ತುಮಕೂರು: ರೈಲ್ವೆ ನಿಲ್ದಾಣದಲ್ಲಿರುವ ಕ್ಯಾಂಟೀನ್ನಲ್ಲಿ ಸೋಂಕು ಹರಡುವಿಕೆ ಭೀತಿಯಿಂದ ವ್ಯಾಪಾರ ಬಹುಪಾಲು ಕ್ಷೀಣಿಸಿತ್ತು. ಇದೀಗ ಎರಡನೇ ಅಲೆ ವೇಳೆ ರಾಜ್ಯದಲ್ಲಿ ಲಾಕ್ಡೌನ್ ಜಾರಿಯಲ್ಲಿದೆ. ಪರಿಣಾಮ ಹೆಚ್ಚಿನ ಪ್ರಯಾಣಿಕರಿಲ್ಲದೆ ಬಿಕೋ ಎನ್ನುತ್ತಿರುವ ರೈಲ್ವೆ ನಿಲ್ದಾಣದಲ್ಲಿ ಕ್ಯಾಂಟೀನ್ ವ್ಯಾಪಾರ-ವಹಿವಾಟು ಅಕ್ಷರಶಃ ಬಂದ್ ಆಗಿದೆ.
ಕ್ಯಾಂಟೀನ್ಗಳಲ್ಲಿ ತಯಾರಿಸುವ ಇಡ್ಲಿ, ವಡೆ, ದೋಸೆ, ಪಲಾವ್ ಮತ್ತಿತರ ಆಹಾರ ಪದಾರ್ಥಗಳನ್ನು ಖರೀದಿಸುವವರಿಲ್ಲದೆ ವ್ಯಾಪಾರ ಕುಂಠಿತಗೊಂಡಿದೆ. ಸಾಮಾನ್ಯವಾಗಿ ರೈಲುಗಳು ನಿಲ್ದಾಣಕ್ಕೆ ಬಂದ ಸಂದರ್ಭದಲ್ಲಿ ಪ್ರಯಾಣಿಕರು ಕ್ಯಾಂಟೀನ್ಗಳಿಗೆ ಮುಗಿಬಿದ್ದು ತಿಂಡಿ ಖರೀದಿಸುತ್ತಿದ್ದರು. ಆದ್ರೀಗ ರೈಲುಗಳಲ್ಲಿ ಸಂಚರಿಸುವ ಪ್ರಯಾಣಿಕರ ಸಂಖ್ಯೆಯೇ ಇಳಿಮುಖವಾಗಿದೆ. ಒಂದು ರೈಲು ನಿಲ್ದಾಣಕ್ಕೆ ಬಂದು ನಿಂತರೆ ನೂರಾರು ಮಂದಿ ಪ್ರಯಾಣಿಕರು ಕ್ಯಾಂಟೀನ್ಗಳಿಗೆ ಬಂದು ತಿಂಡಿ ಖರೀದಿಸಿ ರೈಲು ಹತ್ತುತ್ತಿದ್ದರು. ಆದ್ರೆ ಇದೀಗ ನಿಲ್ದಾಣಕ್ಕೆ ಬರುವ ಬೆರಳೆಣಿಕೆಯಷ್ಟು ರೈಲುಗಳಲ್ಲಿ ಪ್ರಯಾಣಿಕರ ಸಂಖ್ಯೆಯೂ ಬೆರಳೆಣಿಕೆಯಷ್ಟಿದೆ.
ರೈಲು ನಿಲ್ದಾಣಕ್ಕೆ ಬಂದು ನಿಂತರೆ ಕನಿಷ್ಠ 15ರಿಂದ 20 ಮಂದಿ ಮಾತ್ರ ಪ್ರಯಾಣಿಕರು ರೈಲಿನಿಂದ ಇಳಿಯುತ್ತಾರೆ. ಅಷ್ಟೇ ಸಂಖ್ಯೆಯ ಪ್ರಯಾಣಿಕರು ರೈಲ್ವೆ ನಿಲ್ದಾಣದಿಂದ ರೈಲು ಹತ್ತಿ ಪ್ರಯಾಣಿಸುತ್ತಾರೆ. ಒಂದು ವೇಳೆ ಪ್ರಯಾಣಿಕರು ಕ್ಯಾಂಟೀನ್ಗೆ ಬಂದ್ರೆ ಬಿಸಿಬಿಸಿ ಕಾಫಿ ಅಥವಾ ಟೀ ಕುಡಿದು ಹೋಗುತ್ತಾರೆಯೇ ಹೊರತು ತಿಂಡಿ ಖರೀದಿಸುವುದು ತೀರಾ ಕಡಿಮೆ. ಇದ್ರಿಂದಾಗಿ ಮೊದಮೊದಲು ತಯಾರಿಸುತ್ತಿದ್ದ ಆಹಾರ ಪದಾರ್ಥಗಳನ್ನು ಎಸೆಯಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿತ್ತು. ಇದನ್ನು ಮನಗಂಡು ಆಹಾರ ಪದಾರ್ಥ ತಯಾರಿಸುವ ಪ್ರಮಾಣವನ್ನೇ ಕಡಿಮೆ ಮಾಡಲಾಗಿದೆ ಎಂದು ರೈಲ್ವೆ ಕ್ಯಾಂಟೀನ್ ನಿರ್ವಾಹಕ ರಾಜು ತಿಳಿಸಿದ್ದಾರೆ.