ಯಾದಗಿರಿ:ಜಿಲ್ಲೆಯ ಶಹಾಪುರದ ಲಕ್ಷ್ಮಿ ವೈನ್ಸ್‌ನಲ್ಲಿ ನಕಲಿ ಮದ್ಯದ ದಾಸ್ತಾನು ಪತ್ತೆ ಪ್ರಕರಣದ ಬೆನ್ನಲ್ಲೇ ಮತ್ತೊಂದು ಇಂತಹ ಕೃತ್ಯದ ಬೆನ್ನತ್ತಿದ್ದ ಅಬಕಾರಿ ಪೊಲೀಸರ ತಂಡದ ಮೇಲೆಯೇ ಸುಮಾರು 30ಕ್ಕೂ ಹೆಚ್ಚು ಜನರು ಕಲ್ಲು ಬಡಿಗೆಗಳಿಂದ ಹಲ್ಲೆ ನಡೆಸಿ, ಜೀವ ಬೆದರಿಕೆ ಹಾಕಿ ಪರಾರಿಯಾದ ಘಟನೆ ಗುರುವಾರ ಸಂಜೆ ಶಹಾಪುರ ತಾಲೂಕಿನ ಚಂದಾಪುರ ಗ್ರಾಮದ ಬಳಿ ನಡೆದಿದೆ.
ಶುಕ್ರವಾರ ಸಂಜೆ ಈ ಬಗ್ಗೆ ಗೋಗಿ ಪೊಲೀಸ್ ಠಾಣೆಯಲ್ಲಿ 20 ಜನರ ವಿರುದ್ಧ ಶುಕ್ರವಾರ ಸ್ವತಃ ಅಬಕಾರಿ ನಿರೀಕ್ಷಕ ವಿಜಯಕುಮಾರ್ ಹಿರೇಮಠ ಪ್ರಕರಣ ದಾಖಲಿಸಿದ್ದು, ನಕಲಿ ಮದ್ಯ ಪ್ರಕರಣ ಭೇದಿಸುವ ಸಂದರ್ಭದಲ್ಲಿ ನಡೆದ ಈ ಘಟನೆಯ ಬಗ್ಗೆ ದೂರಿನಲ್ಲಿ ತಿಳಿಸಿದ್ದಾರೆ.
ಅಧಿಕಾರಿಯ ದೂರಿನಲ್ಲೇನಿದೆ ?: ನಕಲಿ ಮದ್ಯ ಸಾಗಾಟವಾಗುತ್ತಿದೆ ಎಂಬ ಖಚಿತ ಮಾಹಿತಿ ಮೇರೆಗೆ ಮೇ 19ರಂದು ಸಂಜೆ ಶಹಾಪುರ ತಾಲೂಕಿನ ಅಬಕಾರಿ ಪೊಲೀಸರು ಚಾಮನಾಳ ಬಳಿ ಸ್ವಿಫ್ಟ್ ಕಾರೊಂದನ್ನು ತಡೆದಾಗ, ಡಿಕ್ಕಿಯಲ್ಲಿ ನಕಲಿ ಮದ್ಯ ಪತ್ತೆಯಾಗಿದೆ. ಈ ಬಗ್ಗೆ ಚಾಲಕ ಹನುಮಂತ್ರಾಯ ಎಂಬಾತನನ್ನು ವಿಚಾರಿಸಿದಾಗ ಚಂದಾಪುರದಲ್ಲಿನ ಮುದುಕಪ್ಪ ಎಂಬುವವರ ತೋಟದ ಮನೆಗೆ ಒಯ್ಯುತ್ತಿರುವುದಾಗಿ ತಿಳಿಸಿದ್ದಾನೆ. ಈ ಮಾಹಿತಿ ಅರಿತ ಪೊಲೀಸರು ಸ್ಥಳ ಪರಿಶೀಲನೆಗೆಂದು ಅಲ್ಲಿಗೆ ತೆರಳಿದಾಗ, ಬೂದು ಬಣ್ಣದ ಪೆಟ್ಟಿಗೆಗಳಲ್ಲಿ ನಕಲಿ ಮದ್ಯದ ದಾಸ್ತಾನು ದೊರೆತಿದೆ.