ಬಲೆಗೆ ಬಿತ್ತು ರಾಶಿ ರಾಶಿ ಮೀನು...! ಮೀನುಗಾರರ ಮೊಗದಲ್ಲಿ ಮಂದಹಾಸ

ಉತ್ತರ ಕನ್ನಡ ಜಿಲ್ಲೆಯ ಕುಮಟಾ ಹಾಗೂ ಭಟ್ಕಳ ಭಾಗದ ಮೀನುಗಾರರ ಬಲೆಗೆ ಮೀನು ಭರ್ಜರಿಯಾಗಿ ಬಿದ್ದಿವೆ.

ಕಾರವಾರ:ಉತ್ತರ ಕನ್ನಡ ಜಿಲ್ಲೆಯ ಕುಮಟಾ ಹಾಗೂ ಭಟ್ಕಳ ಭಾಗದ ಮೀನುಗಾರರ ಬಲೆಗೆ ರಾಶಿ ರಶಿ ಮೀನುಗಳು ಬಿದ್ದಿದ್ದು, ಮೀನುಗಾರರ ಮುಖದಲ್ಲಿ ಮಂದಹಾಸ ಉಂಟು ಮಾಡಿದೆ.

ಪ್ರವಾಹದಿಂದಾಗಿ ಮೀನುಗಾರಿಕೆಗೆ ತೆರಳಲಾಗದೆ ದಡದಲ್ಲಿಯೇ ಬೋಟ್​ಗಳನ್ನು ಲಂಗರು ಹಾಕಲಾಗಿತ್ತು. ಮಳೆಯ ಪ್ರಮಾಣ ತಗ್ಗಿದ ಬಳಿಕ ಕಳೆದೆರಡು ದಿನಗಳಿಂದ ಭಟ್ಕಳ, ಮುರುಡೇಶ್ವರ, ಕುಮಟ ಭಾಗದಲ್ಲಿ ಮೀನುಗಾರರು ಬಲೆ ಬೀಸಿದ್ದರು. ಇಂದು ಸಹ ಮುರುಡೇಶ್ವರ ಕಡಲ ತೀರದಲ್ಲಿ ಮೀನುಗಾರರು ಏಳೆದು ತಂದ ರಂಪಣಿ ಬಲೆಗೆ ಎರಡು ಕ್ವಿಂಟಾಲ್​ಗೂ ಅಧಿಕ ಮೀನು ದೊರೆತಿವೆ.

ಅದೇ ರೀತಿ ಕುಮಟಾದ ವನ್ನಳ್ಳಿ ಬೀಚ್​ನಲ್ಲಿ ಮೀನಿನ ಗುಡ್ಡೆಯನ್ನೇ ರಾಶಿ ಹಾಕಲಾಗಿದೆ. ಇದರಲ್ಲಿ ಎಲ್ಲ ಜಾತಿಯ ಮೀನುಗಳಿವೆ. ಇನ್ನು ಅಧಿಕ ಪ್ರಮಾಣದಲ್ಲಿ ಮೀನು ಬಿದ್ದಿರುವ ಸುದ್ದಿ ಹಬ್ಬುತ್ತಿದ್ದಂತೆ ಸುತ್ತಮುತ್ತಲಿನ ಜನರು ಮೀನುಗಳನ್ನು ಕೊಳ್ಳಲು ಮುಗಿಬಿದ್ದರು.