ತುಮಕೂರಿನಲ್ಲಿ ಬಸ್​ ಸಂಚಾರ ಪುನಾರಂಭ; ಮೊದಲ ದಿನ 150 ಬಸ್ ಓಡಾಟ

ಮೂರ್ನಾಲ್ಕು ತಿಂಗಳ ಬಳಿಕ ತುಮಕೂರು ಜಿಲ್ಲೆಯಲ್ಲಿ ಬಸ್​ ಸಂಚಾರ ಪುನರಾರಂಭವಾಗಿದ್ದು, ಇಂದು ಸರ್ಕಾರಿ ಮತ್ತು ಖಾಸಗಿ ಬಸ್​ಗಳು ರಸ್ತೆಗಿಳಿದಿವೆ. ಮೊದಲ ದಿನ ಪ್ರಯಾಣಿಕರ ಸಂಖ್ಯೆ ನಿರೀಕ್ಷಿತ ಸಂಖ್ಯೆಯಲ್ಲಿ ಇತ್ತು.

ತುಮಕೂರು :ಲಾಕ್ ಡೌನ್​ ಅಂತ್ಯಗೊಂಡಿರುವ ಹಿನ್ನೆಲೆ ಇಂದು ಬೆಳಗ್ಗೆಯಿಂದ ಜಿಲ್ಲೆಯಲ್ಲಿ ಕೆಎಸ್​ಆರ್​ಟಿಸಿ ಮತ್ತು ಖಾಸಗಿ ಬಸ್​​ಗಳ​ ಸಂಚಾರ ಪುನರಾರಂಭವಾಗಿದೆ.ತುಮಕೂರು ಕೆಎಸ್​ಆರ್​ಟಿಸಿ ಡಿಪೋದಿಂದ 50 ಬಸ್​ಗಳು ಸಂಚಾರ ನಡೆಸುತ್ತಿವೆ. ಬೆಂಗಳೂರು-ತುಮಕೂರು ನಡುವೆ ಬೆಳಗ್ಗೆ 6 ಗಂಟೆಯಿಂದಲೇ ಬಸ್​ ಸಂಚಾರ ಆರಂಭವಾಗಿದೆ.

ಮೊದಲ ದಿನವೇ ನಿರೀಕ್ಷಿತ ಸಂಖ್ಯೆಯಲ್ಲಿ ಪ್ರಯಾಣಿಕರು ಬಸ್​ಗಳಲ್ಲಿ ಸಂಚರಿಸುತ್ತಿದ್ದಾರೆ. ಶೇ 50 ರಷ್ಟು ಪ್ರಯಾಣಿಕರ ಸಂಚಾರಕ್ಕೆ ಮಾತ್ರ ಅವಕಾಶವಿರುವುದರಿಂದ ಬೆಂಗಳೂರಿನ ಕಡೆಗೆ ಸಂಚರಿಸುತ್ತಿರುವ ಬಸ್​​ಗಳಲ್ಲಿ ಕೇವಲ 20 ಮಂದಿಯನ್ನು ಮಾತ್ರ ಹತ್ತಿಸಿಕೊಳ್ಳಲಾಗ್ತಿದೆ.

ಕೆಲ ಬಸ್​ಗಳಲ್ಲಿ ಮಾತ್ರ ಬೆರಳೆಣಿಕೆಯ ಪ್ರಯಾಣಿಕರು ಸಂಚರಿಸುತ್ತಿರುವುದು ಕಂಡು ಬಂತು. ಖಾಸಗಿ ಬಸ್​ಗಳಲ್ಲಿಯೂ ಪ್ರಯಾಣಿಕರ ಸಂಖ್ಯೆ ಕಡಿಮೆಯಿತ್ತು.

ಮೊದಲ ದಿನ 150 ಬಸ್​ಗಳನ್ನು ಬಿಡಲು ತುಮಕೂರು ಕೆಎಸ್​ಆರ್​ಟಿಸಿ ವಿಭಾಗ ಸಿದ್ದತೆ ಮಾಡಿಕೊಂಡಿದೆ. ಜಿಲ್ಲೆಯ ಎಲ್ಲಾ ತಾಲೂಕು ಕೇಂದ್ರಗಳಿಂದಲೂ ತಲಾ ಐದು ಬಸ್​ಗಳು ಬೆಂಗಳೂರಿನ ಕಡೆಗೆ ಸಂಚರಿಸಲಿವೆ.