ಚಿಕ್ಕ ಚಿಕ್ಕ ರಸ್ತೆಗಳ ಅಭಿವೃದ್ಧಿ ಮರೀಚಿಕೆ: ಗುಂಡಿಗಳಿಂದ ಬೇಸತ್ತ ವಾಹನ ಸವಾರರು

ಕರ್ನಾಟಕವು ದೇಶದಲ್ಲೇ ವೇಗವಾಗಿ ಅಭಿವೃದ್ಧಿ ಹೊಂದುತ್ತಿರುವ ಮುಂಚೂಣಿ ರಾಜ್ಯ. ತನ್ನ ಅಭಿವೃದ್ಧಿ ಪಥದಲ್ಲಿ ರಸ್ತೆ, ಮೂಲಸೌಕರ್ಯಕ್ಕೆ ಒತ್ತು ನೀಡಿದೆ. ಆದ್ರೆ ಅದೆಷ್ಟೋ ಕಡೆಗಳಲ್ಲಿ ಕೆಲ ಮುಖ್ಯ ರಸ್ತೆಗಳನ್ನು ಮಾತ್ರ ಅಭಿವೃದ್ಧಿಪಡಿಸಲಾಗುತ್ತದೆಯೇ ಹೊರತು ಹೆಚ್ಚಿನ ರಸ್ತೆಗಳ ಅಭಿವೃದ್ಧಿ ಮರೀಚಿಕೆ ಆಗಿದೆ.

ತುಮಕೂರು/ಶಿವಮೊಗ್ಗ:ಯಾವುದೇ ಒಂದು ಪ್ರದೇಶದ ರಸ್ತೆಯ ಸ್ಥಿತಿಗತಿಗಳ ಮೇಲೆಯೇ ಅಲ್ಲಿನ ಅಭಿವೃದ್ಧಿಯನ್ನ ಅಳೆಯೋದುಂಟು. ಆದ್ರೆ ಅದೆಷ್ಟೋ ಕಡೆಗಳಲ್ಲಿ ಕೆಲ ಮುಖ್ಯ ರಸ್ತೆಗಳನ್ನ ಮಾತ್ರ ಅಭಿವೃದ್ಧಿಪಡಿಸಲಾಗುತ್ತದೆಯೇ ಹೊರತು ಗುಂಡಿ ಬಿದ್ದ ರಸ್ತೆಗಳತ್ತ ಅಧಿಕಾರಿಗಳು ಕಣ್ಣೆತ್ತಿಯೂ ನೋಡಲ್ಲ. ದುರಸ್ತಿ ಕಾಮಗಾರಿಗಳು ಹೆಸರಿಗೆ ಮಾತ್ರ. ನೀರಿಗೆ ಹೋಮ ಮಾಡಿದ ಪರಿಸ್ಥಿತಿ.

ತುಮಕೂರಿನ ಪರಿಸ್ಥಿತಿ ನೋಡೋದಾದ್ರೆ, ಬರೋಬ್ಬರಿ ಸಾವಿರ ಕಿಲೋ ಮೀಟರ್​ಗೂ ಮೀರಿದ ರಸ್ತೆ ವ್ಯಾಪ್ತಿಯಿದೆ. ಆದ್ರೆ ಶೇ.60ರಷ್ಟು ರಸ್ತೆಗಳು ಇನ್ನೂ ಕೂಡ ಮಣ್ಣಿನಿಂದ ಕೂಡಿರೋದು ಮಾತ್ರ ವಿಪರ್ಯಾಸ. ಸ್ಮಾರ್ಟ್ ಸಿಟಿ ಯೋಜನೆಯಡಿ ಕೇವಲ ಆರು ವಾರ್ಡ್​ಗಳ ರಸ್ತೆಗಳನ್ನು ಅಭಿವೃದ್ಧಿಪಡಿಸಲಾಗುತ್ತಿದ್ರೆ, ಉಳಿದವನ್ನ ಶಾಸಕರ ಅನುದಾನ, ಪಾಲಿಕೆ ವ್ಯಾಪ್ತಿಯ ಅನುದಾನದಲ್ಲೇ ಅಭಿವೃದ್ಧಿಪಡಿಸಬೇಕಿದೆ. ಹಾಗಾಗಿ ಅದೆಷ್ಟೋ ಕಡೆಗಳಲ್ಲಿ ಗುಂಡಿ ಮುಚ್ಚೋ ಕಾರ್ಯಕ್ಕೆ ಇನ್ನೂ ಕಾಲ ಕೂಡಿ ಬಂದಿಲ್ಲ.

ಶಿವಮೊಗ್ಗದಲ್ಲಿ ಒಂದು ಕಡೆ ಗುಂಡಿಗಳನ್ನು ಸರಿಪಡಿಸ್ತಿದ್ರೆ, ಮತ್ತೊಂದೆಡೆ ಸ್ಮಾರ್ಟ್ ಸಿಟಿ ಹೆಸರಿನಲ್ಲಿ ರಸ್ತೆಗಳನ್ನು ಕಿತ್ತು ಹಾಕಲಾಗುತ್ತಿದೆ. ಮಳೆಯಿಂದಾದ ಗುಂಡಿಗಳನ್ನು ಕಳೆದ ಆಗಸ್ಟ್​​ನಲ್ಲಿ ಪಾಲಿಕೆ ಮುಚ್ಚಿಸಿತ್ತಾದ್ರೂ ಅಷ್ಟೇ ವೇಗವಾಗಿ ಗುಂಡಿಗಳು ಮತ್ತೆ ತೆರೆದುಕೊಂಡಿವೆ. ಹೌದು, ಬರೋಬ್ಬರಿ 85 ಲಕ್ಷ ರೂ.ಗೂ ಹೆಚ್ಚು ವೆಚ್ಚದಲ್ಲಿ ಪಾಲಿಕೆ ರಸ್ತೆ ಗುಂಡಿಗಳನ್ನು ಮುಚ್ಚಿಸಿತ್ತಾದ್ರೂ, ಶೇ. 70ರಷ್ಟು ರಸ್ತೆ ಭಾಗ ಮತ್ತೆ ಗುಂಡಿಗಳಾಗಿ ಮಾರ್ಪಟ್ಟಿದೆ. ಇದರಿಂದ ವಾಹನ ಸವಾರರು ತಮ್ಮ ಜೀವ ಕೈಯಲ್ಲಿಡಿದು ಸಂಚರಿಸಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ.

ಹಾಗಾಗಿ ಸ್ಥಳೀಯ ಸರ್ಕಾರ ರಸ್ತೆ ಅಭಿವೃದ್ಧಿಯೆಡೆಗೆ ಹೆಚ್ಚಿನ ಗಮನ ಹರಿಸಿ, ಸಾರ್ವಜನಿಕರಿಗೆ ಸೂಕ್ತ ರಸ್ತೆ ಒದಗಿಸಬೇಕಿದೆ. ಗುಣಮಟ್ಟದ ದುರಸ್ತಿ ಕಾಮಗಾರಿಗಳನ್ನು ಕೈಗೊಂಡು ಗುಂಡಿಗಳು ಮತ್ತೆ ಕಾಣಿಸಿಕೊಳ್ಳದಂತೆ ನೋಡಿಕೊಳ್ಳಬೇಕಿದೆ.