ಉಡುಪಿಯಲ್ಲಿ ಕೊರೊನಾ ಕೇಸ್​ 3 : ಆದರೆ, ಮದ್ಯ ಇಲ್ಲದೇ - 8, ಮದ್ಯ ಸಿಕ್ಕ ಬಳಿಕ 4 ಸಾವು!

ಉಡುಪಿ ಜಿಲ್ಲೆಯಲ್ಲಿ ಈವರೆಗೆ ದಾಖಲಾದ ಕೊರೊನಾ ಪ್ರಕರಣಗಳ ಸಂಖ್ಯೆ ಮೂರು. ಆದರೆ ಮದ್ಯ ಸಿಗದೇ ಮತ್ತು ಸಿಕ್ಕ ನಂತರ ಸತ್ತವರ ಸಂಖ್ಯೆ 12.

ಉಡುಪಿ:ಮದ್ಯ ಮಾರಾಟ ಆರಂಭವಾಗುತ್ತಿದ್ದಂತೆ, ಉಡುಪಿಯಲ್ಲಿ ಕುಡಿದವರ ಸಾವಿನ ಸರಣಿ ಆರಂಭವಾಗಿದೆ. ಈಗಾಗಲೇ ಜಿಲ್ಲೆಯಲ್ಲಿ ನಾಲ್ಕು ಮಂದಿ ಸಾವನ್ನಪ್ಪಿದ್ದು, ಈ ಪೈಕಿ ಓರ್ವ ಆತ್ಮಹತ್ಯೆ ಮಾಡಿಕೊಂಡಿದ್ದರೆ, ಅತಿಯಾದ ಮದ್ಯ ಸೇವಿಸಿ ಇಬ್ಬರು ಸತ್ತಿದ್ದಾರೆ.

ಇನ್ನು ನಾಲ್ಕನೇ ವ್ಯಕ್ತಿ ಹೊಟ್ಟೆ ನೋವಿನಿಂದ ಮೃತನಾಗಿದ್ದಾನೆ. ಲಾಕ್​ಡೌನ್ ಘೋಷಣೆಯಾದಾಗ ಜಿಲ್ಲೆಯಲ್ಲೂ ಮದ್ಯ ಮಾರಾಟ ಸ್ಥಗಿತಗೊಂಡಿತ್ತು. ಈ ವೇಳೆ, ಜಿಲ್ಲೆಯಲ್ಲಿ ಒಂದೇ ವಾರದ ಅವಧಿಯಲ್ಲಿ 8 ಮಂದಿ ಸಾವನ್ನಪ್ಪಿದ್ದರು. ಮದ್ಯ ಸಿಗದೇ ಇರುವುದು ಇವರ ಸಾವಿಗೆ ಕಾರಣವಾಗಿತ್ತು. ಇದೀಗ ಮದ್ಯ ಮಾರಾಟ ಆರಂಭವಾಗುತ್ತಿದ್ದಂತೆ ಮತ್ತೊಮ್ಮೆ ಸಾವಿನ ಸರಣಿ ಶುರುವಾಗಿದೆ. ಉಡುಪಿ ನಗರದಲ್ಲಿ ಅತಿಯಾದ ಮದ್ಯ ಸೇವನೆಯಿಂದ ಅಪರಿಚಿತ ಯುವಕ ಸತ್ತಿದ್ದಾನೆ. ಸ್ವರ್ಣಾ ಆರ್ಕೆಡ್ ಬಳಿಯ ಪಾದಚಾರಿ ರಸ್ತೆಯಲ್ಲಿ ಬಿದ್ದಿದ್ದ ಯುವಕನನ್ನು ಸರ್ಕಾರಿ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಆದರೆ ಚಿಕಿತ್ಸೆಗೆ ಸ್ಪಂದಿಸದೇ ಈತ ಕೊನೆಯುಸಿರೆಳೆದಿದ್ದಾನೆ.

ಕುಂದಾಪುರದ ಕಸಬಾ ಗ್ರಾಮದಲ್ಲಿ ಬುಧವಾರ 35 ವರ್ಷದ ಅಪರಿಚಿತ ಸತ್ತಿದ್ದಾನೆ. ಅತಿಯಾದ ಮದ್ಯಸೇವನೆಯೇ ಈತನ ಸಾವಿಗೆ ಕಾರಣ ಎಂದು ತಿಳಿದುಬಂದಿದೆ. ಜಿಲ್ಲೆಯ ಕಟಪಾಡಿಯ ಜೆ.ಎನ್ ನಗರದಲ್ಲಿ ಮದ್ಯ ವ್ಯಸನಿಯೊಬ್ಬ ಆತ್ಮಹತ್ಯೆಗೆ ಶರಣಾಗಿದ್ದಾನೆ. ಚಂದ್ರಕಾಂತ್ (32) ಆತ್ಮಹತ್ಯೆ ಮಾಡಿಕೊಂಡ ಯುವಕ. ವಿಪರೀತ ಕುಡಿತದ ಚಟ ಹೊಂದಿದ್ದ ಚಂದ್ರಕಾಂತ್, ಮನೆಯಲ್ಲೇ ನೇಣು ಬಿಗಿದುಕೊಂಡಿದ್ದಾನೆ. ವಿಪರೀತ ಕುಡಿತದ ಚಟವಿದ್ದ ಕೃಷ್ಣ ಪಾಣ ಎಂಬಾತ ಮದ್ಯ ಮಾರಾಟ ಆರಂಭವಾಗುತ್ತಿದ್ದಂತೆ ಹೊಟ್ಟೆ ನೋವಿನಿಂದ ಸತ್ತಿದ್ದಾರೆ. ಕೋಟ ಠಾಣಾ ವ್ಯಾಪ್ತಿಯ ಶಿರಿಯಾರದಲ್ಲಿ ಈ ಘಟನೆ ನಡೆದಿದೆ.

ಈ ಸಾವಿನ ಸರಣಿ ಗಮನಿಸಿದಾಗ ಮದ್ಯ ಕೊಟ್ರೂ ಕಷ್ಟ, ಕೊಡದಿದ್ದರೂ ಸಂಕಷ್ಟ ಎಂಬಂತಾಗಿದೆ. ಜಿಲ್ಲೆಯಲ್ಲಿ‌ ಕೊರೊನಾ ಪೀಡಿತರ ಸಂಖ್ಯೆ ಮೂರು. ಆದರೆ ಮದ್ಯ ಸಿಗದೇ ಮತ್ತು ಸಿಕ್ಕ ನಂತರ ಸತ್ತವರ ಸಂಖ್ಯೆ 12 ಕ್ಕೇರಿದೆ.