ವರುಣಾರ್ಭಟ: ತುಮಕೂರು ಜಿಲ್ಲೆಯ ಹಳ್ಳಕೊಳ್ಳಗಳಲ್ಲಿ ನೀರಿನ ರಭಸ

ತುಮಕೂರಿನಲ್ಲಿ ವರುಣನ ರೌದ್ರಾವತಾರದಿಂದ ಒಂದೆಡೆ ಮನೆ ಹಾಗೂ ರಸ್ತೆ ಕುಸಿತವುಂಟಾಗಿದ್ದು, ಇನ್ನೊಂದೆಡೆ ಕೆರೆ ಕಟ್ಟೆಗಳಲ್ಲಿ, ಹಳ್ಳ ಕೊಳ್ಳಗಳಲ್ಲಿ ಭಾರಿ ಪ್ರಮಾಣದ ನೀರು ಹರಿಯುತ್ತಿದೆ.

ತುಮಕೂರು: ವರುಣನ ರೌದ್ರಾವತಾರದಿಂದ ಒಂದೆಡೆ ಮನೆ ಹಾಗೂ ರಸ್ತೆ ಕುಸಿತವುಂಟಾಗಿದ್ದು, ಇನ್ನೊಂದೆಡೆ ಹಳ್ಳ ಕೊಳ್ಳಗಳಲ್ಲಿ ನೀರಿನ ರಭಸ ಹೆಚ್ಚಾಗಿದೆ.

ನಿನ್ನೆ ರಾತ್ರಿ ಸುರಿದ ಮಳೆಗೆ ಜಿಲ್ಲೆಯ ಗುಬ್ಬಿ ತಾಲೂಕಿನ ಕಬ್ಬಿಣ ಸೇತುವೆ ಪಾಳ್ಯ ಗ್ರಾಮದಲ್ಲಿ ಸುಶೀಲಮ್ಮ ಎಂಬವರ ಮನೆ ಗೋಡೆ ಕುಸಿದಿದೆ. ಅದೃಷ್ಟವಶಾತ್ ಯಾವುದೇ ಪ್ರಾಣಾಪಾಯ ಸಂಭವಿಸಿಲ್ಲ. ಚಿಕ್ಕನಾಯಕನಹಳ್ಳಿ ತಾಲೂಕಿನ ಬಹುತೇಕ ಎಲ್ಲಾ ಕೆರೆಗಳು ತುಂಬಿ ಕೋಡಿ ಒಡೆದಿವೆ. ಚಿಕ್ಕನಾಯಕನಹಳ್ಳಿ ತಾಲೂಕಿನ ಶೆಟ್ಟಿಕೆರೆ ಗ್ರಾಮದ ಬೃಹತ್ ಕೆರೆಯ ಕೋಡಿ ಹಲವು ವರ್ಷಗಳ ಬಳಿಕ ತುಂಬಿದೆ. ಚಿಕ್ಕನಾಯಕನಹಳ್ಳಿಯ ಕೆರೆಕಟ್ಟೆಗಳ ನೀರು ನೆರೆಯ ಚಿತ್ರದುರ್ಗ ಜಿಲ್ಲೆಯ ಹಿರಿಯೂರು ತಾಲೂಕಿನ ವಾಣಿವಿಲಾಸ ಜಲಾಶಯ ಸೇರುತ್ತಿದೆ.

ಹಳ್ಳಕೊಳ್ಳಗಳಲ್ಲಿ ಹರಿಯುತ್ತಿದೆ ಕೆಂಪು ಬಣ್ಣ ಮಿಶ್ರಿತ ನೀರು :

ಜಿಲ್ಲೆಯಲ್ಲಿ ಗಣಿಗಾರಿಕೆ ನಡೆಯುತ್ತಿದ್ದ ಪ್ರದೇಶದಿಂದ ಹರಿದು ಬರುತ್ತಿರುವ ನೀರು ಸಂಪೂರ್ಣ ಕೆಂಪು ಬಣ್ಣದಿಂದ ಕೂಡಿದೆ. ಚಿಕ್ಕನಾಯಕನಹಳ್ಳಿ ತಾಲೂಕಿನ ಹಬ್ಬಿಗೆ ಗಣಿಗಾರಿಕೆ ಪ್ರದೇಶದಿಂದ ಕಣಿವೆ ಮೂಲಕ ಕೆಂಪು ಬಣ್ಣದ ನೀರು ಹರಿದುಬರುತ್ತಿದೆ. ಬುಲ್ಲೆನಹಳ್ಳಿಯ ತೋಟಗಳು, ಹೊಲಗದ್ದೆಗಳು, ಹಳ್ಳ-ಕೊಳ್ಳಗಳ ಮೂಲಕ ಹೊಸಹಳ್ಳಿ ಬಳಿಯ ದುರ್ಗದ ಕೆರೆಗೆ ಕೆಂಪು ಬಣ್ಣದ ನೀರು ಸೇರುತ್ತಿದೆ.