ಆಲಮಟ್ಟಿ ಜಲಾಶಯದ ನೀರಿನ ಮಟ್ಟ ಹೆಚ್ಚಳ

ಆಲಮಟ್ಟಿ ಜಲಾಶಯದ ಒಳಹರಿವು ಏರಿಕೆ ಕಂಡಿದ್ದು, ಇದೇ ರೀತಿ, ಒಳ ಹರಿವು ಹೆಚ್ಚಳವಾದರೆ ಈ ವರ್ಷ ಶೀಘ್ರ ನದಿ ತುಂಬುವ ಸಾಧ್ಯತೆಗಳಿವೆ.

ವಿಜಯಪುರ:ಮಹಾರಾಷ್ಟ್ರದ ಪಶ್ಚಿಮ ಘಟ್ಟದಲ್ಲಿ ಉತ್ತಮ ಮಳೆಯಾಗುತ್ತಿರುವ ಹಿನ್ನೆಲೆಯಲ್ಲಿ ರಾಜ್ಯದ ಆಲಮಟ್ಟಿ ಜಲಾಶಯದ ಒಳಹರಿವು ಹೆಚ್ಚಾಗಿದೆ.

ಕಳೆದ ಒಂದು ವಾರದಿಂದ ಒಳಹರಿವು ಗಣನೀಯವಾಗಿ ಏರಿಕೆ ಕಂಡಿದೆ. ಇದೇ ರೀತಿ ಒಳಹರಿವು ಹೆಚ್ಚಳವಾದರೆ ಈ ವರ್ಷ ಶೀಘ್ರ ನದಿ ತುಂಬುವ ಸಾಧ್ಯತೆಗಳಿವೆ.

ಬುಧವಾರ ಸಂಜೆ ವೇಳೆಗೆ 9,910 ಕ್ಯೂಸೆಕ್​​​​​​​​ ನೀರು ಜಲಾಶಯಕ್ಕೆ ಹರಿದು ಬಂದಿತ್ತು. ಶುಕ್ರವಾರ ಬೆಳಗ್ಗೆಯವರೆಗೆ 42,659 ಕ್ಯೂಸೆಕ್​​​​​​ ಒಳಹರಿವು ಇತ್ತು. ಒಟ್ಟು 5475 ಕ್ಯೂಸೆಕ್​​​​ ನೀರು ಹೆಚ್ಚಳವಾಗಿದೆ. ಇದರಿಂದ ನದಿ ತೀರದ ಗ್ರಾಮಸ್ಥರಲ್ಲಿ ಆತಂಕ ಮನೆ ಮಾಡಿದೆ.

ಜಲಾಶಯ ಮಟ್ಟ:

519.60 ಮೀಟರ್ ಎತ್ತರದ ಜಲಾಶಯದಲ್ಲಿ ಸದ್ಯ 511. 85 ಮೀಟರ್ ನೀರು ಸಂಗ್ರಹವಿದೆ. 123.85 ಟಿಎಂಸಿ ಸಂಗ್ರಹದ ಸಾಮರ್ಥ್ಯ ಹೊಂದಿರುವ ಜಲಾಶಯದಲ್ಲಿ ಸದ್ಯ 39.985 ಟಿಎಂಸಿ ನೀರು ಸಂಗ್ರಹವಿದೆ.

ಕಳೆದ ವರ್ಷ ಇದೇ ದಿನ 508.7 ಮೀಟರ್ ಸಂಗ್ರಹವಿತ್ತು‌. ಒಟ್ಟು 21.672 ಟಿಎಂಸಿ ನೀರು ಸಂಗ್ರಹವಿದೆ. ಕಳೆದ ವರ್ಷ ಜುಲೈ 3ರಿಂದ ಒಳಹರಿವು ಆರಂಭಗೊಂಡಿತ್ತು. ಈ ವರ್ಷ ಜೂನ್ ಮೊದಲು ವಾರದಲ್ಲಿಯೇ ಒಳಹರಿವು ಆರಂಭಗೊಂಡಿದೆ.