ವರದಕ್ಷಿಣೆಗಾಗಿ ಪತ್ನಿಯನ್ನೇ ಕೊಲೆಗೈದ ಪಾಪಿ ಪತಿ.. ಆರೋಪಿ ಅಂದರ್

ವರದಕ್ಷಿಣೆಗಾಗಿ ಪತ್ನಿಯನ್ನು ಕೊಲೆಗೈದ ಪತಿ- ತುರುವೇಕೆರೆ ತಾಲೂಕಿನ ಮಾಯಸಂದ್ರದಲ್ಲಿ ಘಟನೆ- ಆರೋಪಿಯನ್ನು ಬಂಧಿಸಿದ ಪೊಲೀಸರು

ತುಮಕೂರು:ರಾಜ್ಯದಲ್ಲಿ ಕೊಲೆ ಪ್ರಕರಣಗಳು ಹೆಚ್ಚುತ್ತಿವೆ.ವರದಕ್ಷಿಣೆ ಆಸೆಗೆ ಪತ್ನಿಯನ್ನು ಕೆರೆಗೆ ತಳ್ಳಿ ಪತಿಯೊಬ್ಬ ಕೊಲೆ ಮಾಡಿರುವ ಘಟನೆ ತುಮಕೂರು ಜಿಲ್ಲೆ ತುರುವೇಕೆರೆ ತಾಲೂಕಿನ ಮಾಯಸಂದ್ರದಲ್ಲಿ ನಡೆದಿದೆ. ದರ್ಶಿನಿ (26) ಮೃತ ದುರ್ದೈವಿಯಾಗಿದ್ದಾರೆ. ಆರೋಪಿ ಪತಿಯನ್ನು ಪೊಲೀಸರು ಬಂಧಿಸಿದ್ದಾರೆ.

ವರದಕ್ಷಿಣೆಗಾಗಿ ಕೊಲೆಗೈದ ಪತಿ:ಬೆಂಗಳೂರಿನ ಯಲಹಂಕ ಮೂಲದ ಹುಣಸೇಮಾರನಹಳ್ಳಿ ನಿವಾಸಿ ವಿನಯ್​, ಕಳೆದ ಆರು ವರ್ಷಗಳ ಹಿಂದೆ ನಾಗಮಂಗಲ ಮೂಲದ ದರ್ಶಿನಿ ಎಂಬವರನ್ನು ಮದುವೆಯಾಗಿದ್ದ. ಈ ದಂಪತಿಗೆ 5 ವರ್ಷದ ಗಂಡು ಮಗುವಿದೆ. ಮದುವೆಯಾದಾಗಿನಿಂದಲೂ ಹಲವು ಬಾರಿ ಪತ್ನಿಗೆ ವರದಕ್ಷಿಣೆ ಕಿರುಕುಳ ನೀಡುತ್ತಿದ್ದ. ತಂದೆ ಮನೆಯಿಂದ ಹಣ ತರುವಂತೆ ದಿನನಿತ್ಯ ಪೀಡಿಸುತ್ತಿದ್ದ. ಒಂದು ತಿಂಗಳ ಹಿಂದೆಯಷ್ಟೇ ದಂಪತಿ ಬೆಂಗಳೂರು ನಗರ ಬಿಟ್ಟು ತುರುವೇಕೆರೆ ತಾಲೂಕಿನ ಮಾಯಸಂದ್ರದಲ್ಲಿ ಬಾಡಿಗೆ ಮನೆಯಲ್ಲಿ ವಾಸಿಸುತ್ತಿದ್ದರು.

ಕಳೆದ ಶನಿವಾರ ಬಟ್ಟೆ ತೊಳೆಯಲೆಂದು ಕೆರೆ ಬಳಿ ತೆರಳಿದ್ದ ಪತ್ನಿ ದರ್ಶಿನಿಯನ್ನು ಕೆರೆಗೆ ತಳ್ಳಿ ಕೊಲೆ ಮಾಡಿದ್ದ. ಬಳಿಕ ತನ್ನ ಪತ್ನಿ ನಾಪತ್ತೆಯಾಗಿದ್ದಾಳೆಂದು ಡ್ರಾಮ ಮಾಡಿದ್ದಲ್ಲದೇ, ತನ್ನ ಅತ್ತೆ, ಮಾವ ಸಂಬಂಧಿಕರಿಗೆ ಕರೆ ಮಾಡಿ ತುರುವೇಕರೆ ಪೊಲೀಸ್​ ಠಾಣೆಯಲ್ಲಿ ದೂರು ದಾಖಲಿಸಲು ತೆರಳಿದ್ದ. ಅಲ್ಲಿಂದ ತನ್ನ ಪತ್ನಿಯ ಫೋಟೋ ತರುವುದಾಗಿ ಠಾಣೆಯಿಂದ ಹೊರಬಂದವನು ನಾಪತ್ತೆಯಾಗಿದ್ದ. ಬಳಿಕ ಕೆರೆಯಲ್ಲಿ ದರ್ಶಿನಿ ಮೃತದೇಹ ಪತ್ತೆಯಾದ ಬಗ್ಗೆ ಸ್ಥಳೀಯರಿಂದ ಮಾಹಿತಿ ಲಭ್ಯವಾಗಿದ್ದು, ಪರಿಶೀಲನೆ ನಡೆಸಿದ ಪೊಲೀಸರು ಶವ ದರ್ಶಿನಿಯದೆಂದು ಖಚಿತಪಡಿಸಿಕೊಂಡಿದ್ದಾರೆ. ಇದೀಗ ಕೊಲೆಗೈದು ನಾಪತ್ತೆಯಾಗಿದ್ದ ಆರೋಪಿ ವಿನಯ್​ ಅನ್ನು ಪೊಲೀಸರು ಬಂಧಿಸಿದ್ದು, ತನಿಖೆ ಮುಂದುವೆರೆಸಿದ್ದಾರೆ.

