ಧೈರ್ಯ ಇದ್ದರೇ ಯತ್ನಾಳ್​ ಬಹಿರಂಗವಾಗಿ ಉತ್ತರ ನೀಡಲಿ.. ಅಪ್ಪು ಪಟ್ಟಣಶೆಟ್ಟಿ ಸವಾಲು

ಸ್ವಪಕ್ಷೀಯ ಮಾಜಿ ಸಚಿವನನ್ನ ಬೀದಿ ನಾಯಿಗೆ ಹೋಲಿಸಿದ್ದ ಶಾಸಕ‌ ಬಸನಗೌಡ ಯತ್ನಾಳ್​ರಿಗೆ ಮಾಜಿ ಸಚಿವ ಅಪ್ಪು ಪಟ್ಟಣ ಶೆಟ್ಟಿ ಖಾರವಾಗಿ ಪ್ರತಿಕ್ರಿಯಿಸಿದ್ದಾರೆ.

ವಿಜಯಪುರ: ನಿನ್ನೆ ಸುದ್ದಿಗೋಷ್ಠಿ ನಡೆಸಿದ್ದ ಅಪ್ಪು ಪಟ್ಟಣಶೆಟ್ಟಿ ಶಾಸಕ ಯತ್ನಾಳ್‌ ವಿರುದ್ಧ ಹತ್ತಾರು ಆರೋಪಗಳನ್ನ ಮಾಡಿದ್ದರು. ಇದಕ್ಕೆ ಪ್ರತಿಕ್ರಿಯೆ ನೀಡಲು ನಿರಾಕರಿಸಿದ್ದ ಶಾಸಕ ಯತ್ನಾಳ್‌, ಬೀದಿನಾಯಿಗಳ ಹೇಳಿಕೆಗೆ ಪ್ರತಿಕ್ರಿಯೆ ನೀಡಲ್ಲ ಎಂದಿದ್ದರು. ಈ ಹೇಳಿಕೆಯಿಂದ ಕೆಂಡಾಮಂಡಲರಾದ ಅಪ್ಪು ಪಟ್ಟಣಶೆಟ್ಟಿ ಖಾರವಾಗಿ ಪ್ರತ್ರಿಯಿಸಿದ್ದಾರೆ. ಯತ್ನಾಳ್‌ ನಾನು ಮಾಡಿದ ಆರೋಪಗಳಿಗೆ ಸುದ್ದಿಗೋಷ್ಠಿ ನಡೆಸಿ ಉತ್ತರ ನೀಡಲಿ ಎಂದು ಸವಾಲು ಹಾಕಿದ್ದಾರೆ.

ನಗರದಲ್ಲಿಂದು‌ ಮಾಧ್ಯಮಗಳ ಜೊತೆ ಮಾತನಾಡಿದ ಅವರು ಅಪ್ಪು ಪಟ್ಟಣಶೆಟ್ಟಿ, ಶಾಸಕ ಯತ್ನಾಳ್​ಗೆ ಧೈರ್ಯ, ತಾಕತ್ತು ಇದ್ದರೇ ಸುದ್ದಿಗೋಷ್ಠಿ ನಡೆಸಿ ಉತ್ತರ ಕೊಡಲಿ ಎಂದು ಪ್ರತಿ ಸವಾಲ್ ಹಾಕಿದರು. ಈ ಹಿಂದೆ ಇದೇ ಯತ್ನಾಳ್‌ ಯಡಿಯೂರಪ್ಪ ವಿರುದ್ಧ ಮಾತನಾಡಿದ್ದಾರೆ. ಈಗ ಮತ್ತೆ ಬಿಜೆಪಿ ನಾಯಕರ ವಿರುದ್ಧ ಮಾತನಾಡೋಕೆ ಶುರು ಮಾಡಿದ್ದಾರೆ. ಅಲ್ಲದೆ ಪ್ರಧಾನಿ ಮೋದಿ ಅವರ ವಿರುದ್ಧವೂ ಪರೋಕ್ಷ ವಾಗ್ದಾಳಿ ನಡೆಸಿದ ಯತ್ನಾಳರನ್ನ ಇಲ್ಲಿಗೆ ಬಿಡೋದಿಲ್ಲ ಎಂದು ಹರಿಹಾಯ್ದರು.

ಯತ್ನಾಳ್​​ ಮುಖವಾಡ ಬಯಲಿಗೆ ತರೋವರೆಗೆ ಅವರನ್ನ ಬಿಡಲ್ಲ. ಇದು ಬಿಜೆಪಿ ವರ್ಸಸ್‌ ಬಿಜೆಪಿ ಅಲ್ಲ. ಅಪ್ಪು ವರ್ಸಸ್‌ ಯತ್ನಾಳ್‌. ಇದರಿಂದ ಪಕ್ಷಕ್ಕೆ ಡ್ಯಾಮೇಜ್‌ ಆಗಲ್ಲ. ನನ್ನ ಹಾಗೂ ಯತ್ನಾಳ್‌ ನಡುವೆ ದ್ವೇಷ, ರಾಜ್ಯ ನಾಯಕರಿಗೂ ಗೊತ್ತಿದೆ ಎಂದರು.