾಂಗ್ರೆಸ್ ನಾಯಕ ತಮ್ಮ ಸಂಕಷ್ಟ ದಿನಗಳಲ್ಲಿ ದೇವಿಯ ಆರಾಧನೆ ಮಾಡುತ್ತಾರೆ ಅಂತ ದೇವಸ್ಥಾನದ ಅರ್ಚಕ ಮಹಾದೇವ ಪೂಜಾರಿ ಈ ಹಿಂದೆ ತಿಳಿಸಿದ್ದರು. ಅಲ್ಲದೇ ಈ ಹಿಂದೆ 'ಆಲ್ ಕೇಸ್ ಡಿಲಿಟ್ ಮಾಡಮ್ಮಾ..' ಅಂತ ಪತ್ರ ಬರೆದು ದೇವಿಯ ಸನ್ನಿಧಿಯಲ್ಲಿ ಇಟ್ಟು ಕಳೆದ 2 ತಿಂಗಳ ಹಿಂದಷ್ಟೇ ಇಲ್ಲಿ ವಿಶೇಷ ಪೂಜೆ ಮಾಡಿಸಿದ್ದರಂತೆ.

ಸದ್ಯ ಕೆಪಿಸಿಸಿ ಅಧ್ಯಕ್ಷ ಸ್ಥಾನದ ಸಮೀಪ ಇರುವ ಡಿಕೆಶಿ, ರಾತ್ರೋರಾತ್ರಿ ದೇವಸ್ಥಾನದ ಪ್ರಧಾನ ಅರ್ಚಕ ಮಹಾದೇವಪ್ಪ ಪೂಜಾರಿಯನ್ನು ಬೆಂಗಳೂರಿಗೆ ಕರೆಯಿಸಿಕೊಂಡು ತಮ್ಮ ನಿವಾಸದಲ್ಲಿ ವಿಶೇಷ ಪೂಜೆ ಆರಂಭಿಸಿದ್ದಾರೆ ಎಂಬ ಬಗ್ಗೆ ಮಾಹಿತಿ ದೊರೆತಿದೆ.

ಈ ಹಿಂದೆಯೂ ತಮ್ಮ ಮನೆಯಲ್ಲಿ ಮಹಾದೇವಪ್ಪ ವಿಶೇಷ ಪೂಜೆ ಮಾಡಿದ್ದರು. ಈಗ ಮತ್ತೆ ಪೂಜೆ ಆರಂಭಿಸಿದ್ದಾರೆ ಎಂದು ಪ್ರಧಾನ ಅರ್ಚಕರ ಪುತ್ರ ಮರಿಸ್ವಾಮಿ ಪೂಜಾರ ತಿಳಿಸಿದ್ದಾರೆ.