ಪ್ರಧಾನಿ ಕರ್ನಾಟಕ ಜನರ ಭಾವನೆಗಳಿಗೆ ಅವಮಾನ ಮಾಡೋಲ್ಲ: ಶಾಸಕ ಯತ್ನಾಳ

ಕೇಂದ್ರ ಗೃಹ ಹಾಗೂ ಹಣಕಾಸು ಸಚಿವರು ರಾಜ್ಯಕ್ಕೆ ಬಂದು ನೆರೆ ಸಂತ್ರಸ್ತರ ಪರಿಸ್ಥಿತಿ ಅವಲೋಕಿಸಿದ್ದಾರೆ. ರಾಜ್ಯಕ್ಕೆ ನೆರೆ ಪರಿಹಾರದ ಅಗತ್ಯವಿದೆ. ಇನ್ನೆರಡು ದಿನದಲ್ಲಿ ಪ್ರಾಧಾನಿ ಮೋದಿ ನೂರಕ್ಕೆ ನೂರರಷ್ಟು‌ ನೆರೆ ಪರಿಹಾರ ಕೊಟ್ಟೇ ಕೊಡ್ತಾರೆ. ಅವರು ಕರ್ನಾಟಕದ ಜನರ ಭಾವನೆಯನ್ನು ನೋಯಿಸುವುದಿಲ್ಲ ಎಂದು‌ ಶಾಸಕ ಬಸನಗೌಡ ಪಾಟೀಲ್​ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ವಿಜಯಪುರ: ಇನ್ನು ಎರಡು ದಿನದಲ್ಲಿ ನೂರಕ್ಕೆ ನೂರರಷ್ಟು‌ ನೆರೆ ಪರಿಹಾರ ಕೊಟ್ಟೇ ಕೊಡ್ತಾರೆ. ಪ್ರಧಾನಿಗಳು ಯಾವುದೇ ರೀತಿ ಕರ್ನಾಟಕದ ಜನರ ಭಾವನೆಗಳಿಗೆ ಅವಮಾನ ಮಾಡೋದಿಲ್ಲ ಎಂದು‌ ಶಾಸಕ ಬಸನಗೌಡ ಪಾಟೀಲ್​ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ನಗರದಲ್ಲಿ ಮಾತನಾಡಿದ‌ ಅವರು, ರಾಜ್ಯಕ್ಕೆ ಕೇಂದ್ರ ಗೃಹ ಹಾಗೂ ಹಣಕಾಸು ಸಚಿವರು ಬಂದು ಸಂತ್ರಸ್ತರ ಪರಿಸ್ಥಿತಿ ಅವಲೋಕಿಸಿದ್ದಾರೆ. ಕೇಂದ್ರ ಗೃಹ ಮಂತ್ರಿಗಳು ವೈಮಾನಿಕ ಸಮೀಕ್ಷೆ ಮಾಡಿದ್ದಾರೆ. ಇಷ್ಟೆಲ್ಲಾ ಸಾಕ್ಷಾಧಾರಗಳು ಇರುವಾಗ ಅಂತಿಮ ಪರಿಹಾರ ಕೇಳುತ್ತಿದ್ದೇವೆ. ಕೇಂದ್ರ ಸರ್ಕಾರ ತಕ್ಷಣವೇ 5 ಸಾವಿರ ಕೋಟಿ ರೂ. ನೆರೆ ಪರಿಹಾರ ರಾಜ್ಯಕ್ಕೆ ಬಿಡುಗಡೆ ಮಾಡಬೇಕು. ಇಷ್ಟೆಲ್ಲಾ ಗೊಂದಲಗಳ ‌ನಡುವೆ ಮುಖ್ಯಮಂತ್ರಿಗಳು ಬೆಳಗಾವಿ ನೆರೆ ಪೀಡಿತ ಪ್ರದೇಶಗಳಿಗೆ‌ ಭೇಟಿ ನೀಡಿದ್ದಾರೆ. ಅವರಿಗೂ ಕಳಕಳಿ ಇದೆ. ಕೇಂದ್ರ ಸರ್ಕಾರ ಕೂಡ ಇದಕ್ಕೆ ಸ್ಪಂದನೆ ನೀಡಬೇಕು ಎಂದರು.

ರಾಜ್ಯದ ಮೂರು ಜನ ಕೇಂದ್ರ ಸಚಿವರು ಇನ್ನುಳಿದ ಸಂಸದರನ್ನು ಕರೆದುಕೊಂಡು ಹೋಗಿ ಕೆಲಸ ಮಾಡಲಿ. ರಾಜ್ಯ ನೆರೆ ಪರಿಹಾರಕ್ಕೆ ಬೇಕಾಗುವಷ್ಟು ದುಡ್ಡು ರಾಜ್ಯ ಸರ್ಕಾರದಲ್ಲಿ ಇಲ್ಲ. ಅಷ್ಟೆಲ್ಲಾ ನಿರ್ವಹಣೆ ಆಗಬೇಕಾದರೆ ಕೇಂದ್ರ ಸರ್ಕಾರ ನೆರವಿಗೆ ಬರಬೇಕು ಎಂದು ಹೇಳಿದರು.

ರಾಜ್ಯ ಸರ್ಕಾರ ಹಣಕಾಸಿನ ದಿವಾಳಿತನದಲ್ಲಿ ಇಲ್ಲ. ಹಿಂದಿನ‌ ಸರ್ಕಾರದ ಸಾಲ ಮನ್ನಾ ಮಾಡೋದಕ್ಕೆ ಒಂದು‌ ಮಿತಿ ಇರಬೇಕಿತ್ತು. 54 ಸಾವಿರ ಕೋಟಿ ರೂ. ಸಾಲ ಮನ್ನಾ ಮಾಡಿ ಕುಮಾರಸ್ವಾಮಿ ಓಡಿ ಹೋಗಿ ಬಿಟ್ರು. ಸಿದ್ದರಾಮಯ್ಯ ರಾಜ್ಯ ಸರ್ಕಾರ ದಿವಾಳಿಯಾಗಿದೆ ಎಂದು ಹೇಳುತ್ತಿದ್ದಾರೆ. ಇವರೆಲ್ಲಾ ಸೇರಿ ಆರು ವರ್ಷದಲ್ಲಿ ದಿವಾಳಿ ಮಾಡಿದ್ದಾರೆ. ಸದ್ಯ ಸರ್ಕಾರ ಹಣಕಾಸಿನ‌ ದಿವಾಳಿತನದಲ್ಲಿ ಇಲ್ಲ. ಕರ್ನಾಟಕಕ್ಕೆ ಸೀಮಿತವಾಗಿ ಕೆಲಸ ಮಾಡಲು ಹಣವಿದೆ ಎಂದು ಮಾಧ್ಯಮದೊಂದಿಗೆ ಅಭಿಪ್ರಾಯ ಹಂಚಿಕೊಂಡರು.