ಅರಕೇರಾ ಸಿದ್ಧಾರೂಢ ಬ್ರಹ್ಮವಿದ್ಯಾಶ್ರಮದ ಸಿದ್ಧಲಿಂಗ ಮಹಾಸ್ವಾಮೀಜಿ ಶಿವೈಕ್ಯ

2000-01 ರಲ್ಲಿ ಅರಕೇರಾವನ್ನು ‘ಅರಿವಿನ ಕೆರೆ’ಯಾಗಿ ಪರಿವರ್ತಿಸಲು ಸತತ ಶ್ರಮವಹಿಸಿದರು. ನೇರ ನಡೆ, ನುಡಿ ಹೊಂದಿದ್ದ ಶ್ರೀಗಳು, ಅಕ್ಷರ ಕ್ರಾಂತಿಯ ಮೂಲಕ ಭಕ್ತರಲ್ಲಿ ಅಂಧಕಾರ, ಮೌಢ್ಯ ಹೋಗಲಾಡಿಸಲು ಈವರೆಗೆ ಶ್ರಮಿಸಿದರುವುದು ಅವಿಸ್ಮರಣೀಯ.

ಗುರುಮಠಕಲ್: ತಾಲೂಕಿನ ಅರಕೇರಾ ಬ್ರಹ್ಮವಿದ್ಯಾಶ್ರಮದ ಸಿದ್ಧಲಿಂಗ ಸ್ವಾಮೀಜಿ ಲಿಂಗೈಕ್ಯರಾಗಿದ್ದಾರೆ. ಇಂದು ಬೆಳಗ್ಗೆ ಎದೆನೋವು ಕಾಣಸಿಕೊಂಡಿದ್ದರಿಂದ ಆಸ್ಪತ್ರೆಗೆ ದಾಖಲಿಸುವ ಮಾರ್ಗ ಮಧ್ಯೆ ಹೃದಯಾಘಾತದಿಂದ ಶಿವೈಕ್ಯರಾಗಿದ್ದಾರೆ.

ಶನಿವಾರ ಸಿದ್ಧಾರೂಢ ಆಶ್ರಮದ ವಿಧಿವಿಧಾನದಂತೆ ಶ್ರೀಗಳ ಅಂತ್ಯಕ್ರಿಯೆ ಜರುಗಲಿದೆ ಎಂದು ಆಶ್ರಮದ ಮೂಲಗಳು ತಿಳಿಸಿವೆ. ಶ್ರೀಗಳ ಅಕಾಲಿಕ ಅಗಲಿಕೆಯಿಂದ ಅಪಾರ ಭಕ್ತರು ದುಃಖ ತಪ್ತರಾಗಿದ್ದಾರೆ. ಅಕ್ಟೋಬರ್ 2, 1972 ರಲ್ಲಿ ಯಾದಗಿರಿ ತಾಲೂಕಿನ ಬಾಚವಾರದಲ್ಲಿ ಮಾತೋಶ್ರೀ ಅನಂತಮ್ಮ ಶರಣಪ್ಪರ ಉದರದಲ್ಲಿ ಜನಿಸಿದ್ದ ಇವರು, ಬಾಲ ಬ್ರಹ್ಮಚಾರಿಯಾಗಿ 1986 ರಲ್ಲಿ ತಮ್ಮ 14 ನೇ ವಯಸ್ಸಿನಲ್ಲಿ ಬಸವಾನಂದ ಮಹಾಸ್ವಾಮೀಜಿಯಿಂದ ದೀಕ್ಷೆ ಪಡೆದರು.

ಸಿದ್ಧಲಿಂಗ ಮಹಾಸ್ವಾಮೀಜಿ

ಮೊದಲು ಹುಟ್ಟೂರು ಬಾಚವಾರದಲ್ಲಿಯೇ ಮಠವೊಂದನ್ನು ಆರಂಭಿಸಿದ್ದ ಶ್ರೀ, 2000-01 ರಲ್ಲಿ ಅರಕೇರಾವನ್ನು ‘ಅರಿವಿನ ಕೆರೆ’ಯಾಗಿ ಪರಿವರ್ತಿಸಲು ಹಾಗೂ ಅಕ್ಷರ ಕ್ರಾಂತಿಯ ಮೂಲಕ ಭಕ್ತರಲ್ಲಿ ಅಂಧಕಾರ, ಮೌಢ್ಯ ಹೋಗಲಾಡಿಸಲು ಈವರೆಗೆ ಶ್ರಮಿಸಿರುವುದು ಅವಿಸ್ಮರಣೀಯ.

ಆರೂಢರ ಸ್ಮರಿಸಿ ಸಾವಿರಾರು ವಚನ, ಆಧ್ಯಾತ್ಮಿಕ ಗ್ರಂಥಗಳನ್ನು ಬರೆದಿದ್ದಾರೆ. ಜ್ಞಾನ ಭಾಸ್ಕರ, ಆರೂಢರ ವಚನಾಮೃತ, ಸಹಸ್ರ ನುಡಿ ಮುತ್ತುಗಳು, ಸಂತರ ಸಂದೇಶ, ಮರಣದಿಂ(ದ) ಮುನ್ನೇನು, ಕಥಾಮೃತಧಾರೆ, ಸುಖದ ಸೂತ್ರ, ಸ್ತೋತ್ರಮಾಲೆ ಹಾಗೂ ಶ್ರೀ ಆರೂಢರ ಸಾಕ್ಷಾತ್ಕಾರ ಹೀಗೆ ಸಾಕಷ್ಟು ಜ್ಞಾನ ಭಂಡಾರವನ್ನೇ ಭಕ್ತರಿಗೆ ಉಣಬಡಿಸಿದ್ದಾರೆ.

ಸಿದ್ಧಲಿಂಗ ಮಹಾಸ್ವಾಮೀಜಿ ಶಿವೈಕ್ಯ