ತುಮಕೂರು: ಮೇ 29ರಂದು ನಡೆದಿದ್ದ ಸ್ಥಳೀಯ ಸಂಸ್ಥೆ ಚುನಾವಣೆಯ ಮತ ಎಣಿಕೆ ಇಂದು ನಡೆಯಿತು. ಈ ಫಲಿತಾಂಶ ಹಲವು ಹಚ್ಚರಿಗಳಿಗೆ ಸಾಕ್ಷಿಯಾಗಿದೆ. ಜಿಲ್ಲೆಯ ಹಲವೆಡೆ ಅಭ್ಯರ್ಥಿಗಳ ಅದೃಷ್ಟ ಕೆಲವೇ ಮತಗಳಿಂದ ನಿರ್ಧಾರವಾಗಿದೆ.
ಪಾವಗಡ ಪುರಸಭೆಯ ವಾರ್ಡ್ ನಂಬರ್ 9ರಲ್ಲಿ ಕಾಂಗ್ರೆಸ್ ಅಭ್ಯರ್ಥಿ ಗಂಗಮ್ಮ ಕೇವಲ 1 ಮತದ ಅಂತರದಿಂದ ಜಯ ಗಳಿಸಿದ್ದಾರೆ. ಕಾಂಗ್ರೆಸ್ ಅಭ್ಯರ್ಥಿ ಗಂಗಮ್ಮ 162 ಮತಗಳನ್ನು ಪಡೆದಿದ್ದು, ಪಕ್ಷೇತರ ಅಭ್ಯರ್ಥಿ ಸತ್ಯಭಾಮ 161 ಮತ ಪಡೆದಿದ್ದಾರೆ.
ಇದೇ ರೀತಿ ತಿಪಟೂರು ನಗರಸಭೆ ವಾರ್ಡ್ ನಂಬರ್ 17ರಲ್ಲಿ ಕಾಂಗ್ರೆಸ್ನ ಟಿ ಎಂ ಗಂಗಾ ಎಂಬುವರು ಕೇವಲ 5 ಮತಗಳ ಅಂತರದಿಂದ ಜೆಡಿಎಸ್ನ ಎನ್.ಆರ್ ಪ್ರೇಮಲೀಲಾ ವಿರುದ್ಧ ಗೆಲುವು ಸಾಧಿಸಿದ್ದಾರೆ. ಇನ್ನು ವಾರ್ಡ್ ನಂಬರ್ 14ರಲ್ಲಿ ಕಾಂಗ್ರೆಸ್ ನ ಯೋಗೇಶ್ ವಿ ಅವರು ಬಿಜೆಪಿಯ ಡಿ.ಆರ್ ಬಸವರಾಜು ವಿರುದ್ಧ 9 ಮತಗಳ ಅಂತರದಿಂದ ಜಯಭೇರಿ ಬಾರಿಸಿದ್ದಾರೆ. ಮತ್ತೊಂದೆಡೆ ವಾರ್ಡ್ನಂಬರ್ 6ರಲ್ಲಿ ಕಾಂಗ್ರೆಸ್ ಅಭ್ಯರ್ಥಿ ಟಿ.ಎನ್ ಪ್ರಕಾಶ್ ಬಿಜೆಪಿಯ ಪ್ರಸನ್ನಕುಮಾರ್ ವಿರುದ್ಧ ಅತಿ ಹೆಚ್ಚು 682 ಮತಗಳ ಅಂತರದಿಂದ ಗೆಲುವು ಸಾಧಿಸಿ ಗಮನ ಸೆಳೆದಿದ್ದಾರೆ.
ಇನ್ನು ಪಾವಗಡ ಪುರಸಭೆಯ ವಾರ್ಡ್ 6 ರಲ್ಲಿ ಪಕ್ಷೇತರ ಅಭ್ಯರ್ಥಿ ಲಕ್ಷ್ಮೀದೇವಿ 9 ಮತಗಳ ಅಂತರದಿಂದ ಕಾಂಗ್ರೆಸ್ನ ಲೀಲಾವತಿ ಅವರನ್ನು ಪರಾಭವಗೊಳಿಸಿ ಜಯದ ನಗೆ ಬೀರಿದ್ದಾರೆ. ಕುಣಿಗಲ್ ಪುರಸಭೆಯ ವಾರ್ಡ್ ನಂಬರ್ 15ರಲ್ಲಿ ಬಿಜೆಪಿಯ ಕೆ.ಟಿ ನಾಗೇಶ್ ಎಂಬುವರು ಕಾಂಗ್ರೆಸ್ನ ಕೆ.ಎಲ್ ಸತೀಶ್ ವಿರುದ್ಧ 8 ಮತಗಳ ಅಂತರದಿಂದ ಗೆದ್ದಿದ್ದಾರೆ.
