ನಾಪತ್ತೆಯಾದ ಮುದ್ದಿನ ಗಿಣಿ ಪತ್ತೆಗೆ ಮತ್ತೊಂದು ಗಿಣಿಯ ಮೊರೆ ಹೋದ ಮಾಲೀಕ

ನಾಪತ್ತೆಯಾಗಿರೋ ರುಸ್ತುಮಾ ಗಿಣಿ ಜೊತೆಯಲ್ಲಿದ್ದ ಮತ್ತೊಂದು ಗಿಣಿಯನ್ನು ಇಟ್ಟುಕೊಂಡು ನಗರದೆಲ್ಲೆಡೆ ಗಿಣಿ ಮಾಲೀಕ ಓಡಾಡುತ್ತಿದ್ದಾರೆ. ಈ ಗಿಣಿಯ ಸದ್ದಿಗೆ ಆ ಗಿಣಿ ಬರಬಹುದು ಎಂಬ ನಂಬಿಕೆಯೊಂದಿಗೆ ಅವರು ಈ ಕಾರ್ಯಕ್ಕೆ ಮುಂದಾಗಿದ್ದಾರೆ.

ತುಮಕೂರು: ನಗರದಲ್ಲಿ 5 ದಿನಗಳ ಹಿಂದೆ ಗಿಣಿಯೊಂದು ಕಣ್ಮರೆಯಾಗಿದೆ. ನಾಪತ್ತೆಯಾಗಿರೋ ಮುದ್ದಿನ ಗಿಣಿಯನ್ನು ಪತ್ತೆ ಹಚ್ಚಲು ಮಾಲೀಕರು ಮತ್ತೊಂದು ಗಿಣಿಯ ಮೊರೆ ಹೋಗಿದ್ದಾರೆ. ಜಯನಗರ ಬಡಾವಣೆಯಲ್ಲಿ ವಾಸವಿರುವ ಈ ಕುಟುಂಬಸ್ಥರು ಗಿಣಿಗಳನ್ನು ಸಾಕಿದ್ದರು. ಎರಡು ಗಿಣಿಗಳ ಜನ್ಮ ದಿನವನ್ನು ಸಹ ಅದ್ಧೂರಿಯಾಗಿ ಆಚರಿಸುತ್ತಿದ್ದರು. ಇದೀಗ ಆಫ್ರಿಕನ್ ಗ್ರೇ ಎಂಬ ಒಂದು ಗಿಣಿ ಕಾಣೆಯಾಗಿದ್ದು, ಹಗಲು ರಾತ್ರಿ ಎನ್ನದೇ ಸುತ್ತಮುತ್ತಲ ಬಡಾವಣೆಯಲ್ಲಿ ಹುಡುಕಾಟ ನಡೆಸಿದ್ದಾರೆ.

ನಗರದೆಲ್ಲೆಡೆ ಬ್ಯಾನರ್​ಗಳನ್ನು ಕಟ್ಟಿ ಹುಡುಕಿ ಕೊಟ್ಟವರಿಗೆ ಬರೋಬ್ಬರಿ 50,000 ರೂ. ಬಹುಮಾನ ಕೊಡುವುದಾಗಿಯೂ ಘೋಷಣೆ ಮಾಡಿದ್ದಾರೆ. ಆಫ್ರಿಕನ್ ಗ್ರೇ ಜಾತಿಯ ಈ ಗಿಣಿಗೆ ರುಸ್ತುಮಾ ಎಂದು ಹೆಸರಿಟ್ಟಿದ್ದರು. ಅರ್ಜುನ್ ಮತ್ತು ರಂಜನಾ ದಂಪತಿ ಎರಡೂವರೆ ವರ್ಷಗಳಿಂದ ಪ್ರೀತಿಯಿಂದ ಈ ಎರಡು ಗಿಣಿಗಳನ್ನು ಮನೆಯಲ್ಲಿ ಸಾಕಿದ್ದರು.

ಇದನ್ನೂ ಓದಿ:ತುಮಕೂರು: ಕಳೆದು ಹೋಗಿರೋ ಗಿಣಿ ಹುಡುಕಿಕೊಟ್ಟವರಿಗೆ 50 ಸಾವಿರ ರೂ. ಬಹುಮಾನ ಘೋಷಿಸಿದ ಕುಟುಂಬ

ನಾಪತ್ತೆಯಾಗಿರೋ ಗಿಣಿಯ ಮಾಹಿತಿ ನೀಡುವಂತೆ ಈವರೆಗೂ 35 ಸಾವಿರ ಕರಪತ್ರಗಳನ್ನು ಹಂಚಿದ್ದಾರೆ. ಇದೀಗ ನಾಪತ್ತೆಯಾಗಿರೋ ಗಿಣಿ ಜೊತೆಯಲ್ಲಿದ್ದ ಮತ್ತೊಂದು ಗಿಣಿಯನ್ನು ಇಟ್ಟುಕೊಂಡು ನಗರದೆಲ್ಲೆಡೆ ಓಡಾಡುತ್ತಿದ್ದಾರೆ. ಈ ಗಿಣಿಯ ಸದ್ದಿಗೆ ಆ ಗಿಣಿ ಬರಬಹುದು ಎಂಬುದು ಇವರ ನಂಬಿಕೆ. ಮನೆಯಲ್ಲಿ ಯಾವುದೇ ರೀತಿಯ ಬೋನ್ ಇರಿಸಿರಲಿಲ್ಲ. ಮನೆಯ ಬಾಗಿಲು ತೆಗೆದಾಗ ತಪ್ಪಿಸಿಕೊಂಡು ಹೋಗಿದೆ ಎನ್ನುತ್ತಾರೆ ಗಿಣಿ ಮಾಲೀಕ ಅರ್ಜುನ್.

ಗಿಣಿ ಸಿಕ್ಕಿದ ಮೇಲೆ ಗುಜರಾತ್​ನ ಪಾರ್ಕೊಂದರಲ್ಲಿ ಬಿಡಲಾಗುವುದು. ಸಿಗದೇ ಇದ್ದರೂ ಈ ಗಿಣಿಯನ್ನು ನಾವು ಅಲ್ಲಿಗೆ ಕೊಡುತ್ತೇವೆ. ಮತ್ತೊಮ್ಮೆ ಈ ರೀತಿಯ ಸಮಸ್ಯೆ ಸಂಭವಿಸಬಾರದೆನ್ನುವ ದೃಷ್ಟಿಯಿಂದ ನಾವು ಈ ನಿರ್ಧಾರ ಕೈಗೊಂಡಿದ್ದೇವೆಂದು ಮಾಲೀಕ ಅರ್ಜುನ್ ತಿಳಿಸಿದರು.