ಇದನ್ನೂ ಓದಿ:ಕೆಳಮನೆ 'ಪತ್ನಿ' ಮೇಲ್ಮನೆ 'ಗಂಡ'ಪರಾರಿ ಪ್ರಕರಣ: ವಕೀಲರ ಮೂಲಕ ಪೊಲೀಸರ ಮುಂದೆ ಹಾಜರಾದ ಮೇಲ್ಮನೆ ಗಂಡ

ಮೃತಳ ತಂದೆ ನೀಡಿದ ದೂರಲ್ಲೇನಿದೆ?: "ನನ್ನ ಮಗಳು ದರ್ಶಿಕಾಳನ್ನು ವಿನಯ್​ ಎಂಬವರಿಗೆ ಮದುವೆ ಮಾಡಿಕೊಟ್ಟಿದ್ದೆವು. ವಿನಯ್​ ಮದುವೆಯಾದ ಸ್ವಲ್ಪ ದಿನ ನನ್ನ ಮಗಳನ್ನು ಚೆನ್ನಾಗಿ ನೋಡಿಕೊಂಡಿದ್ದು, ನಂತರ ತಂದೆ ತಾಯಿ ಮಾತು ಕೇಳಿಕೊಂಡು ವರದಕ್ಷಿಣೆ ನೀಡುವಂತೆ ಸಂಸಾರ ವಿಚಾರದಲ್ಲಿ ಜಗಳ ತೆಗೆದು ಗಲಾಟೆ ಮಾಡುತ್ತಿದ್ದ. ನಾವು ಮತ್ತು ಸಂಬಂಧಿಕರು ಎರಡು ಮೂರು ಬಾರಿ ಹೋಗಿ ಗಲಾಟೆ ಮಾಡಿಕೊಳ್ಳದಂತೆ ತಿಳುವಳಿಕೆ ಹೇಳಿ ಸ್ವಲ್ಪ ಹಣವನ್ನು ಕೊಟ್ಟು ಬಂದಿದ್ದೆವು. ನಂತರ ಒಂದು ವರ್ಷದ ಹಿಂದೆ ಗಲಾಟೆ ತೆಗೆದ ಹಿನ್ನೆಲೆಯಲ್ಲಿ ಪುನಃ ಅವರಿಗೆ ಬೇಕಾದ ಎಲ್ಲಾ ವ್ಯವಸ್ಥೆಗಳನ್ನು ನಮಗೆ ಅನುಕೂಲವಾಗುವಷ್ಟು ರೀತಿಯಲ್ಲಿ ಮಾಡಿದ್ದೇವೆ. ಜನವರಿ 28 ರಂದು ವಿನಯ್​ ದೂರವಾಣಿ ಕರೆ ಮಾಡಿ ದರ್ಶಿನಿ ಕಾಣುತ್ತಿಲ್ಲವೆಂದು ತಿಳಿಸಿದ್ದರಿಂದ ನಾನು ತಕ್ಷಣ ಮಾಯಸಂದ್ರಕ್ಕೆ ಬಂದು ವಿಚಾರ ಮಾಡಿದೆ. ನನ್ನ ಮಗಳನ್ನು ವಿನಯ್​ ಕೆರೆಗೆ ಬಟ್ಟೆ ತೊಳೆಯಲು ಕರೆದುಕೊಂಡು ಹೋಗಿ ಅವಳಿಗೆ ಹೊಡೆದು ಕೆರೆಗೆ ತಳ್ಳಿ ಸಾಯಿಸಿದ್ದಾನೆ ಎಂಬ ವಿಚಾರ ತಿಳಿಯಿತು. ಈ ಸಂಬಂಧ ಆರೋಪಿ ವಿನಯ್​ ಅನ್ನು ಬಂಧಿಸಿ" ಎಂದು ತುರುವೇಕೆರೆ ಪೊಲೀಸ್​ ಠಾಣೆಯಲ್ಲಿ ಮೃತಳ ತಂದೆ ದೂರು ದಾಖಲಿಸಿದ್ದರು.

ಇದನ್ನೂ ಓದಿ:ನೈಜೀರಿಯನ್ ಮಾದಕ ಸರಬರಾಜುದಾರನ ಜೊತೆ ರಕೀಬ್ ಜಾಕೀರ್ ಸಂಪರ್ಕ: ವಿವರಣೆ ಪಡೆದ ಡಿ.ಜೆ.ಹಳ್ಳಿ ಪೊಲೀಸರು