ಯಲ್ಲಾಪುರ ಬಳಿ ಫಾಲ್ಸ್​ನಲ್ಲಿ ಅಮ್ಮ, ಮಗಳು, ಮೊಮ್ಮಗ ಶವವಾಗಿ ಪತ್ತೆ!

ಯಲ್ಲಾಪುರ ಪಟ್ಟಣಕ್ಕೆ ಹೋಗಿಬರುತ್ತೇವೆಂದು ಮನೆಯವರಿಗೆ ಹೇಳಿ ಹೊರಟ ತಾಯಿ, ಮಗಳು ಹಾಗೂ 11 ತಿಂಗಳ ಮೊಮ್ಮಗ ನೀರಿನಲ್ಲಿ ಶವಗಳಾಗಿ ಪತ್ತೆಯಾಗಿದ್ದಾರೆ. ಉತ್ತರ ಕನ್ನಡ ಜಿಲ್ಲೆಯ ಯಲ್ಲಾಪುರದಲ್ಲಿ ಈ ಪ್ರಕರಣ ನಡೆದಿದೆ.

ಶಿರಸಿ:ಮನೆಯಿಂದ ಯಲ್ಲಾಪುರಕ್ಕೆ ಹೋಗಿ ಬರುತ್ತೇನೆ ಎಂದು ಹೊರಟ ತಾಯಿ, ಮಗಳು ಹಾಗೂ 11 ತಿಂಗಳ ಮೊಮ್ಮಗ ಶವವಾಗಿ ಪತ್ತೆಯಾಗಿರುವ ಘಟನೆ ಉತ್ತರ ಕನ್ನಡ ಜಿಲ್ಲೆಯ ಯಲ್ಲಾಪುರ ತಾಲೂಕಿನ ಗಣೇಶ ಫಾಲ್ಸ್​ನಲ್ಲಿ‌ ಪತ್ತೆಯಾಗಿದ್ದಾರೆ.

ನದಿಯಲ್ಲಿ ಅಮ್ಮ, ಮಗಳು, ಮೊಮ್ಮಗನ ಶವ ಪತ್ತೆ

ಶಿರಸಿಯ ರಾಜೇಶ್ವರಿ ಹೆಗಡೆ (52 ), ಅವರ ಮಗಳು ವಾಣಿ ಹೆಗಡೆ (28) ಹಾಗೂ 11 ತಿಂಗಳ ಗಂಡು ಮಗು ಮೃತರು. ಯಲ್ಲಾಪುರ ಪಟ್ಟಣಕ್ಕೆ ಹೋಗಿ ಬರುತ್ತೇವೆ ಎಂದು ತೆರಳಿದ್ದ ಮೃತರು, ಹಿಂತಿರುಗಿ ಬಾರದ ಕಾರಣ ರಾಜೇಶ್ವರಿ ಗಂಡ ಅನುಮಾನದ ಮೇಲೆ ಪೊಲೀಸರಿಗೆ ದೂರು ನೀಡಿದ್ದರು. ದೂರಿನ ಮೇರೆಗೆ ಪೊಲೀಸರು ತನಿಖೆ ನಡೆಸಿದ್ದಾರೆ.

ಮನೆಯಿಂದ ಹೊರಗೆ ಹೋದ ಮೂವರು ಹಿತ್ಲಲ್ಲಿ ಗ್ರಾ.ಪಂ. ವ್ಯಾಪ್ತಿಯ ಶಾಲ್ಮಲ ನದಿಯ ಗಣೇಶ ಫಾಲ್ಸ್​​ನಲ್ಲಿ ಶವವಾಗಿ ಪತ್ತೆಯಾದ ಕಾರಣ ಮೃತ ರಾಜೇಶ್ವರಿ ಪತಿಕೊಲೆ ಶಂಕೆ ವ್ಯಕ್ತಪಡಿಸಿದ್ದು, ಹೆಚ್ಚಿನ ತನಿಖೆಗೆ ಆಗ್ರಹಿಸಿದ್ದಾರೆ.

ಆದರೆ ಇದೇ ವೇಳೆ ಜೀವನದಲ್ಲಿ ಜಿಗುಪ್ಸೆ ಹೊಂದಿ ನೀರಿಗೆ ಹಾರಿರಬಹುದು ಎಂದೂ ಸಹ ದೂರಿನಲ್ಲಿ ತಿಳಿಸಿದ್ದಾರೆ. ಯಲ್ಲಾಪುರ ಪೊಲೀಸ್​​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.