ಪಂಚಮಸಾಲಿ ಸಮಾಜಕ್ಕೆ 2ಎ ಮೀಸಲಾತಿ ನೀಡದಿದ್ದರೆ 25 ಲಕ್ಷ ಜನರಿಂದ ಉಗ್ರ ಹೋರಾಟ: ಬಸವ ಜಯ ಮೃತ್ಯುಂಜಯ ಶ್ರೀ

ಪಂಚಮಸಾಲಿ ಸಮಾಜಕ್ಕೆ 2ಎ ಮೀಸಲಾತಿ ನೀಡದಿದ್ದರೆ 25 ಲಕ್ಷ ಜನರಿಂದ ಉಗ್ರ ಹೋರಾಟ ನಡೆಸಲಾಗುವುದೆಂದು ಬಸವ ಜಯ ಮೃತ್ಯುಂಜಯ ಶ್ರೀ ಸರ್ಕಾರಕ್ಕೆ ಎಚ್ಚರಿಕೆ ನೀಡಿದ್ದಾರೆ.

ವಿಜಯಪುರ:ಪಂಚಮಸಾಲಿ ಸಮಾಜಕ್ಕೆ 2ಎ ಮೀಸಲಾತಿ ಘೋಷಣೆಗೆ ಗಡುವು ವಿಚಾರವಾಗಿ ಪ್ರತಿಕ್ರಿಯೆ ನೀಡಿರುವ ಬಸವ ಜಯ ಮೃತ್ಯುಂಜಯ ಶ್ರೀಗಳು ಸರ್ಕಾರಕ್ಕೆ ಮೂರು ಬಾರಿ ಗಡುವು ಕೊಟ್ಟಿದ್ವಿ. ಸರ್ಕಾರ ಮೂಗಿಗೆ ತುಪ್ಪ ಹಚ್ಚುತ್ತೇ ಅನ್ನಬಾರದು ಅಂತ ದಿಢೀರ್ ಸತ್ಯಾಗ್ರಹ ಆರಂಭಿಸಿ ಸರ್ಕಾರಕ್ಕೆ ಬಿಸಿ ಮುಟ್ಟಿಸುತ್ತೇವೆ ಎಂದರು.

ಗಡುವು ಕೊಟ್ಟಿದ್ದು ಮುಗಿದ ಅಧ್ಯಾಯವಾಗಿದೆ. ಇನ್ನೇನಿದ್ದರೂ ಮೀಸಲಾತಿ ಆದೇಶ ಪ್ರತಿ ಸಿಗುವವರೆಗೂ ಹೋರಾಟ ನಡೆಸಲಾಗುವುದು.‌ ಕೂಡಲಸಂಗಮದಲ್ಲಿ 14ದಿನ ವನವಾಸ ಮಾಡಿ, ಮಾನಸಿಕ ಸಂಕಲ್ಪ ಮಾಡಿದ್ದೇವೆ. ಪ್ರತಿ ಜಿಲ್ಲಾಧಿಕಾರಿ ಕಚೇರಿ ಮುಂದೆ ಉಪವಾಸ ಸತ್ಯಾಗ್ರಹ ಮಾಡಲು ನಿರ್ಧಾರ ಮಾಡಲಾಗಿದೆ ಎಂದರು.

ಮೀಸಲಾತಿ ಸಿಗದಿದ್ದರೆ ಸಿಎಂ‌ ಮನೆ ಎದುರು ಧರಣಿ ಸಹ ನಡೆಸಲಾಗುವುದು. ಅಲ್ಲಿಗೂ ಆಗದಿದ್ದರೆ ಬೆಂಗಳೂರಿನ ಫ್ರೀಡಂ ಪಾರ್ಕ್​ನಲ್ಲಿ ಸತ್ಯಾಗ್ರಹ ನಡೆಸಲಾಗುವುದು, ಕೊನೆಗೆ ಅದಕ್ಕೂ ಮಣಿಯದಿದ್ದರೂ 25 ಲಕ್ಷ ಜನ ಸೇರಿಸಿ ವಿಧಾನಸೌಧಕ್ಕೆ ಮುತ್ತಿಗೆ ಹಾಕ್ತೇವೆ ಎಂದರು.

ಓದಿ:ನಂಬಿಕೆ ಹುಸಿಯಾಗದಿರಲಿ.. 2ಎ ಮೀಸಲಾತಿ ಘೋಷಿಸಲು ಸಿಎಂಗೆ ಕೂಡಲಸಂಗಮ ಶ್ರೀ ಡೆಡ್​ಲೈನ್​

ಉಗ್ರವಾದ ಹೋರಾಟಕ್ಕೆ ಮಾನಸಿಕ ಸಿದ್ಧತೆ ಮಾಡಿಕೊಳ್ಳಲಾಗಿದೆ. 2022 ಇಸ್ವಿ ಮುಗಿಯುವುದರೊಳಗೆ ಮೀಸಲಾತಿ ಪಡೆದು ತೀರುತ್ತೇವೆ. ಆರ್​ಎಸ್​ಎಸ್​ನವರು ಪಂಚಮಸಾಲಿ ಸಮಾಜಕ್ಕೆ ನ್ಯಾಯ ಕೊಡುವಂತೆ ಸಕಾರಾತ್ಮಕ ಸಲಹೆ ಕೊಟ್ಟಿದ್ದಾರೆ. ಕೇಂದ್ರ ಸರ್ಕಾರಕ್ಕೂ ಮನವಿ ಕೊಡಲು ಸಲಹೆ ಕೊಟ್ಟಿದ್ದಾರೆ‌ ಎಂದರು.

ಸಿಎಂ ದೆಹಲಿಯತ್ತ ಬೊಟ್ಟು ಮಾಡಿದ್ರೆ ದೆಹಲಿಗೂ ಹೋಗುತ್ತೇವೆ. ಕೇಂದ್ರಕ್ಕೆ ಮನವರಿಕೆ ಮಾಡಿ ಎಂದರೆ ಸಮಾಜದವರೆಲ್ಲರೂ ದೆಹಲಿಗೆ ಹೋಗ್ತೇವೆ. ಅಮಿತ್ ಷಾ ಭೇಟಿ ಮಾಡುವ ಪ್ರಯತ್ನ ಮಾಡ್ತೇವೆ. ಎರಡು ತಿಂಗಳ ಸರ್ಕಾರದ ನಡುವಳಿಕೆ ನೋಡಿದಾಗ ಅನುಮಾನ ವ್ಯಕ್ತವಾಗಿ ಹೋರಾಟ ಮಾಡುತ್ತಿದ್ದೇವೆ ಎಂದು ಬಸವ ಜಯ ಸ್ವಾಮೀಜಿ ಹೇಳಿದರು.