ಶಿರಸಿ: ಅತ್ಯಂತ ಸುರಕ್ಷಿತ ಹಾಗೂ ನೀರಲ್ಲಿ ಇಳಿದು ಆಟ ಆಡುತ್ತಾ ಮಜಾ ಮಾಡಬಲ್ಲ ಜಿಲ್ಲೆಯ ವಿಶಿಷ್ಟ ಫಾಲ್ಸ್ ವೀಕ್ಷಣೆಗೆ ದಿನೇ ದಿನೆ ಜನಸಾಗರ ಹೆಚ್ಚುತ್ತಿದೆ. ಉತ್ತರ ಕನ್ನಡ ಜಿಲ್ಲೆಯ ಸಿದ್ದಾಪುರದಲ್ಲಿರುವ ಫಾಲ್ಸ್ಗೆ ಪ್ರತಿ ದಿನ ವಿವಿಧ ಜಿಲ್ಲೆಗಳಿಂದ ಸಾವಿರಾರು ಪ್ರವಾಸಿಗರು ಭೇಟಿ ನೀಡುತ್ತಿದ್ದಾರೆ.
ಸಿದ್ದಾಪುರದಿಂದ ವಿಶ್ವ ಪ್ರಸಿದ್ಧ ಜೋಗ್ಫಾಲ್ಸ್ಗೆ ಹೋಗುವ ರಸ್ತೆಯಲ್ಲಿ ಸಿಗುವ ಈ ಫಾಲ್ಸ್ ಹೊಸೂರು ಡ್ಯಾಂನಿಂದ ಉದ್ಭವವಾಗಿದೆ. ರಜಾ ದಿನಗಳಲ್ಲಿ 15-20 ಸಾವಿರ ಪ್ರವಾಸಿಗರು ಭೇಟಿ ನೀಡುತ್ತಿದ್ದು, ವಾರದ ದಿನದಲ್ಲಿ ಸಾವಿರಾರು ಜನರು ಭೇಟಿ ನೀಡುತ್ತಾರೆ.
ಪ್ರಸಿದ್ಧ ಜೋಗಕ್ಕೆ ಭೇಟಿ ನೀಡುವ ಬಹುತೇಕ ಪ್ರವಾಸಿಗರು ಇಲ್ಲಿಗೆ ಬಂದು ಹೋಗುತ್ತಿರುವುದು ವಿಶೇಷವಾಗಿದೆ. ಮಳೆಗಾಲದಲ್ಲಿ ಹೊಸೂರು ಡ್ಯಾಂ ತುಂಬಿ ಹೊರಬಂದ ನೀರು ಚಿರೆ ಕಲ್ಲಿನ ಇಳಿಜಾರು ಜಾಗದಲ್ಲಿ ಹರಿದು ಈ ಫಾಲ್ಸ್ ರೂಪುಗೊಂಡಿದೆ. ಸುಮಾರು 200 ಮೀಟರ್ ಉದ್ದ ಹಾಗೂ 25-30 ಮೀಟರ್ನಷ್ಟು ಅಗಲವಾಗಿ ಈ ಫಾಲ್ಸ್ ಹರಿಯುತ್ತದೆ.
ಹಾವೇರಿ, ಹುಬ್ಬಳ್ಳಿ, ದಾವಣಗೆರೆ, ಶಿವಮೊಗ್ಗ, ಉತ್ತರ ಕನ್ನಡ ಜಿಲ್ಲೆಯ ಸಾವಿರಾರು ಜನರು ಇಲ್ಲಿಗೆ ಭೇಟಿ ನೀಡುತ್ತಿದ್ದಾರೆ. ಇದು ಕೇವಲ 3 ರಿಂದ 4 ತಿಂಗಳು ಮಾತ್ರ ನೀರಿರುವ ಫಾಲ್ಸ್ ಇದಾಗಿದ್ದು, ಮಳೆಗಾಲ ಮುಗಿದ ಮೇಲೆ ಡ್ಯಾಂ ನೀರು ಇಳಿಮುಖವಾಗುವುದರಿಂದ ನೀರಿನ ಹರಿವು ಇರುವುದಿಲ್ಲ.
ಜೋಗ ಹಾಗೂ ಇತರೆ ಫಾಲ್ಸ್ಗಳ ಸಮೀಪಕ್ಕೆ ಹೋಗಲು ಬಿಡುವುದಿಲ್ಲ. ಆದರೆ ಈ ಫಾಲ್ಸ್ ಬಹಳ ಸುರಕ್ಷಿತವಾಗಿದ್ದು ಸುಲಭವಾಗಿ ನೀರಿನಲ್ಲಿ ಇಳಿದು ಆಡಬಹುದು. ಯಾವುದೇ ಅಪಾಯವಿಲ್ಲ ಎನ್ನುವುದು ಪ್ರವಾಸಿಗರ ಮಾತಾಗಿದೆ.