ನಿಲ್ಲದ ಕೊರೊನಾ ಕಾಟ... ಸರ್ಕಾರಿ ಕಚೇರಿಗಳಿಗೆ ಬರಲು ಸಾರ್ವಜನಿಕರ ಹಿಂದೇಟು

ವಿಜಯಪುರ ನಗರದ ಪೊಲೀಸ್ ವರಿಷ್ಠಾಧಿಕಾರಿ ಕಚೇರಿ, ಮಹಾನಗರ ಪಾಲಿಕೆ, ಕಂದಾಯ ಇಲಾಖೆ, ನೀರು ಸರಬರಾಜು ಮಂಡಳಿ, ಕೆಇಬಿ ಹೀಗೆ ಹೆಚ್ಚು ಸಾರ್ವಜನಿಕರು ಅಲೆದಾಡುವ ಹಲವಾರು ಕಚೇರಿಗಳು ಕೊರೊನಾ ಸೋಂಕಿನಿಂದಾಗಿ ಸೀಲ್ ಡೌನ್​ ಆಗಿವೆ.

ವಿಜಯಪುರ: ಕೊರೊನಾ ಮಹಾಮಾರಿ ಸರ್ಕಾರಿ ಕಚೇರಿಗಳನ್ನು ಬೆಂಬಿಡದೆ ಕಾಡುತ್ತಿದೆ. ಕೇವಲ ಎರಡು ಕಚೇರಿಗೆ ಸೀಮಿತವಾಗಿದ್ದ ಸೀಲ್ ಡೌನ್ ಪ್ರಕ್ರಿಯೆ ಈಗ ಸಾರ್ವಜನಿಕರು ಹೆಚ್ಚು ಸಂಪರ್ಕಿಸುವ ಸರ್ಕಾರಿ ಕಚೇರಿಗಳಿಗೂ ಹಬ್ಬಿದ್ದು, ಸಾಕಷ್ಟು ಆತಂಕ ಮೂಡಿಸಿದೆ. ಕೆಲಸ ಮಾಡುವ ನೌಕರರು, ಕಚೇರಿಗೆ ಬರುವ ಸಾರ್ವಜನಿಕರಲ್ಲಿಯೂ ಕೊರೊನಾ ತಗಲುವ ಆತಂಕ ಶುರುವಾಗಿದೆ.

ನಗರದ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಕಚೇರಿ, ಮಹಾನಗರ ಪಾಲಿಕೆ, ಕಂದಾಯ ಇಲಾಖೆ, ನೀರು ಸರಬರಾಜು ಮಂಡಳಿ, ಕೆಇಬಿ ಹೀಗೆ ಹೆಚ್ಚು ಸಾರ್ವಜನಿಕರು ಅಲೆದಾಡುವ ಹಲವಾರು ಕಚೇರಿಗಳು ಕೊರೊನಾ ಸೋಂಕಿನಿಂದಾಗಿ ಸೀಲ್ ಡೌನ್​ ಆಗಿವೆ. ಜಿಲ್ಲೆಯ ಪೊಲೀಸ್ ಇಲಾಖೆಯಲ್ಲಿ ಇಲ್ಲಿಯವರೆಗೆ 14 ಪೊಲೀಸ್ ಸಿಬ್ಬಂದಿಗೆ ಸೋಂಕು ತಗುಲಿದೆ. ಸ್ವತಃ ಎಸ್​ಪಿ ಅನುಪಮ್ ಅಗರವಾಲ್ ಹೋಂ ಕ್ವಾರಂಟೈನ್ ಮುಗಿಸಿ ಬಂದಿದ್ದಾರೆ. ತಹಸೀಲ್ದಾರ್ ಕಚೇರಿಯ ನಾಲ್ವರಿಗೆ ಕೊರೊನಾ ಇರುವುದು ದೃಢವಾಗಿದ್ದು, ಕಚೇರಿಯನ್ನು ಈಗಾಗಲೇ ಸೀಲ್ ಡೌನ್ ಮಾಡಲಾಗಿದೆ.

ವಿಜಯಪುರ ನಗರದ ಹೃದಯ ಭಾಗದಲ್ಲಿರುವ ಮಹಾನಗರ ಪಾಲಿಕೆ ಕಚೇರಿಯಲ್ಲಿಯೂ ಕೊರೊನಾ ಆರ್ಭಟ ಜೋರಾಗಿದೆ‌. ಇಲ್ಲಿ ಸ್ವಯಂ ಪ್ರೇರಿತರಾಗಿ ಒಟ್ಟು 900 ಸಿಬ್ಬಂದಿ, ಪೌರಕಾರ್ಮಿಕರ ಸ್ವ್ಯಾಬ್ ಟೆಸ್ಟ್ ಮಾಡಿಸಲಾಗಿದೆ. ಇದರಲ್ಲಿ ಒಟ್ಟು 23 ಜನರಲ್ಲಿ ಕೊರೊನಾ ಸೋಂಕು ದೃಢಪಟ್ಟಿದೆ. ಇವರಲ್ಲಿ 18 ಜನ ಸಿಬ್ಬಂದಿ, ಐದು ಜನ ಪೌರಕಾರ್ಮಿಕರಿಗೆ ಸೋಂಕು ದೃಢಪಟ್ಟಿದೆ. ಹೀಗಾಗಿ ಮಹಾನಗರ ಪಾಲಿಕೆಗೆ ಸೋಂಕು ನಿವಾರಕ ದ್ರಾವಣ ಸಿಂಪಡಣೆ ಮಾಡಿದ್ದು, ನಾಳೆಯಿಂದ ಎಂದಿನಂತೆ ಕಾರ್ಯನಿರ್ವಹಿಸಲಿದೆ. ನೀರು ಸರಬರಾಜು ಮಂಡಳಿಯಲ್ಲಿ 6 ಸಿಬ್ಬಂದಿಗೆ ಸೋಂಕು ತಗುಲಿದೆ.

ಜಿಲ್ಲೆಯಲ್ಲಿ ಕಂಟೈನ್ಮೆಂಟ್ ವಲಯ ಹೊರತುಪಡಿಸಿಯೂ ಪಾಸಿಟಿವ್ ಪ್ರಕರಣ ಹೆಚ್ಚಾಗಿ ದಾಖಲಾಗಿವೆ. ಇಲ್ಲಿಯವರೆಗೆ 896 ಪಾಸಿಟಿವ್ ಪ್ರಕರಣಗಗಳು ದಾಖಲಾಗಿವೆ. ಇನ್ನೂ 3384 ಜನರ ವರದಿ ಬರಬೇಕಿದೆ.