ಪಂಚಮಸಾಲಿ ಸಮಾಜದ ಮೂಲ ಪೀಠ ಹರಿಹರದ್ದು: ಸಂಗನಬಸವ ಸ್ವಾಮೀಜಿ

ಪಂಚಮಸಾಲಿ ಸಮಾಜದ ಮೂಲ ಪೀಠ ಹರಿಹರ ಪೀಠ ಎಂದು ಮನಗೂಳಿಯ ಸಂಗನಬಸವ ಸ್ವಾಮೀಜಿ ಹೇಳಿದರು.

ವಿಜಯಪುರ:ಪಂಚಮಸಾಲಿ ಸಮಾಜದ ಮೂಲ ಪೀಠ ಹರಿಹರ ಪೀಠ ಎಂದು ಮನಗೂಳಿಯ ಸಂಗನಬಸವ ಸ್ವಾಮೀಜಿ ಹೇಳಿದ್ದಾರೆ. ಫೆ.13ರಂದು ಬಾಗಲಕೋಟೆ ಜಿಲ್ಲೆಯ ಜಮಖಂಡಿ ತಾಲೂಕಿನ ಆಲಗೂರದಲ್ಲಿ ಸ್ಥಾಪನೆಯಾಗುತ್ತಿರುವ ಪಂಚಮಸಾಲಿ ಸಮಾಜದ ಮೂರನೇ ಪೀಠ ವಿಚಾರವಾಗಿ ವಿಜಯಪುರದಲ್ಲಿಂದು ಶ್ರೀಗಳು ಮಾತನಾಡಿದರು. ರಾಜ್ಯದಲ್ಲಿ ಒಂದೇ ಸಮಾಜದ ಮೂರು ಪೀಠ ಆಗುತ್ತಿದೆ. ಆದರೆ, ಮೂಲ ಪೀಠ ಹರಿಹರ ಪೀಠ ಅಂತ ಹೇಳೋಕೆ ಇಚ್ಛೆ ಪಡುತ್ತೇನೆ ಎಂದರು.

ಕೂಡಲ ಸಂಗಮ ಪೀಠ ಸಮಾಜದ ಮೂಲ ಪೀಠ ಎಂದು ಶಾಸಕ ಬಸನಗೌಡ ಪಾಟೀಲ ಯತ್ನಾಳ ಹೇಳಿಕೆಗೆ ಪ್ರತಿಕ್ರಿಯಿಸಿ, 10 ಲಕ್ಷ ಜನರನ್ನು ಕೂಡಿಸಿ ಹರಿಹರ ಪೀಠ ಮಾಡಲಾಗಿದೆ. ಹಾಗಾಗಿ ಮೂಲ ಪೀಠ ಹರಿಹರ ಪೀಠ ಎಂದು ಪುನರುಚ್ಚರಿಸಿದರು.

ಮನಗೂಳಿ ಮಹಾಂತ ಸ್ವಾಮೀಜಿಗಳ ಬಹಳ ದಿನದ ಕನಸು ಈ ಮೂರನೇ ಪೀಠ ಸ್ಥಾಪಿಸುವುದಾಗಿತ್ತು. ಇವರು 14 ಭಾಷೆ ಮಾತಾಡುತ್ತಿದ್ರು, ಎಷ್ಟೋ ಪೀಠಾಧ್ಯಕ್ಷ ಸ್ಥಾನ ಬಂದ್ರೂ ಅವರು ನಿರಾಕರಿಸಿದ್ದರು ಎಂದರು. ಕೂಡಲಸಂಗಮ ಪೀಠದ ಬಸವಜಯ ಮೃತ್ಯುಂಜಯ ಸ್ವಾಮೀಜಿಗಳಿಗೂ ಆಹ್ವಾನ ಕೊಡುತ್ತೇವೆ. ಬರೋದು ಬಿಡೋದು ಅವರಿಗೆ ಬಿಟ್ಟಿದ್ದು. ನಿನ್ನೆ ಅವರು ನಮ್ಮ ಸಂಪರ್ಕಕ್ಕೆ ಸಿಕ್ಕಿಲ್ಲ. ಇಂದು ನಾಳೆ ಸಂಪರ್ಕಿಸುತ್ತೇವೆ ಎಂದರು.

ಶಾಸಕ ಬಸನಗೌಡ ಪಾಟೀಲ ಯತ್ನಾಳ ಅವರಿಗೆ ಕಾರ್ಯಕ್ರಮಕ್ಕೆ ಆಹ್ವಾನ ನೀಡುವ ವಿಚಾರವಾಗಿ ಪ್ರತಿಕ್ರಿಯೆ ನೀಡಿ, ಅವರು ನಮ್ಮ ಸಮಾಜದವರು. ಅವರಿಗೆ ಆಹ್ವಾನ ಕೊಡ್ತೇವೆ. ಸಮಯ ಸಿಕ್ಕಿಲ್ಲ, ಅವರಿಗೆ ಆಹ್ವಾನ ಕೊಡಲಿದ್ದೇವೆ ಎಂದು ಸ್ಪಷ್ಟಪಡಿಸಿದರು. ಅವರು ರಾಜಕೀಯ ವ್ಯಕ್ತಿಗಳು, ಬೆಂಗಳೂರು, ಬೆಳಗಾವಿಗೆ ಹೋಗಿರಬೇಕು. ಅವರ ನಂಬರ್​ಗೆ ಸಂಪರ್ಕಿಸಿದ್ದೇವೆ. ಆದರೆ ಸಂಪರ್ಕಕ್ಕೆ ಸಿಕ್ಕಿಲ್ಲ ಎಂದರು. ಮೂರನೇ ಪೀಠ ಸಚಿವ ನಿರಾಣಿಯವರ ಪೀಠ ಅಲ್ಲ. ನಿರಾಣಿಯವರ ಮನೆಗೆ ಯಾರೇ ಸ್ವಾಮೀಜಿಗಳು ಬರಲಿ, ಎಲ್ಲರನ್ನೂ ಗೌರವದಿಂದ ಕಾಣುತ್ತಾರೆ ಎಂದರು.

ಇದನ್ನೂ ಓದಿ:3ನೇ ಪಂಚಮಸಾಲಿ ಪೀಠ ವಿಚಾರ.. ಕೂಡಲಸಂಗಮ ಸ್ವಾಮೀಜಿಗಳ ವಿರುದ್ಧ ಮನಗೂಳಿ‌ ಸ್ವಾಮೀಜಿ ಆಕ್ರೋಶ..

ಇದು ನಿರಾಣಿ ಪೀಠ ಎಂಬ ಯತ್ನಾಳ್ ಹೇಳಿಕೆಗೆ ಪ್ರತಿಕ್ರಿಯಿಸಿ, ಸಂಗಮೇಶ ನಿರಾಣಿ ಒಬ್ಬ ಭಕ್ತರಾಗಿ ಬಂದಿದ್ದಾರೆ. ಸಂಗಮೇಶ ನಿರಾಣಿ ಅವರಲ್ಲಿ ನಮ್ಮ ಕಾರ್ಯಕ್ರಮಕ್ಕೆ ಬನ್ನಿ ಎಂದು ಆಹ್ವಾನಿಸಿದ್ದೆವು. ಅವರು ಒಪ್ಪಿಗೆ ಸೂಚಿಸಿ ನಮ್ಮ ಕಾರ್ಯಕ್ರಮಕ್ಕೆ ಬಂದು ಭಾಗಿಯಾಗಿದ್ದರು ಎಂದು ಸ್ಪಷ್ಟಪಡಿಸಿದರು.