ಕಾರವಾರ:ಜನಸಾಮಾನ್ಯರು ವಿದ್ಯುತ್ ಬಿಲ್ಗಳನ್ನು ಎರಡು ತಿಂಗಳು ಬಾಕಿ ಉಳಿಸಿಕೊಳ್ಳುತ್ತಿದ್ದಂತೆ ಮನೆ ಬಾಗಿಲಿಗೆ ಅಧಿಕಾರಿಗಳು ಆಗಮಿಸಿ, ಪವರ್ ಕಟ್ ಮಾಡಿ ತೆರಳುತ್ತಿದ್ದರು. ಆದರೆ ಸರ್ಕಾರಿ ಇಲಾಖೆಗಳು ಎಷ್ಟೇ ಬಿಲ್ ಉಳಿಸಿಕೊಂಡರೂ ಕೇಳುವುದಿಲ್ಲ ಎನ್ನುವ ಆರೋಪಗಳಿದ್ದವು. ಅದರಲ್ಲಿ ಪ್ರಮುಖವಾಗಿ ಬಹುಗ್ರಾಮ ನೀರು ಸರಬರಾಜು ಇಲಾಖೆಯಿಂದ 1.59 ಕೋಟಿ ರೂ., ರಾಜ್ಯ ಸರ್ಕಾರದ ವಿವಿಧ ಇಲಾಖೆಗಳಿಂದ 54 ಲಕ್ಷ ರೂ. ಹಾಗೂ ಕೇಂದ್ರ ಸರ್ಕಾರದಡಿ ಬರುವ ಬಿಎಸ್‌ಎನ್‌ಎಲ್ ನಿಂದ 47 ಲಕ್ಷ ರೂ. ಹಾಗೂ ಇತರ ಇಲಾಖೆಗಳು ಸೇರಿ 1.02 ಕೋಟಿ ರೂ. ಪಾವತಿಯಾಗೋದು ಬಾಕಿಯಿದೆ.
ಲಾಕ್ಡೌನ್ನಿಂದ ಆದಾಯದಲ್ಲಿ ಭಾರಿ ನಷ್ಟಕ್ಕೊಳಗಾಗಿದ್ದ, ಹೆಸ್ಕಾಂ ಬಾಕಿ ಉಳಿಸಿಕೊಂಡ ಎಲ್ಲ ಸರ್ಕಾರಿ ಕಚೇರಿಗಳಿಗೂ ಬಿಲ್ ಪಾವತಿಸುವಂತೆ ಸೂಚಿಸಿ ಶಾಕ್ ನೀಡಿದೆ. ಹೆಸ್ಕಾಂ ಅಧಿಕಾರಿಗಳು ಹೇಳುವಂತೆ ಕಳೆದ ಮಾರ್ಚ್ ತಿಂಗಳಿಂದ 7.50 ಕೋಟಿ ರೂ. ಕಲೆಕ್ಷನ್ ಕಡಿಮೆಯಾಗಿದೆ. ಕೊರೊನಾ ಕಾರಣದಿಂದ ಗ್ರಾಹಕರು ಸರಿಯಾಗಿ ಹಣ ತುಂಬದಿರುವುದರಿಂದ ಸುಮಾರು 2.50 ಕೋಟಿ ರೂ. ಕಲೆಕ್ಷನ್ ಕೊರತೆಯಾಗಿದೆ. ಇದರಿಂದ ಹೆಸ್ಕಾಂಗೆ ಸಾಕಷ್ಟು ನಷ್ಟವಾಗಿದೆ. ಶಿಕ್ಷಣ ಸಂಸ್ಥೆಗಳಿಗೆ ಮಾತ್ರ ವಿದ್ಯಾರ್ಥಿಗಳಿಗೆ ತೊಂದರೆ ನೀಡಬಾರದೆಂಬ ನಿಟ್ಟಿನಲ್ಲಿ ಇನ್ನಷ್ಟು ಸಮಯಾವಕಾಶ ನೀಡಲಾಗಿದೆ. ಆದರೆ ಹಣ ಪಾವತಿ ಮಾಡದ ಇಲಾಖೆಗಳ ವಿದ್ಯುತ್ ಕನೆಕ್ಷನ್ ಕಟ್ ಮಾಡಲಾಗುತ್ತದೆ. ಜನರು ಹಾಗೂ ಇಲಾಖೆಗಳು ಸರಿಯಾಗಿ ಹಣ ಪಾವತಿಸಿದಾಗ ಮಾತ್ರ ಹೆಸ್ಕಾಂ ಉತ್ತಮ ಸೇವೆ ಒದಗಿಸಬಹುದು ಎನ್ನುತ್ತಾರೆ ಹೆಸ್ಕಾಂ ಎಕ್ಸಿಕ್ಯೂಟಿವ್ ಎಂಜಿನಿಯರ್‌ ರೋಶನಿ.