ಪುನೀತ್​​ ಸ್ಮರಣಾರ್ಥ ಭಟ್ಕಳದಲ್ಲಿ 2 ಸಾವಿರಕ್ಕೂ ಅಧಿಕ ಜನರಿಂದ ನೇತ್ರದಾನ ನೋಂದಣಿ

ಭಟ್ಕಳದಲ್ಲಿ ನಡೆದ ಬೃಹತ್ ನೇತ್ರದಾನ ನೋಂದಣಿ ಶಿಬಿರದಲ್ಲಿ 2,500ಕ್ಕೂ ಹೆಚ್ಚು ಜನರು ತಮ್ಮ ಹೆಸರು ನೋಂದಣಿ ಮಾಡಿಕೊಂಡಿದ್ದಾರೆ.

ಭಟ್ಕಳ:ನಟ ಪುನೀತ್ ರಾಜಕುಮಾರ್ ನಿಧನದ ಬಳಿಕ ರಾಜ್ಯದ ವಿವಿಧೆಡೆ ನೇತ್ರದಾನಕ್ಕಾಗಿ ನೋಂದಣಿ ಹೆಚ್ಚಾಗಿದೆ.

ದಿ.ಅಪ್ಪು ಸ್ಮರಣಾರ್ಥ, 'ಕಣ್ಣುಗಳನ್ನು ದಾನ ಮಾಡಿ, ದೃಷ್ಟಿಯನ್ನು ಕೊಡುಗೆಯಾಗಿ ನೀಡಿ' ಎಂಬ ಅವರದ್ದೇ ಹೇಳಿಕೆಯನ್ನೇ ಘೋಷವಾಕ್ಯವಾಗಿಸಿ ಭಟ್ಕಳದಲ್ಲಿ ಬೃಹತ್ ನೇತ್ರದಾನ ನೋಂದಣಿ ಶಿಬಿರ ಹಮ್ಮಿಕೊಳ್ಳಲಾಗಿತ್ತು. ಈ ಶಿಬಿರದಲ್ಲಿ 2,500ಕ್ಕೂ ಹೆಚ್ಚು ಜನರು ತಮ್ಮ ಹೆಸರು ನೋಂದಣಿ ಮಾಡಿಕೊಳ್ಳುವ ಮೂಲಕ ಮತ್ತೊಬ್ಬರ ಬದುಕಿಗೆ ಬೆಳಕಾಗುವ ವಾಗ್ದಾನ ಮಾಡಿದರು.

ಸಾಮಾಜಿಕ ಕಾರ್ಯಗಳ ಮೂಲಕ ಗಮನ ಸೆಳೆಯುತ್ತಿರುವ ಭಟ್ಕಳದ ಸ್ಪಂದನ ಚಾರಿಟೇಬಲ್ ಟ್ರಸ್ಟ್ ಆಯೋಜಿಸಿದ್ದ ಈ ನೇತ್ರದಾನ ನೋಂದಣಿ ಶಿಬಿರಕ್ಕೆ ಸ್ಥಳೀಯ 20ಕ್ಕೂ ಹೆಚ್ಚು ಸಂಘ-ಸಂಸ್ಥೆಗಳು ಸಹಕಾರ ನೀಡಿದ್ದವು. ಉಡುಪಿಯ ಪ್ರಸಾದ್ ಸೂಪರ್ ಸ್ಪೆಷಾಲಿಟಿ ನೇತ್ರಾಲಯದ ಸಹಯೋಗದೊಂದಿಗೆ ಭಟ್ಕಳದ ತಾಲೂಕು ಆಸ್ಪತ್ರೆಯಲ್ಲಿ ಈ ನೋಂದಣಿ ಕಾರ್ಯ ನಡೆಯಿತು. ಅನೇಕ ಸಂಘ-ಸಂಸ್ಥೆಗಳು, ಯುವಕ- ಯುವತಿ ಮಂಡಲಗಳು ಗುಂಪಾಗಿ ಬಂದು ನೋಂದಾಯಿಸಿದರೆ, ಸರ್ಕಾರಿ ನೌಕರರು, ಕಾಲೇಜು ವಿದ್ಯಾರ್ಥಿಗಳು, ಹೆಚ್ಚಿನ ಸಂಖ್ಯೆಯ ಯುವಕ- ಯುವತಿಯರು ಈ ಶಿಬಿರದಲ್ಲಿ ಕುಟುಂಬಸಮೇತರಾಗಿ ಹೆಸರು ನೋಂದಣಿ ಮಾಡಿಸಿದರು.

ಸ್ಥಳೀಯ ಶಾಸಕ ಸುನೀಲ್ ನಾಯ್ಕ ಶಿಬಿರ ಉದ್ಘಾಟಿಸಿದರು. ಸರ್ಕಾರ ಮಾಡಬೇಕಾದ ಕಾರ್ಯವನ್ನು ಸಂಘ- ಸಂಸ್ಥೆಗಳು ಮಾಡುತ್ತಿರುವುದು ನಿಜಕ್ಕೂ ಮೆಚ್ಚುವಂಥದ್ದು ಎಂದು ಅವರು ಮೆಚ್ಚುಗೆ ವ್ಯಕ್ತಪಡಿಸಿದರು.

ಇನ್ನು ನೇತ್ರದಾನಕ್ಕೆ ನೋಂದಣಿಯಷ್ಟೇ ಅಲ್ಲ, ಶಿಬಿರದಲ್ಲಿ ನೇತ್ರ ತಪಾಸಣಾ ಕಾರ್ಯವೂ ನಡೆಯಿತು. ಪ್ರಸಾದ್ ನೇತ್ರಾಲಯದ ತಜ್ಞರು ಕಣ್ಣಿನ ಪರೀಕ್ಷಾ ಕಾರ್ಯ ನಡೆಸಿದರು. ಸುಮಾರು 250 ಮಂದಿ ಇಲ್ಲಿ ಉಚಿತವಾಗಿ ಕಣ್ಣಿನ ತಪಾಸಣೆ ಮಾಡಿಸಿಕೊಂಡರೆ, 60 ಮಂದಿಗೆ ಕನ್ನಡಕ ವಿತರಿಸಲಾಗಿದೆ. 39 ಜನರನ್ನು ಕಣ್ಣಿನ ಶಸ್ತ್ರಚಿಕಿತ್ಸೆಗೆ ಆಯ್ಕೆ ಮಾಡಲಾಗಿದೆ.

ಇದನ್ನೂ ಓದಿ:ಸಮುದ್ರದ ಅಲೆಗಳಿಗೆ ಕೊಚ್ಚಿ ದಡ ಸೇರಿದ 27 ಮೃತದೇಹಗಳು!