ಆಗಸದಲ್ಲಿ ಸಾಲು ಸಾಲು ಉಪಗ್ರಹ ಕಂಡು ಬೆಚ್ಚಿಬಿದ್ದ ಉಡುಪಿ ಜನ..

ಉಡುಪಿ ಮಂಗಳೂರು ಭಾಗದಲ್ಲಿ ಕೆಲಹೊತ್ತು ಆಗಸದಲ್ಲಿ ಚಲಿಸುವ ನಕ್ಷತ್ರಗಳು ಕಂಡು ಬಂದ ಹಿನ್ನೆಲೆ ಜನರು ಗಾಬರಿಗೊಂಡಿದ್ದಾರೆ. ಈ ಬಗ್ಗೆ ಖಗೋಳಶಾಸ್ತ್ರಜ್ಞ ತಿಳಿಸಿದ್ದಾರೆ. ಉಡುಪಿಯಲ್ಲಿ ಆಕಾಶದಲ್ಲಿ ಚಲಿಸುವ ಸ್ಯಾಟ್​ಲೈಟ್​ಗಳು ಕಂಡುಬಂದಿವೆ.

ಉಡುಪಿ:ಉಡುಪಿಯ ಹಲವೆಡೆ ಆಕಾಶದಲ್ಲಿ ಸಾಲು ಚಲಿಸುವ ನಕ್ಷತ್ರಗಳನ್ನು ಕಂಡು ಜನ‌ಬೆಚ್ಚಿಬಿದ್ದ ಘಟನೆ ಭಾನುವಾರ ನಡೆದಿದೆ. ಜಿಲ್ಲೆಯ ಹಲವೆಡೆ ಚಲಿಸುವ ನಕ್ಷತ್ರಗಳು ಗೋಚರವಾಗಿದ್ದು, ಏಲಿಯನ್​ಗಳು ಭೂಮಿಗೆ ಬಂದಿವೆ ಎಂದು ಮಾತನಾಡಿಕೊಂಡ ಜನ ಕ್ಷಣಕಾಲ ಕುತೂಹಲಭರಿತರಾಗಿದ್ದರು. ವಾಸ್ತವದಲ್ಲಿ ಇವು ನಕ್ಷತ್ರಗಳಲ್ಲ, ಏಲಿಯನ್​ಗಳೂ ಅಲ್ಲ. ಹೆಚ್ಚಿನ ಇಂಟರ್​ನೆಟ್ ವ್ಯವಸ್ಥೆಗಾಗಿ ಆಕಾಶಕ್ಕೆ ಹರಿಯಬಿಟ್ಟ ಸ್ಯಾಟ್​ಲೈಟ್​ಗಳಾಗಿದ್ದು, ಅಮೆರಿಕದಿಂದ ಹರಿಯ ಬಿಟ್ಟಿರುವ ಕೃತಕ ಉಪಗ್ರಹಗಳಾಗಿವೆ.

ಹೆಚ್ಚಿನ ಇಂಟರ್​ನೆಟ್ ವ್ಯವಸ್ಥೆಗಾಗಿ ಆಕಾಶಕ್ಕೆ ಹಾರಿಸಿರುವ 53 ಕೃತಕ ಉಪಗ್ರಹಗಳು ಇವಾಗಿವೆ. ಶುಕ್ರವಾರವಷ್ಟೇ ಆಕಾಶಕ್ಕೆ ಸ್ಯಾಟ್​​ಲೈಟ್​ಗಳನ್ನು ಹಾರಿಸಲಾಗಿತ್ತು. ಸಾಲಾಗಿ ಸಾಗುವ ಸ್ಯಾಟಿಲೈಟ್​ಗಳನ್ನು ಕಂಡು ಜನ ಅಚ್ಚರಿ ಪಟ್ಟಿದ್ದಾರೆ. ವರ್ಷದ ಹಿಂದೆಯೂ ಉಡುಪಿ ಸೇರಿದಂತೆ ಹಲವಡೆ ಸ್ಯಾಟಲೈಟ್​ಗಳು ಗೋಚರಿಸಿದ್ದವು. ಆಕಾಶ ಸ್ವಚ್ಛವಾಗಿದ್ದರೆ ಇಂದು ಕೂಡ ಸ್ಯಾಟಲೈಟ್​ಗಳು ಕಾಣಿಸುವ ಸಾಧ್ಯತೆ ಇದೆ. ಆಕಾಶದಲ್ಲಿ ಬೆಳಕಿನ ಸಾಲಿನ ಕೌತುಕ ಇಂದು ನೋಡಬಹುದಾಗಿದೆ ಅಂತಾ ಖಗೋಳಶಾಸ್ತ್ರಜ್ಞ ಅತುಲ್ ಭಟ್ ಹೇಳಿದ್ದಾರೆ.

