ತುಮಕೂರು: ಮಾಜಿ ಪ್ರಧಾನಿ ದೇವೇಗೌಡರು ಮತ್ತು ಮಾಜಿ ಸಂಸದ ಬಸವರಾಜು ಅವರು ತಾವು ಮಾಡಿರುವ ಕಾರ್ಯಗಳನ್ನು ಜನರ ಮುಂದೆ ಇಟ್ಟು ಮತಯಾಚನೆ ಮಾಡಲಿ. ಅದನ್ನು ಬಿಟ್ಟು ತಮ್ಮ ಕಾರ್ಯಕರ್ತರ ಮೂಲಕ ಹಣ, ಹೆಂಡ ಹಂಚಿ ಮತಯಾಚನೆ ಮಾಡಬೇಡಿ ಎಂದು ಲೋಕಸಭಾ ಕ್ಷೇತ್ರದ ಪಕ್ಷೇತರ ಅಭ್ಯರ್ಥಿ ಬಿ.ಎಸ್ ಮಲ್ಲಿಕಾರ್ಜುನಯ್ಯ ಸವಾಲು ಹಾಕಿದರು.
ಭಾರತ ದೇಶ ಇಂದು ಅತ್ಯಂತ ಸಂಧಿಗ್ಧ ಪರಿಸ್ಥಿತಿಯಲ್ಲಿದೆ, ಅಭಿವೃದ್ಧಿಯ ವಿಚಾರವಾಗಿ, ರಾಜಕೀಯದ ವಿಚಾರವೇ ಆಗಲಿ ಎಲ್ಲ ದೃಷ್ಟಿಕೋನದಿಂದಲೂ ಆತಂಕಕಾರಿ ಪರಿಸ್ಥಿತಿಯಲ್ಲಿದೆ.ದೇಶದಲ್ಲಿರುವ ಎಲ್ಲ ರಾಜಕೀಯ ಪಕ್ಷಗಳು ದೇಶವನ್ನು ಶುದ್ಧೀಕರಣ ಮಾಡುವ ನಿಟ್ಟಿನಲ್ಲಿ ಕಾರ್ಯನಿರ್ವಹಿಸುತ್ತಿಲ್ಲ, ಪ್ರತಿ ಹಂತದಲ್ಲೂ ರಾಜಕಾರಣ ಕಲುಷಿತಗೊಳ್ಳುತ್ತಿದೆ.
ಭಾರತದಲ್ಲಿ ಮತದಾರರು ಭ್ರಷ್ಟರಾಗಿಲ್ಲ, ರಾಜಕೀಯ ಪಕ್ಷಗಳು ಆರೀತಿ ಮಾಡಿವೆ. ಜನಸಾಮಾನ್ಯರಾಗಿ ಸ್ಪರ್ಧಿಸಿ ಅಧಿಕಾರ ಪಡೆದ ನಂತರದ ದಿನಗಳಲ್ಲಿ ಇವರೂ ಸಹ ಭ್ರಷ್ಟರಾಗುತ್ತಿದ್ದಾರೆ. ಹಾಗಾಗಿ ಸಾಮಾಜಿಕ ಹೋರಾಟಗಾರರಾದ ರವಿ ಕೃಷ್ಣಾರೆಡ್ಡಿ ಅವರ ನೇತೃತ್ವದಲ್ಲಿ ಲೋಕಸಭಾ ಚುನಾವಣೆಯಲ್ಲಿ ಸ್ಪರ್ಧಿಸುವ ಮೂಲಕ ರಾಜಕೀಯವನ್ನು ಶುದ್ಧೀಕರಣ ಮಾಡಲು ಮುಂದಾಗಿದ್ದೇನೆ ಎಂದು ಮಲ್ಲಿಕಾರ್ಜುನಯ್ಯ ತಿಳಿಸಿದರು.
ರಾಜ್ಯದಲ್ಲಿ ಅಂತರ್ಜಲ ಕುಸಿತದಲ್ಲಿ ತುಮಕೂರು ಜಿಲ್ಲೆ ಎರಡನೇ ಸ್ಥಾನದಲ್ಲಿದೆ. ಕಳೆದ ಮೂರು ದಶಕಗಳಿಂದ ಅಧಿಕಾರ ಪಡೆದು ಆಡಳಿತ ನಡೆಸಿದವರು, ಇಲ್ಲಿಯವರೆಗೂ ನೀರಿನ ಸಮಸ್ಯೆಯನ್ನು ಬಗೆಹರಿಸುವ ನಿಟ್ಟಿನಲ್ಲಿ ಯಾರು ಕಾರ್ಯನಿರ್ವಹಿಸಿಲ್ಲ. ತುಮಕೂರು ಜಿಲ್ಲೆಗೆ 22 ಟಿಎಂಸಿ ನೀರು ಸಾಕಾಗುತ್ತದೆ. ಆದರೆ ಅದನ್ನು ಸರಿಯಾಗಿ ಬಿಡುತ್ತಿಲ್ಲ ಎಂದು ದೂರಿದರು.
ಇಂದು ಹಣ ಇರುವವರು, ಜಾತಿ ಬಲ ಇದ್ದವರು ಚುನಾವಣೆ ಎದುರಿಸುತ್ತಿದ್ದಾರೆ. ಇಡೀ ದೇಶವನ್ನು ಹಣ ಮತ್ತು ಜಾತಿ ಆಧಾರದ ಮೇಲೆ ವಿಘಟನೆ ಮಾಡಲಾಗುತ್ತಿದೆ. ಜಾತಿ-ಜಾತಿಗಳ ಮಧ್ಯೆ ವಿಷಬೀಜ ಬಿತ್ತನೆ ಮಾಡುತ್ತಿದ್ದಾರೆ. 80, 90 ವಯಸ್ಸಾದರೂ ತಾವೇ ರಾಜಕಾರಣ ಮಾಡಬೇಕು, ತಮ್ಮ ನಂತರ ಮಕ್ಕಳು, ಮಕ್ಕಳ ನಂತರ ಮೊಮ್ಮಕ್ಕಳು ಎಂಬುದು ಎಂತಹ ಕೆಟ್ಟ ಪದ್ಧತಿ. ಈ ಕುಟುಂಬ ರಾಜಕಾರಣವನ್ನು ನಿರ್ನಾಮ ಮಾಡಿ ಎಂದು ಬಿ.ಎಸ್ ಮಲ್ಲಿಕಾರ್ಜುನಯ್ಯ ಕರೆ ನೀಡಿದರು.
