ಬಹುಧಾನ್ಯ ಮಿಶ್ರಿತ ಪುಷ್ಟಿಯಲ್ಲಿ ಹುಳುಗಳು ಪತ್ತೆ: ಮನಗೂಳಿ ಅಂಗನವಾಡಿ ಕಾರ್ಯಕರ್ತರ ವಿರುದ್ಧ ಪೋಷಕರ ಆಕ್ರೋಶ

ಅಂಗನಾಡಿ ಕೇಂದ್ರದ ಆಹಾರ ಪುಷ್ಟಿಯಲ್ಲಿ ಹುಳುಗಳು ಪತ್ತೆ- ಮಕ್ಕಳ ಪೋಷಕರ ಆತಂಕ- ಕ್ರಮಕ್ಕೆ ಒತ್ತಾಯ

ವಿಜಯಪುರ:ಅಂಗನವಾಡಿ ಕೇಂದ್ರದಿಂದ ಮಕ್ಕಳಿಗೆ ನೀಡುವ ಪೌಷ್ಟಿಕ ಆಹಾರದಲ್ಲಿ ಹುಳಗಳು ಪತ್ತೆಯಾಗಿದ್ದು ಪೋಷಕರಲ್ಲಿ ಆತಂಕ ಸೃಷ್ಟಿಸಿದೆ. ಜಿಲ್ಲೆಯ ಬಸವನ ಬಾಗೇವಾಡಿ ತಾಲೂಕಿನ ಮನಗೂಳಿ ಪಟ್ಟಣದ ವಾರ್ಡ್‌ ನಂ 15ರ ಅಂಗನವಾಡಿ ಮೂಲಕ ಕಳಪೆ ಪುಷ್ಟಿ ಆಹಾರ ವಿತರಣೆಯಲ್ಲಿ ಈ ಅಚಾತುರ್ಯ ಕಂಡು ಬಂದಿದೆ.

ಮನಗೂಳಿ ಪಟ್ಟಣದ ಇಂದ್ರಾನಗರದಲ್ಲಿ ಕಳಪೆ ಆಹಾರ ವಿತರಿಸಿದ್ದು, 6 ತಿಂಗಳಿನಿಂದ 3 ವರ್ಷದ ಒಳಗಿನ ಮಕ್ಕಳಿಗೆ ವಿತರಣೆ ಆಗುವ ಬಹುಧಾನ್ಯ ಪುಡಿ ಮಿಶ್ರಿತ ಪುಷ್ಟಿ ಆಹಾರದಲ್ಲಿ ಹುಳ ಪತ್ತೆಯಾಗಿದೆ ಎಂದು ಪೋಷಕರು ಆರೋಪಿಸಿದ್ದಾರೆ.

ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆಯಿಂದ ನೀಡಲಾಗುವ ಪುಷ್ಟಿ ಆಹಾರ ಪ್ಯಾಕೆಟ್ ಸರಿಯಾಗಿ ಪ್ಯಾಕ್ ಮಾಡಿರಲಿಲ್ಲ. ಪುಷ್ಟಿಯಲ್ಲಿ ಹುಳು ಪತ್ತೆಯಾಗಿರುವ ಕಾರಣ ಪೋಷಕರು ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆ ಹಾಗೂ ಅಂಗನವಾಡಿ ಸಿಬ್ಬಂದಿ ವಿರುದ್ಧ ತಕ್ಷಣ ಕ್ರಮ ಕೈಗೊಳ್ಳಬೇಕು ಎಂದು ಒತ್ತಾಯಿಸಿದ್ದಾರೆ.

ರಾಜ್ಯದಲ್ಲಿ ಅಪಾರ ಸಂಖ್ಯೆಯಲ್ಲಿ ಮಕ್ಕಳಲ್ಲಿ ಅಪೌಷ್ಟಿಕತೆ ಕಂಡು ಬಂದ ಹಿನ್ನೆಲೆ ಸರ್ಕಾರ ಈ ಯೋಜನೆಯನ್ನು ರೂಪಿಸಿದೆ.‌ 6 ತಿಂಗಳಿಂದ ರಿಂದ 3 ವರ್ಷದೊಳಗೆ ಇರುವ ಮಕ್ಕಳಿಗೆ ಪುಷ್ಟಿ ಆಹಾರವನ್ನು ಪಾಕೆಟ್ ಮಾಡಿ ಮನೆಗೆ ಮನೆಗೆ ಅಂಗನವಾಡಿ ಸಿಬ್ಬಂದಿಗಳು ಹಂಚುತ್ತಿದ್ದಾರೆ.

ಆದರೆ ನಿನ್ನೆ ಮನಗೂಳಿಯ ವಾರ್ಡ್ ನಂ 15ರಲ್ಲಿ ಬಡ ಕುಟುಂಬದ ಮಕ್ಕಳಿಗೆ ಆಹಾರದ ಪಾಕೆಟ್ ವಿತರ಼ಣೆ ಮಾಡಲಾಗಿತ್ತು. ಅದರಲ್ಲಿ ಹುಳುಗಳು ಕಂಡು ಬಂದಿವೆ . ಹೀಗಾಗಿ ಮಕ್ಕಳಿಗೆ ಆಹಾರ ತಯಾರು ಮಾಡಿ ಪೋಷಕರು ಕೊಟ್ಟಿಲ್ಲ, ತೆಗೆದ ಪಾಕೆಟ್ ನ್ನು ತಂದು ಅಂಗನವಾಡಿ ಸಿಬ್ಬಂದಿಗೆ ವಾಪಸ್ ನೀಡಿ, ಈ ಅಚಾತುರ್ಯ ನಡೆದ ಬಗ್ಗೆ ಸ್ಪಷ್ಟನೆ ನೀಡಬೇಕು ಎಂದು ಒತ್ತಾಯಿಸಿದ್ದಾರೆ.

ಇದನ್ನೂಓದಿ:ಮಹಿಳೆಯ ಕಣ್ಣಿನಿಂದ ಹೊರ ಬರುತ್ತಿರುವ ಕಲ್ಲಿನ ಚೂರುಗಳು: ರೋಗಿ ಹೇಳಿದ್ದೇನು?