ಶನಿವಾರ ಮಂಗಳೂರು, ಉಡುಪಿ ಭಾಗದಲ್ಲಿ 30 ರಿಂದ 50 ಸರಳ ರೇಖೆಯ ಚುಕ್ಕಿಗಳು ಕಂಡಿವೆ. ಈ ಬೆಳಕಿನ ಚುಕ್ಕಿಗಳು ಒಂದೇ ಸರಳ ರೇಖೆಯಲ್ಲಿ ಸಂಚರಿಸಿದಂತೆ ಕಂಡು ಬಂದಿವೆ. ಜನ ಇದನ್ನು ಏಲಿಯನ್ಸ್ ಎಂದು ಭಾವಿಸಿ ಪ್ರಶ್ನಿಸುತ್ತಿದ್ದಾರೆ. ಆದರೇ ಇವು ಸ್ಟಾರ್​ಲಿಂಕ್ ಎಂಬ ಕಂಪನಿಯ ಸ್ಯಾಟಲೈಟ್​ಗಳಾಗಿದ್ದು, ಅಮೆರಿಕದ ವಿಜ್ಞಾನಿ ಎಲಾನ್ ಮಸ್ಕ್ ಅವರ ಕಂಪನಿ ಸ್ಟಾರಲಿಂಕ್ ಆಗಿದ್ದು, ಈ ಕಂಪನಿಯಿಂದ ಉಪಗ್ರಹಗಳನ್ನು ಅಂತರಿಕ್ಷಕ್ಕೆ ಕಳುಹಿಸಲಾಗಿದೆ.

ಹಳ್ಳಿಗಳು ಮತ್ತು ನೆಟ್ವರ್ಕ್ ಸಿಗದ ಪ್ರದೇಶಗಳಿಗೆ ಇಂಟರ್ನೆಟ್ ವ್ಯವಸ್ಥೆ ಕಲ್ಪಿಸಲು ಈ ವ್ಯವಸ್ಥೆ ಮಾಡಲಾಗಿದೆ. ಭೂಮಿಯ ಸುತ್ತಲೂ ಹನ್ನೆರಡು ಸಾವಿರ ಸ್ಯಾಟ್​ಲೈಟ್​ಗಳನ್ನು ಕವಚದ ರೂಪದಲ್ಲಿ ಕಳುಹಿಸಲಿದ್ದಾರೆ. ನೆಟ್ವರ್ಕ್ ತಲುಪದ ಪ್ರದೇಶಗಳಿಗೂ ಇಂಟರ್ನೆಟ್ ವ್ಯವಸ್ಥೆ ಮಾಡಲು ಇವುಗಳನ್ನು ಬಿಡಲಾಗಿದೆ. ಮುಂದಿನ ದಿನಗಳಲ್ಲಿ 44,000 ಸ್ಯಾಟ್​ಲೈಟ್​ಗಳನ್ನು ಬಿಡುವ ಸಾಧ್ಯತೆ ಇದೆ. ಈಗಾಗಲೇ ಮೂರುವರೆ ಸಾವಿರ ಸ್ಯಾಟಲೈಟ್​ಗಳು ಬಿಡುಗಡೆಯಾಗಿವೆ.

