'ಮಹಾ' ಕಂಟಕ... ವಿಜಯಪುರ ಜಿಲ್ಲೆಯಲ್ಲಿ 37 ಪ್ರದೇಶಗಳು ಸೀಲ್​ಡೌನ್!

ವಿಜಯಪುರದ ಗ್ರಾಮೀಣ ಭಾಗದಲ್ಲಿ ಕೊರೊನಾ ಸೋಂಕು ಹರಡುತ್ತಿದ್ದು, ಕೇವಲ ಎರಡು ಸೀಲ್​ಡೌನ್ ಇದ್ದ ಪ್ರದೇಶಗಳು ಇಂದು 37ಕ್ಕೆ ತಲುಪಿದೆ.

ವಿಜಯಪುರ: ಕೊರೊನಾ ಸೋಂಕು ಜಿಲ್ಲೆಯಲ್ಲಿ ಮತ್ತೆ ಉಲ್ಬಣಿಸುತ್ತಿದೆ. ಮಹಾರಾಷ್ಟ್ರದಿಂದ ಬಂದ ವಲಸೆ ಕಾರ್ಮಿಕರಿಂದ ಸೋಂಕು ಗ್ರಾಮೀಣ ಭಾಗದಲ್ಲೂ ಹರಡುತ್ತಿದೆ. ಕೇವಲ ಎರಡು ಇದ್ದ ಸೀಲ್​ಡೌನ್ ಪ್ರದೇಶಗಳ ಸಂಖ್ಯೆ ಇಂದು 37ಕ್ಕೆ ತಲುಪಿದೆ.

ಜಿಲ್ಲೆಯಲ್ಲಿ ಲಾಕ್​​ಡೌನ್​​ ಅವಧಿಯಲ್ಲಿ ಸೋಂಕಿತರ ಸಂಖ್ಯೆ 40 ದಾಟಿರಲಿಲ್ಲ. ಆದರೆ ಸೀಲ್​ಡೌನ್ ಪ್ರದೇಶಗಳನ್ನು ತೆರವುಗೊಳಿಸಿದ ನಂತರ ಸೋಂಕಿತರ ಸಂಖ್ಯೆ ಈಗ ದ್ವಿಶತಕದತ್ತ ದಾಪುಗಾಲು ಹಾಕಿದೆ. ಇದರ ಜೊತೆಗೆ ಕೆಲ ಕಂಟೈನ್​ಮೆಂಟ್​​ ಝೋನ್​ಗಳಲ್ಲಿ ಮತ್ತೆ ಸೋಂಕಿತರು ಪತ್ತೆಯಾಗುತ್ತಿರುವುದು ಜಿಲ್ಲಾಡಳಿತಕ್ಕೆ ತಲೆನೋವು ತಂದಿದೆ. ಸಾರ್ವಜನಿಕರ ನಿರ್ಲಕ್ಷ್ಯ ಸೋಂಕಿತರ ಸಂಖ್ಯೆ ಹೆಚ್ಚಾಗಲು ಕಾರಣವಾಗಿದೆ.

ಮಹಾರಾಷ್ಟ್ರದಿಂದ ನಿತ್ಯ ಜಿಲ್ಲೆಗೆ ಬರುವ ವಲಸೆ ಕಾರ್ಮಿಕರಿಂದ ಕೊರೊನಾ ಸೋಂಕು ತಗುಲುತ್ತಿದೆ. ಅವರನ್ನು ಆಯಾ ತಾಲೂಕು ಕೇಂದ್ರದಲ್ಲಿ ಕ್ವಾರಂಟೈನ್ ಮಾಡಿರುವುದು ಸಹ ಸೋಂಕು ಹೆಚ್ಚಳಕ್ಕೆ ಒಂದು ಕಾರಣವಾಗಿದೆ.

ನಗರದ ಚಪ್ಪರಬಂದ್ ಕಾಲೋನಿಯಿಂದ ಹಿಡಿದು ಬಹುತೇಕ ಪ್ರಮುಖ ಗ್ರಾಮಗಳಲ್ಲಿ ಸೋಂಕು ಹರಡಿಕೊಂಡಿದೆ. ಇದೇ ರೀತಿ ಮುಂದುವರೆದರೆ ಕೊರೊನಾ ಸೋಂಕು ನಿಯಂತ್ರಣಕ್ಕೆ ತರುವುದು ಕಷ್ಟವಾಗಲಿದೆ.