ವಿಜಯಪುರಕ್ಕೂ ಸಚಿವ ಸ್ಥಾನ ನೀಡಿ: ಶಾಸಕ ಯತ್ನಾಳ್​ ಒತ್ತಾಯ

ಪ್ರತಿ ಸಲ ವಿಜಯಪುರ ಜಿಲ್ಲೆಗೆ ರಾಜಕೀಯ ಸ್ಥಾನಮಾನ ನೀಡುವಲ್ಲಿ ಅನ್ಯಾಯವಾಗುತ್ತಿದೆ. ಮುಂಬರುವ ಸಿಂದಗಿ ಉಪಚುನಾವಣೆ ಗೆಲ್ಲಬೇಕಾದರೆ ಜಿಲ್ಲೆಗೆ ಕನಿಷ್ಠ ಒಂದು ಸಚಿವ ಸ್ಥಾನವನ್ನಾದರೂ ನೀಡಿ ಎಂದು ಸರ್ಕಾರಕ್ಕೆ ಶಾಸಕ ಬಸನಗೌಡ ಪಾಟೀಲ್​ ಆಗ್ರಹಿಸಿದ್ದಾರೆ.

ವಿಜಯಪುರ: ಮುಂಬರುವ ಸಿಂದಗಿ ಉಪಚುನಾವಣೆ ಗೆಲ್ಲಬೇಕಾದರೆ ವಿಜಯಪುರ ಜಿಲ್ಲೆಗೆ ಕನಿಷ್ಠ ಒಂದು ಸಚಿವ ಸ್ಥಾನ ಕೊಟ್ಟು ಸಮಾಜಿಕ ನ್ಯಾಯ ಒದಗಿಸಬೇಕೆಂದು ಎಂದು ಶಾಸಕ ಬಸನಗೌಡ ಪಾಟೀಲ್​ ಸರ್ಕಾರಕ್ಕೆ ಒತ್ತಾಯಿಸಿದರು‌.

ನಗರದಲ್ಲಿ ವಿವಿಧ ಕಾಮಗಾರಿಗಳಿಗೆ ಗುದ್ದಲಿ ಪೂಜೆ ನೆರವೇರಿಸಿದ ನಂತರ ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ಈ ಹಿಂದೆ ಪಕ್ಷದಿಂದ ಟಿಕೇಟ್ ದೊರೆಯದಿದ್ದಾಗ, ಎಂಎಲ್​ಸಿ ಚುನಾವಣೆಗೆ ಸ್ಪರ್ಧಿಸಿ ಗೆದ್ದಿದ್ದೇನೆ. ಆದರೆ ಪ್ರತಿಸಲ ಎಂಎಲ್​ಸಿ ಚುನಾವಣೆ ಬಂದಾಗ ಇರುವ ಎರಡು ಸೀಟು ಬಾಗಲಕೋಟೆಯವರ ಪಾಲಾಗುತ್ತಿತ್ತು. ಎಂಎಲ್​ಸಿ ಸ್ಥಾನ ಇರುವುದು ಅವಳಿ ಜಿಲ್ಲೆಗಳ ಪಾಲಿಗೆ, ಕೇವಲ ಬಾಗಲಕೋಟೆಗೆ ಸಿಕ್ಕರೆ ಹೇಗೆ?. ಇದೇ ಕಾರಣಕ್ಕೆ ಪಕ್ಷೇತರನಾಗಿ ನಿಂತು ಗೆದ್ದ ಮೇಲೆ ಈ ಭಾಗದ ಜನರು ಸ್ವಾಭಿಮಾನದಿಂದ ಗೆಲ್ಲಿಸಿದ್ದಾರೆ ಎಂದು ಹೇಳಿದರು.

ಈಗಲೂ ಸಚಿವ ಸ್ಥಾನದ ವಿಚಾರದಲ್ಲಿ ವಿಜಯಪುರ ಜಿಲ್ಲೆಗೆ ಅನ್ಯಾಯವಾಗಿದೆ. ಬಾಗಲಕೋಟೆ, ಶಿವಮೊಗ್ಗ ಸೇರಿ ಕೆಲ ಜಿಲ್ಲೆಯವರಿಗೆ ಎರಡೆರಡು ಸಚಿವ ಸ್ಥಾನ ನೀಡುತ್ತಿದ್ದಾರೆ. ಯಾಕೆ ಉಳಿದ ಜಿಲ್ಲೆಯವರು ಮತ ಹಾಕಿಲ್ವಾ? ಎಂದು ಪ್ರಶ್ನಿಸಿದರು.

ಅರುಣ್​ ಶಹಾಪುರಗೆ ತರಾಟೆ: ಶಿಕ್ಷಣ ಕ್ಷೇತ್ರದಲ್ಲಿ ಸಾಕಷ್ಟು ಕೆಲಸವಿದೆ. ಅದನ್ನು ಸುಧಾರಿಸುವ ಬದಲು ಶಾಸಕ ನಡಹಳ್ಳಿಗೆ ಸಚಿವ ಸ್ಥಾನ ನೀಡಬೇಕೆಂದು ಹೇಳಿಕೆ ನೀಡುತ್ತಿರುವುದು ಅನಾವಶ್ಯಕ ವಿಷಯ ಎಂದು ಎಮ್​ಎಲ್​ಸಿ ಅರುಣ್​ ಶಹಾಪುರ ವಿರುದ್ಧ ಯತ್ನಾಳ್ ಗುಡುಗಿದರು.