ಈ ಸ್ಯಾಟ್​ಲೈಟುಗಳು ಕಕ್ಷೆಯನ್ನು ಸೇರುವ ಮುಂಚೆ ಒಂದೇ ಸರಳ ರೇಖೆಯಲ್ಲಿ ಆಕಾಶದಲ್ಲಿ ಸಂಚರಿಸುತ್ತವೆ. ನಿನ್ನೆ ಸಂಜೆ ಕಂಡಿರುವುದು ಸ್ಟಾರ್ ಲಿಂಕ್ ಜಿ 31 ಸೀರೀಸ್​ನ ಸ್ಯಾಟಲೈಟ್. ಶನಿವಾರ 53 ಉಪಗ್ರಹಗಳನ್ನು ಬಿಡುಗಡೆ ಮಾಡಲಾಗಿತ್ತು. ಶನಿವಾರ ಸಂಜೆ ಕೂಡ ಕ್ಷಿತಿಜಕ್ಕೆ ತುಂಬಾ ಹತ್ತಿರ ಹಾದು ಹೋದಂತೆ ಕಾಣಿಸಿದ್ದವು. 48 ಗಂಟೆಗಳ ಬಳಿಕ ಈ ಸ್ಯಾಟ್​ಲೈಟ್ ಗಳು ತಮ್ಮ ಕಕ್ಷೆ ಸೇರಲಿವೆ. ಈ ಹಿಂದೆಯೂ ಒಂದು ಬಾರಿ ಸರಳ ರೇಖೆಯಲ್ಲಿ ಸ್ಯಾಟಲೈಟ್​ಗಳ ಸಂಚಾರ ನೋಡಿದ್ದೇವೆ. ಇದರಿಂದ ಮನುಷ್ಯನಿಗೆ ಯಾವುದೇ ಹಾನಿ ಇಲ್ಲ ಎಂದು ಅತುಲ್​ ಭಟ್​ ಹೇಳಿದ್ದಾರೆ.

ಇನ್ನು, ಖಗೋಳ ಶಾಸ್ತ್ರಜ್ಞರು ಇದನ್ನು ವಿರೋಧಿಸುತ್ತಾರೆ. ಏಕೆಂದರೆ ಟೆಲಿಸ್ಕೋಪ್ ಮೂಲಕ ಆಕಾಶದ ಅಧ್ಯಯನ ಮಾಡುವಾಗ, ಈ ರೀತಿ ಸರಳ ರೇಖೆಯಲ್ಲಿ ಬರುವ ಸ್ಯಾಟ್​ಲೈಟ್ ಗಳು ಅಧ್ಯಯನಕ್ಕೆ ಅಡ್ಡಿಪಡಿಸುತ್ತವೆ ಎಂದು ಖಗೋಳಶಾಸ್ತ್ರಜ್ಞರು ಇದನ್ನು ವಿರೋಧಿಸಿದ್ದಾರೆ. ಭೂಮಿಯ ಅನೇಕ ಪ್ರದೇಶಗಳಲ್ಲಿ ಇಂಟರ್ನೆಟ್ ಸೌಲಭ್ಯ ಸಿಗುತ್ತಿಲ್ಲ. ಇಂಟರ್ನೆಟ್ ಸೌಲಭ್ಯ ಈಗ ಮೂಲಭೂತ ಅಗತ್ಯವಾಗಿ ಮಾರ್ಪಟ್ಟಿದೆ. ಹಾಗಾಗಿ ಈ ರೀತಿಯ ಸ್ಯಾಟ್​ಲೈಟ್ ಬಿಡುಗಡೆ ಮಾಡುವುದು ಅನಿವಾರ್ಯ.

ಈ ಸ್ಯಾಟ್​ಲೈಟ್ ಗಳಿಂದ ಭೂಮಿಯ ಎಲ್ಲಾ ಪ್ರದೇಶಕ್ಕೂ ಇಂಟರ್ನೆಟ್ ಸೌಲಭ್ಯ ಸಿಗುತ್ತೆ. ಇನ್ನು ಮುಂದೆಯೂ ಈ ರೀತಿಯ ಸ್ಯಾಟ್​ಲೈಟ್​ಗಳು ಬರಿಯ ಕಣ್ಣಿಗೆ ಕಾಣಿಸುತ್ತವೆ ಅಂತಾ ಅತುಲ್ ಭಟ್ ಅಭಿಪ್ರಾಯ ಪಟ್ಟಿದ್ದಾರೆ.

ಇದನ್ನೂ ಓದಿ:ಜಾಗತಿಕ ಬಂಡವಾಳ ಹೂಡಿಕೆದಾರರ ಸಮಾವೇಶ: ಪಾಲಿಕೆಯಿಂದ ರಸ್ತೆ ಗುಂಡಿ ಮುಚ್ಚುವ ಪ್ರಕ್ರಿಯೆ ಚುರುಕು