ಬೊಲೆರೋ-ಲಾರಿ ಡಿಕ್ಕಿ: ತಪ್ಪಿದ ಭಾರಿ ಅನಾಹುತ

ಭಟ್ಕಳ ತಾಲೂಕಿನ ವೆಂಕಟಾಪುರ ಹಳೆಯ ಬ್ರಿಡ್ಜ್​ ಮೇಲೆ ಲಾರಿ-ಬೊಲೆರೋ ಪಿಕಪ್ ವಾಹನದ ಮಧ್ಯೆ ಡಿಕ್ಕಿ ಸಂಭವಿಸಿದೆ. ಅಪಘಾತದ ರಭಸಕ್ಕೆ ಬೊಲೆರೋ ಹಾಗೂ ಲಾರಿಯ ಮುಂಭಾಗ ಜಖಂಗೊಂಡಿದೆ.

ಭಟ್ಕಳ:ತಾಲೂಕಿನ ವೆಂಕಟಾಪುರ ಹಳೆಯ ಬ್ರಿಡ್ಜ್​ ಮೇಲೆ ಲಾರಿ ಹಾಗೂ ಬೊಲೆರೋ ಪಿಕಪ್ ವಾಹನದ ಮಧ್ಯೆ ಡಿಕ್ಕಿ ಸಂಭವಿಸಿದ ಘಟನೆ ತಡರಾತ್ರಿ ನಡೆದಿದೆ.

ಹುಬ್ಬಳ್ಳಿಯಿಂದ ಮಂಗಳೂರು ಕೆ.ಎಂ.ಎಫ್ ಕಡೆಗೆ ದನದ ಆಹಾರವಾದ ಹಿಂಡಿ ತುಂಬಿಕೊಂಡು ಹೋಗುತ್ತಿದ್ದ ಲಾರಿ ಹಾಗೂ ಮಂಗಳೂರಿನಿಂದ ಗೋವಾ ಕಡೆಗೆ ಮೀನು ತುಂಬಿದ ಬೊಲೆರೋ ಪಿಕಪ್ ವಾಹನ ಹೋಗುತ್ತಿದ್ದ ವೇಳೆ ಅಪಘಾತ ಸಂಭವಿಸಿದೆ. ಡಿಕ್ಕಿ ರಭಸಕ್ಕೆ ಲಾರಿಯ ಮುಂದಿನ ಎರಡು ಚಕ್ರ ಹಾಗೂ ಡೀಸೆಲ್ ಟ್ಯಾಂಕ್​ಗೆ ಹಾನಿಯಾಗಿದೆ. ಬೊಲೆರೋ ವಾಹನದ ಮುಂಭಾಗವು ಸಹ ಜಖಂಗೊಂಡಿದೆ. ಘಟನೆಯಲ್ಲಿ ಯಾವುದೇ ಪ್ರಾಣ ಹಾನಿ ಸಂಭವಿಸಿಲ್ಲ.

ವಾಹನದಲ್ಲಿದ್ದ ಮೀನುಗಳು ರಸ್ತೆಯ ಬದಿಗಳಲ್ಲಿ ಚೆಲ್ಲಾಪಿಲ್ಲಿಯಾಗಿ ಬಿದ್ದಿವೆ. ಲಾರಿ ಚಾಲಕನ ಸಮಯ ಪ್ರಜ್ಞೆಯಿಂದ ಬುಲೆರೋ ವಾಹನ ಸೇತುವೆ ಕೆಳೆಗೆ ಬೀಳುವುದು ತಪ್ಪಿದಂತಾಗಿದೆ. ಡಿಸೇಲ್ ಟ್ಯಾಂಕ್​ಗೆ ಹಾನಿಯಾದ ಹಿನ್ನೆಲೆ ಡಿಸೇಲ್ ಸೋರಿ ನದಿಯ ಪಾಲಾಗಿದೆ. ಇನ್ನು ಸ್ಥಳಕ್ಕೆ ಗ್ರಾಮೀಣ ಠಾಣೆ ಪೊಲೀಸರು ಬಂದು ಪರಿಶೀಲನೆ ನಡೆಸಿದ್ದಾರೆ.